«ԴԵՄ ԵՄ»-Ը` ՇԱՆԹ ՀԱՐՈՒԹՅՈՒՆՅԱՆԻ ՍՐԲԱԳՐՎԱԾ ՈՃՈՎ

«ԴԵՄ ԵՄ»-Ը` ՇԱՆԹ ՀԱՐՈՒԹՅՈՒՆՅԱՆԻ ՍՐԲԱԳՐՎԱԾ ՈՃՈՎ

Երեկ գիշեր մայրաքաղաքի Կենտրոն համայնքի անդորրը կրկին խաթարված էր, էլ չենք ասում երթեւեկության մասին: Դեռ նոր էին մարդիկ մոռացել Շանթ Հարությունյանի «խլապուշկեքով» ակցիան, հիմա էլ «Դեմ եմ» քաղաքացիական նախաձեռնությունն էր որոշել ոստիկանության պատմության գիրկն անցնել: Ինչեւէ Մաշտոցի պողոտա-Թումանյան խաչմերուկում փոքր-ինչ բախումից հետո, կարծես թե ակտիվիստները սթափվեցին, թեպետ ինչպես նրանցից ոմանք էին բղավում. «Սրանց մզացնելու ենք»: Ամեն դեպքում երթը շարունակվեց քաղաքակիրթ տարբերակով` դհոլ-զուռնով ու քոչարիով: Վերջիններս կրկին պահանջում էին իշխանություններից հանել «Պարտադիր կուտակային կենսաթոշակի» օրենքից «պարտադիր» բաղադրիչը: Սակայն, ուշագրավ էր այն, որ իբրեւ երկրի համար մտահոգ երիտասարդները լրիվ թքած ունեին այն մարդկանց վրա, ովքեր աշխատանքից հոգնած տուն էին գնում, բայց ստիպված եղան մի քանի ժամ անցկացնել խցանումների մեջ: Իսկ այս խժդժության պատճառը նորին մեծություն բարեւաբան «Ժառանգություն» կուսակցության նախագահ Րաֆֆի Հովհաննիսյանն է իր կուսակցությունով, ով մեկ ամսով «բրոնյա» է արել Ազատության հրապարակը, իբրեւ հանրահավաքներ անցկացնելու նպատակով, իսկ ակտիվիստները ստիպված էին փողոցեփողոց գոռալ ու ճչալ: Պետք է փաստել, որ երեկ երթին մասնակցող երիտասարդությունը, եթե ինչ-որ բանի դեմ չլիներ, այլ գործեր հանուն երկրի համար կարեւոր գաղափարի կամ կողմ լիներ իրենց իսկ պատկերացրած որեւէ օրենքի ու երեւույթի, թերեւս առավել նպատակային կլիներ նախաձեռնությունը, մինչդեռ արդեն իսկ «Դեմ եմ» լինելու գաղափարը մարդկանց ստիպում է ագրեսիա դրսեւորել ու մոռանալ, թե ինչի համար էին դեմ: Տպավորություն էր, որ պարզապես երիտասարդությունը պարելու ու զվարճանալու ցանկություն ուներ, իսկ այդ պահին պատրաստ էր ամեն ինչին դեմ լինել, անկախ բուն գաղափարից: Նշենք, որ երթը Օպերայից ձգվեց դեպի Մաշտոցի պողոտա, ապա Ամիրյան փողոց եւ Նալբանդյան փողոց:

ՀՐԱՆՏ ՍԱՐԱՖՅԱՆ