ՙՄՈՎՍԻՍՅԱՆԻ ՋԱՆՔԵՐԸ ՉԵՆ ԳՆԱՀԱՏՎՈՒՄ

ՄՈՎՍԻՍՅԱՆԻ ՋԱՆՔԵՐԸ ՉԵՆ ԳՆԱՀԱՏՎՈՒՄ

Մոսկվայի ՙՍպարտակի՚ համար հիմա, մեղմ ասած, հեշտ ժամանակներ չեն: Թիմը 10 խաղում ընդամենը մեկ հաղթանակ է տարել, երկու անգամ էլ ոչ-ոքի է խաղացել:
Թեեւ Հայաստանի ազգային հավաքականի հարձակվող Յուրա Մովսիսյանն ամեն ինչ անում է թիմին ճգնաժամից դուրս բերելու համար, բայց հայ ֆուտբոլիստի ջանքերը մնում են չգնահատված` ՙՍպարտակի՚ երկրպագուների կողմից: Ռուսաստանի առաջնության 28-րդ տուրի արտագնա խաղում Մովսիսյանի թիմը 1-2 հաշվով պարտվեց ՙՏոմին՚: Ռուսական Sport-Express-ի գնահատմամբ` Մովսիսյանը արժանացել է 5.5 գնահատականին: Ռուսական կայքը մեկնաբանելով հայ ֆուտբոլիստի խաղը` գրել է. ՙՄովսիսյանի ակտիվությունը կանոնավոր կերպով ավարտվում է ոչ արդյունավետ դրիբլինգով եւ գնդակը պահելով:

Այս անգամ նույնպես բաց էր թողնում խաղը սրելու պահերը: Առաջին խաղակեսի` իր միակ պահը Մովսիսյանը չիրացրեց` երկու մետրից հարվածելով Չեբանուի վրա: Երկրորդ խաղակեսում թեեւ դարձավ գոլի հեղինակ, սակայն արդեն շատ ուշ էր: Ընդհանուր առմամբ, Մովսիսյանը մեղավոր էր նաեւ Դիկանի հեռացման մեջ, քանի որ անհաջող փոխանցումով կտրեց պաշտպանությունը՚:
Այս հանդիպման ավարտին Մովսիսյանն իր մարզաշապիկը նետել էր մոսկովյան թիմի երկրպագուներին, սակայն թիմի երկրպագուները հետ էին գցել հայ ֆուտբոլիստի մարզաշապիկը: Այդպիսով ցույց տալով, որ Մովսիսյանի այն ՙհաղորդագրությունը՚, թե ամեն բան լավ է, եւ դեռ ամեն ինչ կորած չէ, նրանց կողմից ընդունված չէ: Մոսկվայի ՙՍպարտակի՚ նախկին սեփականատեր Անդրեյ Չերվիչենկոն եւս անդրադարձել է այս հանդիպմանն ու մասնավորապես Յուրա Մովսիսյանին. ՙՙՍպարտակին՚ հարկավոր են արմատական փոփոխություններ, այլ ոչ թե անհասկանալի ու անկանխատեսելի լեգեոնականներ, ովքեր չեն համապատասխանում իրենց արժեքին: Մովսիսյանը նրանցից մեկը չէ, ում մասին ես խոսում եմ: Նա քչերից մեկն է, ով պայքարում է` փորձելով լինել օգտակար: Եթե հիշեք, թե ինչքան վճռորոշ գոլեր է խփել Յուրան, կհասկանաք, որ նրա բացակայության դեպքում ՙՍպարտակը՚ ՙՏոմի՚ հետ կպայքարեր Պրեմիեր լիգայում տեղը չկորցնելու համար: Յուրա Մովսիսյանը հազվադեպ բացառություն է ՙՍպարտակի՚ վերջին տրանսֆերներում՚,- Չերվիչենկոյի խոսքը մեջբերում է sovsport.ru-ն:

Մովսիսյանից հրաշքներ են սպասում, բայց ֆուտբոլը թիմային խաղ է, կիսափլուզված թիմում եւ ստեղծված նման պայմաններում առանց կախարդական փայտիկի հրաշքներ գործելն անհնար է:

ՔՐԻՍՏԻՆԵ ՊԵՏՐՈՍՅԱՆ