Կ. ՕՐԲԵԼՅԱՆԻՆ ԿՀՈՒՂԱՐԿԱՎՈՐԵՆ ՄԱՅԻՍԻ 11-ԻՆ` ԿՈՄԻՏԱՍԻ ԱՆՎԱՆ ՊԱՆԹԵՈՆՈՒՄ

Կ. ՕՐԲԵԼՅԱՆԻՆ ԿՀՈՒՂԱՐԿԱՎՈՐԵՆ ՄԱՅԻՍԻ 11-ԻՆ` ԿՈՄԻՏԱՍԻ ԱՆՎԱՆ ՊԱՆԹԵՈՆՈՒՄ

Վարչապետ Հովիկ Աբրահամյանի նախագահությամբ կառավարությունում կայացել է ԽՍՀՄ և ՀԽՍՀ ժողովրդական արտիստ ԿՈՆՍՏԱՆՏԻՆ ՕՐԲԵԼՅԱՆԻ մահվան կապակցությամբ ՀՀ վարչապետի որոշմամբ ստեղծված թաղման կառավարական հանձնաժողովի նիստը: Նիստում որոշվել է, որ մեծ արտիստի վերջին հրաժեշտի արարողությունը տեղի կունենա մայիսի 11-ին, ժամը 12:00-14:00-ը՝ Արամ Խաչատրյան համերգասրահում: Իսկ հուղարկավորությունը` նույն օրը, Կոմիտասի անվան պանթեոնում:

Ապրիլի 24-ին ականավոր կոմպոզիտոր, դիրիժոր, դաշնակահար, ԽՍՀՄ և ՀԽՍՀ ժողովրդական արտիստ Երևանի պատվավոր քաղաքացի` 86 ամյա Կոնստանտին Օրբելյանի մահով, հայ երաժշտական արվեստը ծանր ու անդառնալի կորուստ կրեց:

Կ. Օրբելյանը ծնվել է 1928 թ. հուլիսի 29-ին, Արմավիր քաղաքում: 1952 թ. ընդունվել է Երևանի Ռ. Մելիքյանի անվան երաժշտական ուսումնարան` ուսումնառությունը համատեղելով Երևանի օպերայի և բալետի թատրոնում կոնցերտմայստերի աշխատանքի հետ: 1954 թ. գերազանցությամբ ավարտել է երաժշտական ուսումնարանը, ընդունվել Երևանի Կոմիտասի անվան պետական կոնսերվատորիա և 1961 թ. ավարտել Էդ. Միրզոյանի կոմպոզիցիայի դասարանը: 1954 թ. ռադիոյում կազմակերպել է գործիքային կվինտետ: 1956 թ. Օրբելյանը դարձել է ԽՍՀՄ կոմպոզիտորների միության անդամ: Նույն տարում նշանակվել է Հայաստանի պետական էստրադային նվագախմբի դիրիժոր և գեղարվեստական ղեկավար`  պաշտոնավարելով 36 տարի: Նրա հմուտ ղեկավարությամբ նվագախումբը գրում է իր տարեգրության փառավոր էջերը` իր հաստատուն տեղը գրավելով ԽՍՀՄ ջազային առաջավոր կոլեկտիվների շարքում: Անուրանալի է Կ. Օրբելյանի դերը նվագախմբի միջազգային ճանաչման և Հայաստանում ջազի զարգացման գործում: Նրա ղեկավարած նվագախմբի շնորհիվ հայկական ջազը դուրս բերվեց միջազգային ասպարեզ: Համերգային գործունեությանը զուգահեռ Կ. Օրբելյանն արդյունավետ աշխատել է նաև որպես կոմպոզիտոր` համատեղելով աշխատանքը ժամանակակից, դասական երաժշտության և «թեթև» երաժշտության ժանրերում: Նրա սիմֆոնիկ և կամերային ստեղծագործությունները, թատրոնի և կինոյի համար երաժշտությունը, երգերը և ջազային երաժշտությունը հասարակական լայն ճանաչում գտան, արժանացան միջազգային բարձր մրցանակների: Բեղմնավոր էր կոմպոզիտորի աշխատանքը նաև ազգային-հայրենասիրական երաժշտության ժանրում: Կ. Օրբելյանն առաջինն էր, ով իրականացրեց ժամանակակից ջազի և ազգային մելոսի միաձուլումը, իսկ նրա ջազային ստեղծագործություններն իրավամբ դարձան սովետական ջազային գործիքային երաժշտության աներկբա նվաճումները: 1956 թ. ստեղծված Լարային կվարտետը` հայ կամերային երաժշտության լավագույն նվաճումներից մեկն է, որը 1957 թ. Մոսկվայում Երիտասարդության և ուսանողների համաշխարհային 6-րդ փառատոնում արժանացավ Գրան-պրիի և Ոսկե մեդալի:

Սովետահայ երաժշտության կարևոր նվաճումներից է Կ. Օրբելյանի աշխատանքը երաժշտական թատրոնում: 1969 թ. նա ստեղծում է «Անմահություն» բալետը (խորեոգրաֆիկ սիմֆոնիա)` պատերազմի մասին ողբերգական ստեղծագործությունը ջազային կոմպոզիցիաների հեղինակին ներկայացնում է միանգամայն նոր կողմից: Բալետը բեմադրվում է Երևանի Ալ. Սպենդիարյանի անվան օպերայի և բալետի պետական ակադեմիական թատրոնում 1969 թ.:

Սիմֆոնիկ երաժշտության բնագավառում հիշատակելի են «Տոնական նախերգանքը» սիմֆոնիկ նվագախմբի համար (1967 թ.), որը շուտով արժանացավ  համամիութենական մրցանակի` որպես լավագույն սիմֆոնիկ ստեղծագործություն, և  «Զանգեզուր» սիմֆոնիկ պոեմը սիմֆոնիկ նվագախմբի համար (1973թ.):

ԼԻԼԻԹ ԵՂԻԱԶԱՐՅԱՆ