ՙ«Պ. ՖՈՄԵՆԿՈՅԻ ԱՐՎԵՍՏԱՆՈՑ» ԹԱՏՐՈՆՈՒՄ ՀԱՅ ԴԵՐԱՍԱՆՆԵՐ ԵՆ ԱՇԽԱՏՈՒՄ

«Պ. ՖՈՄԵՆԿՈՅԻ ԱՐՎԵՍՏԱՆՈՑ» ԹԱՏՐՈՆՈՒՄ ՀԱՅ ԴԵՐԱՍԱՆՆԵՐ ԵՆ ԱՇԽԱՏՈՒՄ

Մայիսի 5-9-ը Երեւանում հյուրախաղերի է Մոսկվայի «Պ. Ֆոմենկոյի արվեստանոց» թատրոնը: Հայաստանում թատրոնը շրջագայում է առաջին տիկին Ռիտա Սարգսյանի հովանու ներքո եւ ՀՀ մշակույթի նախարարության  աջակցությամբ, կազմակերպիչը եւ նախաձեռնողը Հայաստանի թատերական գործիչների միությունն է:

Գ. Սունդուկյանի անվան ազգային ակադեմիական թատրոնի բեմում երեկ եւ այսօր կցուցադրվի թատրոնի ամենահայտնի ներկայացումներից մեկը` Ա. Օստրովսկու «Գայլեր եւ ոչխարներ» պիեսը, իսկ Կ. Ստանիսլավսկու անվան ռուսական դրամատիկական թատրոնում` «Ռուս մարդը randez-vous-ին» ներկայացումը` Ի. Տուրգենեւի «Գարնանային ջրեր» վեպի հիման վրա: «Պ. Ֆոմենկոյի արվեստանոց» թատրոնի տնօրեն ԱՆԴՐԵՅ ՎՈՐՈԲՅՈՎՆ «Իրավունքի» հետ զրույցում ասաց, որ ուրախ է գտնվել Երեւանում: «Մեր թատրոնն անցյալ տարի նշեց իր հիմնադրման 20-ամյակը: Եվ այդ 20 տարիների ընթացքում քիչ չեն եղել նաեւ շրջագայությունները: Մեր թատրոնի ներկայացումները ցուցադրվել են աշխարհի տարբեր բեմահարթակներում: Սակայն պետք է ասեմ, որ մենք բավականին ծանր ենք մեկնում շրջագայությունների: Եթե մեկնում ենք, ապա` ամբողջ անձնակազմով, դեկորներով ու հագուստներով... Ցանկանում ենք օտար բեմում ներկայանալ այնպես, ինչպես ներկայանում ենք հարազատ բեմում, մի բան էլ ավելի լավ: Դա մեզ համար կարեւոր նախապայման է»,- ընդգծեց պարոն Վորոբյովը` հավելելով, որ թատրոնը նախորդ այցելությունից հետո սիրել է հայ հանդիսատեսին, գիտի, որ հայերը թատրոն սիրող ժողովուրդ են, ունեն ճաշակ, շատ ներկայացումներ են դիտում այլազգի դերասանների մասնակցությամբ եւ համեմատելու շատ բան ունեն` շնորհիվ ՀԹԳՄ նախագահ Հակոբ Ղազանչյանի, ով ջանք ու եռանդ չի խնայում այդ գործում:

Ա. Վորոբյովը նաեւ շեշտեց, որ «Պ. Ֆոմենկոյի արվեստանոց» թատրոնում պարբերաբար երեկոներ, ցուցահանդեսներ են կազմակերպվում հայ մշակութային գործիչների մասնակցությամբ: Ի դեպ, թատրոնում նաեւ հայ դերասաններ են աշխատում, նկատեց տնօրենը, որոնցից երկուսը Երեւանում են:  Իր իսկ խոսքերով` երկու անգամ հյուրախաղերով իրենց բեմում ներկայացել է Երեւանի պատանի հանդիսատեսի թատրոնը:   

«Իրավունքը» նաեւ հետաքրքվեց, թե ինչ հնարքների է դիմում թատրոնը` դասական գործերը յուրովի ներկայացնելու եւ հանդիսատեսի սրտերը հուզելու համար. «Պարզապես պետք է գտնել այն փոխհարաբերությունները, որոնք գոյություն ունեն հերոսների միջեւ եւ հնարավորինս ճշգրիտ տեղ հասցնել հանդիսատեսին` նուրբ եւ գեղեցիկ, առանց ավելորդ փնտրտուքների... Խոսքն այն փնտրտուքների մասին է, երբ փորձում են գտնել այն, ինչը գոյություն չունի եւ չի էլ կարող ունենալ: Իսկ ժամանակակից թատրոնն այսօր նման փնտրտուքների մեջ է: Ասենք, հեղինակի փոխարեն հորինելը... Ըստ իս, դա լավագույն ճանապարհը չէ` թատրոնի զարգացման գործում: Փորձում ենք ընտրել լավ գործ եւ դրա հիման վրա ստեղծել մարդկանց համար ընկալելի ներկայացում, որպեսզի այն օգնի մարդուն` գտնել այն հարցերի պատասխանները, որոնք տանջում են նրանց, պղտորում հոգիները: Եվ գուցե գտնելով այդ պատասխանները, մարդը զերծ մնա այն սխալներից, որոնք կարող է թույլ տալ: Իսկ այդ սխալները կարող են ճակատագրական լինել, փլուզել մարդու հոգին, ներաշխարհն ու կյանքը... Հենց դրա համար էլ գոյություն ունի թատրոնը»:

ՎԼԱԴ ՄՈՒՐԱԴՅԱՆ