ԳՈՒՍԱՆ ՀԱՅԿԱԶՈՒՆ. «ԼԱՎ ԵՐԳԸ ՊԱՏԵՐԱԶՄԻ ԺԱՄԱՆԱԿ ԾԱՆՐ ՀՐԵՏԱՆՈՒ ԴԵՐ Է ԿԱՏԱՐՈՒՄ» (ՏԵՍԱՆՅՈՒԹ)

ԳՈՒՍԱՆ ՀԱՅԿԱԶՈՒՆ. «ԼԱՎ ԵՐԳԸ ՊԱՏԵՐԱԶՄԻ ԺԱՄԱՆԱԿ ԾԱՆՐ ՀՐԵՏԱՆՈՒ ԴԵՐ Է ԿԱՏԱՐՈՒՄ» (ՏԵՍԱՆՅՈՒԹ)

«Շնորհավորում եմ Հայաստանի, Սփյուռքի և Արցախի հայությանը, տա Աստված, որ այդպիսի հաղթանակները այնքան շատ լինեն, որ օրերը չբավականացնեն հաղթանակները նշելու համար»,-մայիսյան հաղթանակների կապակցությամբ շնորհավորելով ողջ հայությանը, նշեց ՀՀ մշակույթի վաստակավոր գործիչ ԳՈՒՍԱՆ ՀԱՅԿԱԶՈՒՆԸ: Նրա խոսքով` եթե բարձր է հայ ազգի ոգին, ապա այդ հաղթանակները միշտ էլ կտոնվեն: Հայի ոգին բարձր պահելու համար Գուսանը տարիներ առաջ հիմնադրեց «Հայկազունք» հայրենասիրական երգերի համույթը, որը հայրենասիրական երգերը տարածում է Հայաստանի, Սփյուռքի և Արցախի հայության մեջ: Գուսանի գրած երգերը այսօր էլ հնչում են ամենուրեք, բարձր պահելով հայ ազգային ոգին: Նրա երգը մի ամբողջ պատմություն է` հաղթանակի, հայ ազգի, հայոց բանակի մասին:

Գուսանը խոստովանում է, որ իր երգերի հաջողության գաղտնիքն այն է, որ դրանց մի մասը ծնվել է պատերազմի ժամանակ, մի մասը` խրամատներում: Յուրաքանչյուր ժամանակ իր երգն է պահանջել և Գուսանը հետևել է պահանջներին: «Լավ երգը պատերազմի ժամանակ ծանր հրետանու դեր է կատարում, այն գերող հատկություն ունի, որը կարող է մարդուն տրամադրել դեպի հաղթնակ և այդպես էլ լինում է: Երբ կռվում էին Գետաշենում` ծնվել է «Գետաշենը», սահմաններում խուճապ էր և պետք էր ոգևորեինք զինվորներին, այդ ժամանակ էլ ծնվեց «Հայեր միացեք» երգը:Եվ, այսպես մեկը մյուսի հետևից ծնվեցին իմ երգերը: Երգերի հաջողություններից մեկն էլ այն է, որ դրանք գրված են ժողովրդի լեզվով, ժողովրդին հասկանալի` առանց ճռճռան մտքերի: Ես ծնվել եմ Արտաշատում և 50 տարի ապրել այնտեղ, իմ առջև տեսնելով Մասիս սարը Արաքսից այն կողմ, միշտ ապրել եմ վրեժը իմ սրտում, որ մեր Հայրենիքը մեզանից տարել են: Սա արդեն ինձ համար երգի թեմա էր»,-ասում է Գուսանը և կես կատակ, կես լուրջ ավելացնում, որ ինքը մնաց Արտաշատում, իսկ այդ երեգերը տարածվեցին Հայաստանով մեկ:

Գուսանը լալկան, տխուր երգեր չի գրում, որոնք վերաբերվում են պարտություններին, դժվարություններին, քանի որ գիտի, հայ ժողովրդի հազարամյա պատմության մեջ դժվարություններ շատ են եղել, որոնք սակայն անցողիկ են, քանի որ հայ ազգի ազգային ոգին միշտ բարձր է եղել: «Ինչքան շատ եմ ուսումնասիրում պատմությունը, այնքան շատ եմ սիրահարվում հայ ազգին ու նրա համառությանը: Բոլոր դարերում նրան թիկունքից հարվածել են, բայց նա կանգուն է: Հայ ազգի նկատմամբ միշտ էլ եղել է նախանձը, չարությունը, քանզի նա բացառիկ ազգ է»,-ընդգծում է Գուսան Հայկազունը: Հաճախակի լինելով կրթական հաստություններում նա փաստում է, որ հրաշալի սերունդ է մեծանում և գալու է ժամանակ, երբ ամեն ինչ պարզապես հրաշալի է լինելու: Բավական է միայն, երբ ազգի 5-6 տոկոսը ունենա ազգային մտածելակերպ, ազգն արդեն ծաղկում կապրի, իսկ հայ ազգը ունի ազգային մտածելակերպով այդ մարդկանց:

ԶՎԱՐԹ ԽԱՉԱՏՐՅԱՆ