ՊԵՏՔ ՉԷ ՄԱՐԴԿԱՆՑ ՌԱԴԻՈՅՈՎ ԱՂԲ ՄԱՏՈՒՑԵԼ

ՊԵՏՔ ՉԷ ՄԱՐԴԿԱՆՑ ՌԱԴԻՈՅՈՎ ԱՂԲ ՄԱՏՈՒՑԵԼ

Այսօր ռադիոյի միջազգային օրվա կապակցությամբ, Հանրային ռադիոյի «Երեւան» ծրագրի ղեկավար ԳԱՅԱՆԵ ՄԱՐԿՈՍՅԱՆԸ,  ռադիո «Վան»-ի հաղորդավարներ ԺԱԿԸ եւ ԼՈՒՍԻՆԵ ԲԱԴԱԼՅԱՆԸ, ներկայացրեցին հայկական ռադիոյի զարգացման խնդիրներն ու հեռանկարները:

Ռադիոյի խնդիրների վերաբերյալ ԳԱՅԱՆԵ ՄԱՐԿՈՍՅԱՆԸ նշեց. «Խոստովանեմ, որ ժամանակին համընթաց, զարգացում է ապրում նաեւ ռադիոյի ոլորտը: Պետք է նշեմ, որ ինքս ռադիոյի տեսատարբերակին դեմ եմ, քանի որ հմայքը ձայնային էֆֆեկտն է: Չնայած, ներկայումս օգտագործվում են եւ ինտերնետը, եւ բջջային հավելվածները: Հարցականի տակ է լարային ռադիոյի գոյությունը, բայց պետք է նշեմ, որ այն ունի ունկնդիրներ մեծ թվաքանակ: Կցանկանայի, որ կառավարությունն այդ հարցում ավելի շահագրգիռ լիներ: Մոտ ժամանակներս ընդհատվել էր լարային ռադիոյի հեռարձակումը, սակայն այն վերականգնվեց եւ հույս ունեմ, որ կշարունակի իր գործունեությունը»:

Դե իսկ ԺԱԿՆ էլ շնորհավորելով իր գործընկերներին, նկատեց. «Իրականում որքան էլ ժամանակակաից ռադիոները փորձում են ավելի ակտուալ լինել, հանրային մնում է հանրային: Պետք է նշեմ, որ ռադիոն կարիք ունի տրանսֆորմացվելու: Այսօր սխալ տարբերակով են մարդիկ փորձում գումար վաստակել:  Գտնում եմ, որ պետությունը պետք է վերահսկի հեռարձակումները: Պետք չէ մարդկանց ռադիոյով աղբ մատուցել, սակայն այսօրվա դրությամբ երբեմն աղբը շատ ավելի լավ է վաճառվում: Պետք է մտածենք, որ մատուցված այդ որակի տակ մեծացող երեխաները ազգային ի՞նչ արժեք պետք է ունենան: Մեր իրականությունը հարսանիքային երգերով չէ, որ ապրում է»:

ԼՈՒՍԻՆԵ ԲԱԴԱԼՅԱՆՆ էլ հավելեց. «Ռադիոն երաժշտական ճաշակ եւ մտածելակերպ է ձեւավորում, եւ մենք մեր չափով ինչ կարող ենք, անում ենք, սակայն մեր աշխատելոճի մեծ մասը յուրացվում է:

Ինչ վերաբերվում է ժամանակակից տեխնոլոգիաներին, ապա կասեմ, որ այսօր ամեն ինչ տեղափոխվել է ինտերնետ տիրույթ: Այո, մենք պետք է նշենք, որ ռադիոյի լսրարանը նույն չէ, ինչ օրինակ՝ մի քանի տարի առաջ»:

ՍՈՍԵ ՉԱՆԴՈՅԱՆ