«ՆՈՒՅՆԻՍԿ ՄԵԿ ԱՂԱՆԴԱՎՈՐԸ ՇԱՄՇԱԴԻՆՈՒՄ ՇԱՏ Է»

«ՆՈՒՅՆԻՍԿ ՄԵԿ ԱՂԱՆԴԱՎՈՐԸ ՇԱՄՇԱԴԻՆՈՒՄ ՇԱՏ Է»

Այգեպար, Մովսես, Չինարի, Ներքին Կարմիրաղբյուր գյուղերի բնակիչները ամեն օր մաքառում են իրեն կյանքի համար` դառնալով իսկական սահմանապահներ: Հավատքով այս ժողովուրդը գրեթե ամեն օր կրակոցների տակ դիմակայում է աղոթքներով ու հույսով, որ ի վերջո, կգա այն գեղեցիկ օրը, երբ խաղաղություն կլինի: Սակայն ամեն մեկին չէ տրված այդ հոգեւոր տոկունությունն ու, ինչպես իրենք են ասում` «դուխը», քանի որ այս տարածաշրջան էլ են ներթափանցել քայքայիչ աղանդները: Այս մասին «Իրավունքը» զրուցեց Բերդի տարածաշրջանի հոգեւոր հովիվ ՏԵՐ ԱՐԱՄ քահանա ՄԻՐԶՈՅԱՆԻ հետ.
-Եթե փորձենք տոկոսային թվով արտահայտել, ապա մեր տարածաշրջանում ուրիշ տեղերի համեմատ` շատ քիչ են աղանդավորները:

Բայց իմ անձնական կարծիքն է, որ նույնիսկ մեկ աղանդավորը Շամշադինում շատ է, որովհետեւ այստեղ սահման է, ու մենք իրավունք չունենք այստեղ այլ մտայնությամբ, այլ հոգեբանությամբ ապրելու: Իսկ այստեղ ամեն մի գյուղացի նաեւ զինվոր է, սահմանապահ է, ուստի` կրկնում եմ` մեկ աղանդավորն էլ է մեզ համար շատ:
- Իսկ ո՞ր աղանդներն են հիմնականում տարածված, եւ հոգեորսության ինչպիսի՞ դրսեւորումներ կան:
- Տարբեր համայնքներում Եհովայի վկաներ կան, հիսունականներ, ավետարանչականներ եւ այլն: Բայց այստեղ էլ մի քիչ վերապահումով պետք է հարցին մոտենանք, որովհետեւ իբրեւ ժողովուրդ` ես բացարձակ խնդիր չունեմ որեւէ մեկի հետ: Բոլորի հետ շփվում եմ, բոլորին ճանաչում եմ, իմ խնդիրը իրենց ղեկավարների հետ է, այսպես ասած, իրենց լիդերների հետ: Նրանք են, որ մարդաորսության են եկել, իսկ ժողովուրդը` ոչ: Օրինակ, Չինարիում մարդ կա` հիսունական կոչված, բայց ամեն առավոտ Խորանաշատ վանքի առաջ խաչակնքում է, եւ իր համար տարօրինակ է, որ ասես` գիտեք ձեր լիդերները կամ ղեկավարները սա չեն ընդունում: Նրա համար զարմանալի կլինի, որովհետեւ իրենք հենց այդ Խորանաշատ վանքի ներքո են մեծացել, եւ ո՞վ կարող է իրենց վանքից հեռացնել: Պարզապես, այս մարդիկ մեծավ մասամբ աղոթքի կարիք ունեցողներ են եղել եւ, ցավոք սրտի, ինձնից առաջ են եկել այս տարածաշրջան: Բայց հիմա ժամանակն է բոլորին բերելու ու մայր Եկեղեցու շուրջ համախմբելու:

ՀՐԱՆՏ ՍԱՐԱՖՅԱՆ
Հ.Գ.- Նշենք, որ Վեհափառ Հայրապետի օրհնությամբ եւ Մայր Աթոռ Սուրբ Էջմիածնի Հայեցակարգային հարցերի գրասենյակի տնօրեն Տ. ԲԱԳՐԱՏ եպիսկոպոս ԳԱԼՍՏԱՆՅԱՆԻ առաջնորդությամբ օրերս Տավուշի մարզի սահմանամերձ գյուղեր էին այցելել 140 ուխտավոր ու լրագրող: