«ՀՐԱԴԱԴԱՐԻ ՌԵԺԻՄԻ ԽԱԽՏՄԱՆ ԴԵՊՔՈՒՄ ՄԻԱՅՆ ԿԱՐԳԱՊԱՀ ԶԻՆԾԱՌԱՅՈՂԸ ԿԱՐՈՂ Է ԴԻՄԱԿԱՅԵԼ»

Փոխգնդապետ Ս. Մինասյան. «ՀՐԱԴԱԴԱՐԻ ՌԵԺԻՄԻ ԽԱԽՏՄԱՆ ԴԵՊՔՈՒՄ ՄԻԱՅՆ ԿԱՐԳԱՊԱՀ ԶԻՆԾԱՌԱՅՈՂԸ ԿԱՐՈՂ Է ԴԻՄԱԿԱՅԵԼ»

«Ինչպես արդեն բոլորս տեղյակ ենք, հաճախակի հրադադարի ռեժիմի խախտում է տեղի ունենում հակառակորդի կողմից: Եվ հրադադարի ռեժիմի խախտման դեպքում միայն կարգապահ զինծառայողը կարող է դիմակայել», - օրերս լրագրողների հետ հանդիպման ժամանակ նշեց Հայաստանի մարտական հերթապահություն իրականացնող հյուսիս-արեւելյան զորամասերից մեկի հրամանատար, փոխգնդապետ ՍԱՄՎԵԼ ՄԻՆԱՍՅԱՆՆ ու հավելեց. «Փառք Աստծո, մեր զինծառայողները կարգապահ եւ հոգեպես ամուր են»:

-Պարոն փոխգնդապետ, ինչպիսի՞ն է զորամասի առօրյան:

- Զորամասում առօրյան, համաձայն կարգացուցակի, վեր կացից մինչեւ քուն հագեցած է մարտական պատրաստության պարապմունքներով: Մարտական հերթապահության մեկնումից առաջ բոլոր զինծառայողները նախապատրաստվում են, անց է կացվում անձնակազմի բուժզննում, անձնակազմի ընտրություն: Այն զինծառայողները, որոնք պատրաստ չեն հերթապահությունն իրականացնել, հանվում են հերթապահությունից ու նրանց հետ առանձին աշխատանքներ է իրականացվում: Հիմնականում կիրակնօրյա միջոցառումներն են շատ հագեցած, հատկապես տոնական միջոցառումները: Հանրակրթական դպրոցի բարձր դասարանի սաների, համայնքների հետ համատեղ իրականացվում է սպորտ-մասսայական միջոցառումներ, որը շատ հետաքրքիր ու հագեցած է անցնում:

- Ինչպե՞ս կգնահատեք զինծառայողների մարտական պատրաստվածությունը:

- Մարտական պատրաստվածությունը զորամասում գնահատում եմ լավ: Մեր հրաձգանը այդքան էլ հեռու չէ եւ օր ու գիշեր, այսպես ասած, գործի մեջ է: Յուրաքանչյուր զինծառայող ուսումնական փուլի ընթացքում տասնյակ անգամ հնարավորություն ունի կրակելու: Մարտական հերթապահության մեկնելուց առաջ հատկապես բոլոր ստորաբաժանումները գործնական հրաձգության են մասնակցում: Վերջերս կոնկրետ այս փուլի ընթացքում մենք անցկացնում ենք նաեւ շուրջօրյա պարապմունքներ, որտեղ զինծառայողների ստորաբաժանումները գիշեր-ցերեկ նույն թեմաներով պարապմունքներն են անցկացնում:

- Իսկ ո՞րն է այսօր սահմանապահ զինվորի խնդիրը:

- Սահմանապահ զինվորի առաջնահերթ խնդիրը ազգաբնակչության անվտանգությունն ապահովելն է, պետական սահմանի պահպանությունն ու թույլ չտալը , որպեսզի հակառակորդի կողմից ներթափանցման հնարավորություններ լինեն: Վերջին ժամանակներս դիվերսիոն հետախուզական խմբերի ներթափանցման դեպքեր են գրանցվել Զինված ուժերի գրեթե բոլոր հատվածներում եւ հիմա առավել զգոնությունը բարձրացված է` կոնկրետ դիվերսիոն հետախուզական խմբերի ներթափանցման հավանականությունը կրճատելու, նրանց հայտնաբերելու եւ անհրաժեշտության դեպքում ոչնչացնելու:

- Ի՞նչ է արվում մերօրյա զինվորի մարտական ոգին բարձրացնելու ուղղությամբ:

- Զինծառայողների բարոյահոգեբանական մթնոլորտի կայունության ապահովման ուղղությամբ իրականացվում են մի շարք միջոցառումներ: Հիմնականում հասարակական կազմակերպությունների, սահմանապահ բնակավայրերի դպրոցների սաների հետ շատ հանդիպումներ են լինում: Համայնքի ղեկավարներն են հաճախակի լինում զորամասում, ինչպես նաեւ արցախյան պատերազմի վետերանները: Հիմա մեր ազատամարտիկների միության հետ պլանավորում ենք, որ մոտակա ժամանակում երկու օրով տեղի բնակչությունից, ովքեր մերօրյա պատերազմին մասնակցել են, այսինքն`արցախյան ազատամարտի մասնակից են եղել, բարձրանան մարտական դիրքեր եւ հերթապահություն իրականանցնեն մեր զինվորների հետ միասին, որպեսզի ավելի բարձրանա մեր զինվորի մարտական ոգին:

- Ըստ Ձեզ, անհրաժեշտության դեպքում այսօր մեր զինվորները պատրա՞ստ են արժանի հակահարված տալ հակառակորդին:

-Իհարկե, պատրաստ ենք: Եթե պատրաստ չլինենք, էլ ի՞նչ ենք անում այստեղ:

ՀՐԱՆՏ ՍԱՐԱՖՅԱՆ

Հ.Գ.- Նշենք, որ Վեհափառ Հայրապետի օրհնությամբ եւ Մայր Աթոռ Սուրբ Էջմիածնի Հայեցակարգային հարցերի գրասենյակի տնօրեն Տ. ԲԱԳՐԱՏ եպիսկոպոս ԳԱԼՍՏԱՆՅԱՆԻ առաջնորդությամբ օրերս Տավուշի մարզի սահմանամերձ գյուղեր էին այցելել 140 ուխտավոր ու լրագրող: