ՙՀԱՅԱՍՏԱՆԻ ԵՎ ՌՈՒՍԱՍՏԱՆԻ ԺՈՂՈՎՈՒՐԴՆԵՐԻ ՄԻՋԵՎ ՈՉ ՈՔ ՉԻ ԿԱՐՈՂ ՍԵՊ ԽՐԵԼ, ԱՆԳԱՄ ԱՄԵՆԱՄԵԾ ՈՒ ԱՅԼԱՏԵՍԱԿ ԳՐԱՆՏՈՎ՚

ՙՀԱՅԱՍՏԱՆԻ ԵՎ ՌՈՒՍԱՍՏԱՆԻ ԺՈՂՈՎՈՒՐԴՆԵՐԻ ՄԻՋԵՎ ՈՉ ՈՔ ՉԻ ԿԱՐՈՂ ՍԵՊ ԽՐԵԼ, ԱՆԳԱՄ ԱՄԵՆԱՄԵԾ ՈՒ ԱՅԼԱՏԵՍԱԿ ԳՐԱՆՏՈՎ՚

ՀՀ-ում ՌԴ արտակարգ եւ լիազոր դեսպան Իվան Վոլինկինը օրերս իր տված հարցազրույցներից մեկում նշել է. ՙԵս վստահ եմ, որ Ռուսաստանը պետք է ավելի աշխույժ հայտարարի Հայաստանի ինֆորմացիոն դաշտում իր ներկայության մասին: Դրանում ոչ մի կասկած չկա: Սակայն, պետք է զբաղվել այն ՀԿ-ների չեզոքացմամբ, որոնք ցանկանում են սեպ խրել հայ-ռուսական հարաբերություններում, թերեւս հարկ եղած դեպքում օգտագործելով նաեւ այլ մեթոդներ՚: Երեկ կառավարության նիստից հետո ՀՀ ԿԳ նախարար ԱՐՄԵՆ ԱՇՈՏՅԱՆԸ լրագրողների հետ զրույցում անդրադարձավ ՌԴ դեսպանի հայտարարությանը` տեղին մատնանշելով շատ ավելի վտանգավոր մի մեկնաբանության մասին, որն արվել է ՀՀ ԱՄՆ արտակարգ եւ լիազոր դեսպան Ջոն Հեֆֆերնի կողմից:
ՙԵթե ճիշտ եմ ընկալում հասարակական, քաղաքացիական, լրագրողական անհանգստությունները, ոչ միայն դա պետք է հետաքրքրեր եւ մտահոգեր, այլ նաեւ` ԱՄՆ դեսպանի հայտարարությունը: Հատկապես այն, որ Մինսկի խմբի համանախագահ Ուորլիքի հայտարարութունից ԱՄՆ դեսպանը մեջբերեց այն հատվածը, որը վերաբերում էր Լեռնային Ղարաբաղի հանրապետության սահմանադրությամբ ամրագրված տարածքներին: Կարծում եմ` ոչ պակաս, եթե չասեմ շատ ավելի բուռն արձագանք պետք է առաջացներ՚, - նշեց Ա. Աշոտյանն ու հավելեց. ՙՌուսաստանի դեսպանի հարցազրույցին արձագանք եղել է Արտգործնախարարությունից, եւ ես էլ եմ այդ կարծիքին, որ Հայաստանի Հանրապետությունում ՀԿ-ները գնալով ավելի մեծ դեր են ունենում: Այդ կազմակերպությունների մի զգալի մասը պետականամետ է եւ հայաստանամետ: Բայց ակնհայտ է, որ կան նաեւ տարբեր կազմակերպություններ, որոնք առաջնորդվում են ՙով վճարում է, նա էլ պատվիրում է երաժշտությունը՚ սկզբունքով, սակայն օրենսդրական դաշտի խախտումներով գործող ՀԿ ես այս պահին Հայաստանում չեմ տեսնում: Հետեւաբար, Հայաստանի եւ Ռուսաստանի ժողովուրդների միջեւ ոչ ոք չի կարող սեպ խրել եւ չի հաջողվի որեւէ մի ՀԿ-ի, անգամ դա անել ամենամեծ, այլատեսակ գրանտով՚: Ինչ վերաբերում է ամերիկյան հայտարարություներին, ԿԳ նախարարը հայտնեց իր անձնական կարծիքը. ՙԿարծում եմ` Հայաստանի իշխանության եւ ընդդիմության թիվ մեկ խնդիրն այսօր պետք է լինի, որպեսզի թույլ չտանք Հայաստանը, մասնավորապես ԼՂ հակամարտությունը դարձնել գլոբալ աշխարհաքաղաքական պայքարի ինչ-որ նոր օջախ: Եվ Ռուսաստան-ԱՄՆ կամ Ռուսաստան-Արեւմուտք հարաբերությունների ներկա սրված փուլում չպետք է թույլ տանք, որ այն տարածվի Ղարաբաղի վրա: Ղարաբաղը փորձադաշտ չէ աշխարհաքաղաքական պայքարի համար՚:

ՀՐԱՆՏ ՍԱՐԱՖՅԱՆ