ՍԵԴԱ-ԱՄԻՐ ԿԱՐԱՅԱՆ. «ԵՐԲ ՍԻՐՈՒՄ ԵՍ ԱՐԱԺՇՏՈՒԹՅՈՒՆԸ, ՈՉԻՆՉ ՉԻ ԽԱՆԳԱՐՈՒՄ ԱՇԽԱՏԵԼ»

ՍԵԴԱ-ԱՄԻՐ ԿԱՐԱՅԱՆ. «ԵՐԲ ՍԻՐՈՒՄ ԵՍ ԱՐԱԺՇՏՈՒԹՅՈՒՆԸ, ՈՉԻՆՉ ՉԻ ԽԱՆԳԱՐՈՒՄ ԱՇԽԱՏԵԼ»

Ռոբերտ Ամիրխանյանի՝ Կամերային երաժշության տանը կայանալիք համերգի մասին «Իրավունքն» արդեն հասցրել է պատմել իր ընթերցողին: Համերգին մասնակցելու համար Գերմանիայից Երևան էր ժամանել երգչուհի ՍԵԴԱ-ԱՄԻՐ ԿԱՐԱՅԱՆԸ, ով, ի դեպ, Ռոբերտ Ամիրխանյանի աշակերտուհին է եղել. «Ամեն անգամ մեծ պատասխանատվություն է ինձ համար ելույթ ունենալ Ռոբերտ Ամիրխանյանի հետ: Մենք միասին աշխատում ենք արդեն 15 տարի՝ ուսումնական շրջանից սկսած: Դեռ սովորում էի մաեստրոյի մոտ, երբ առաջարկ ստացա նրանից հանդես գալ բեմում` իր հետ միասին: Այս ընթացքում մենք բազմաթիվ բեմելներ ենք ունեցել, ինչն ինձ համար շատ պատասխանատու է, բայց երբ սիրում ես երաժշտությունը, ոչինչ չի խանգարում աշխատել: Մեծ հաճույքով եմ կատարում Ամիրխանյանի ստեղծագործությունները և միշտ անհամբերությամբ եմ սպասում հաջորդ համերգներին»,-«Իրավունքի» հետ ունեցած զրույցում անկեղծացավ երգչուհին: Ըստ նրա 15 տարվա ընթացքում ունեցած համերգներից, այս մեկն առանձնանում էր նրանով, որ այն Ռոբերտ Ամիրխանյանի գրեթե առաջին վոկալ-սիմֆոնիկ ստեղծագործությունն է. «Մեր համերգները մշտապես եղել են կամերային ժանրի մեջ՝ դաշնամուր և ձայն, և նրա նվագակցությամբ ես երգել եմ իր երգերը: Սակայն, այստեղ այսօր ներկա էր մեծ երգչախումբ, իսկ կանտատի առաջին կատարումը նաև օրկեստրի մասնակցությամբ էր»,-հավելեց երգչուհին:

Նշենք, որ համերգային ծրագրում ընդգրկված էր Ռոբերտ Ամիրխանյանի ինչպես վերջին շրջանի, այնպես էլ` արդեն բոլորին հայտնի երգերը՝ «Տաղ անձնական» շարքից: Սակայն, հանդիսատեսն անհամբեր սպասում էր «Կանտանտ սիրո» ստղծագործության կատարմանը: Այն, ինչպես պարզվեց, պատվիրել էր գերմանական «Օրատորիում խոռ» երաժշտական հեղինակային կենտրոնը: Ուստի մեզ հետաքրքրեց, թե երաժշտության պատվիրված լինելը որևէ կերպ ազդո՞ւմ է ստեղծագործական գործընթացի վրա, որին ի պատասխան կոմպոզիտորն ասաց. «Բոլոր դեպքերում, եթե հեղինակը որևէ գործ է գրում, այն պատվեր է. Մի դեպքում պատվիրում է մեկ ուրիշ մարդ, մյուս դեպքում` ինքդ ես քո պատվիրատուն: Այնպես որ ոչինչ չի փոխվում»:

ՀԱՍՄԻԿ ՄԱՆՈՒԿՅԱՆ