ՙՇԱՆԹԸ՚ ՉԻ ԴԱՎԱՃԱՆՈՒՄ ԴԱՏԵՐԸ ՀԵՏԱՁԳԵԼՈՒ ԻՐ ՈՃԻՆ, ԹԵ ՙԲԱՐԴԱԿ՚ ԵՊՀ-ՈՒՄ

ՙՇԱՆԹԸ՚ ՉԻ ԴԱՎԱՃԱՆՈՒՄ ԴԱՏԵՐԸ ՀԵՏԱՁԳԵԼՈՒ ԻՐ ՈՃԻՆ, ԹԵ ՙԲԱՐԴԱԿ՚ ԵՊՀ-ՈՒՄ

Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում դատավոր Ռուբեն Բունիաթյանի նախագահությամբ ՙԻրավունք Մեդիա՚ ՍՊԸ-ն, Հայկ Բաբուխանյանը, Հովհաննես Գալաջյանն ընդդեմ ՙՇանթ՚ ՍՊԸ-ի` պատվի, արժանապատվության եւ գործարար համբավի պաշտպանության պահանջի մասին կայանալիք դատական նիստը հետաձգվեց:
Որպես հիշեցում նշենք, որ ՙՇանթ՚ հեռուստաընկերության կիրակնօրյա ՙՀորիզոնի՚ 2013թ. դեկտեմբերի 1-ի հաղորդման ընթացքում տրվեց 15 րոպեանոց պատվիրված անմակարդակ ռեպորտաժ, որն ուղղված էր ՙԻրավունք՚ թերթի, ՍԻՄ կուսակցության, ԱԺ պատգամավոր Հայկ Բաբուխանյանի, ՙԻրավունքի՚ խմբագիր Հովհաննես Գալաջյանի դեմ: Երեկվա դատական նիստը հետաձգվեց ՙՇանթ՚ ՍՊԸ-ի փաստաբան Վահագն Գրիգորյանի` դատարանին, մեր տեղեկություններով, դատից հինգ րոպե առաջ ներկայացրած միջնորդության պատճառով:

Ըստ որի, նա այսօր ճիշտ նույն ժամին ԵՊՀ-ում կայանալիք ասպիրանտական քննության է մասնակցում` գիտությունների թեկնածուի որակավորում ձեռք բերելու համար: Այն, որ ՙՇանթը՚ դատերը արհեստականորեն հետաձգելու սկզբունք է ձեռք բերել, այլ խոսքով` տեւական դատավարական տեռորի է ենթարկում ինչպես ՙԻրավունք՚ թերթին, այնպես էլ խոսքի ազատությանը, նորություն չէր: Սակայն, նորությունն այն էր, որ գիտությունների թեկնածուի որակավորում հայցող փաստաբանը, այլ քննություններ հանձնելուց առաջ պետք է որ քննություն տար էթիկայի կանոնների վերաբերյալ: Հակառակ դեպքում, պատշաճ կերպով եւ ժամանակին, ոչ թե դատից քիչ առաջ (որի մասին մեզ հետ զրույցում չհերքեց նաեւ Վ. Գրիգորյանը), կտեղեկացներ նիստի մասնակիցներին եւ դատարանին: Առավել եւս, որ ՙՔննության օրերի մասին, տեղեկացվում են առնվազն մեկ շաբաթ առաջ, հաստատ, ոչ մեկ օր կամ երկու օր առաջ՚,- մեզ հետ զրույցում ասաց ԵՊՀ լրատվական վարչության պատասխանատու Կարեն Գրիգորյանը:
Ինչեւէ, նշենք, որ մեր ունեցած տեղեկություններով` Վահագն Գրիգորյանի անունը գրված չէ ԵՊՀ-ում երեկ ՙԻնֆորմատիկա՚ առարկայից ասպիրանտական քննության մասնակիցների ցուցակում: Թե ինչով է դա պայմանավորված, եւ առհասարակ ներկա է եղել իրոք ՙՇանթի՚ ներկայացուցիչը այդ քննությանը, ԵՊՀ լրատվական վարչությունից խնդրեցին հարցերը գրավոր ուղարկել:
Իսկ մինչ այդ, թե ինչով է պայմանավորված փաստաբանի` դատից ընդամենը հինգ րոպե առաջ ներկայացրած միջնորդությունը, ՙՇանթի՚ ներկայացուցիչը հետեւյալ, համենայնդեպս տրամաբանությունից դուրս, պատասխանը տվեց.
- Երբ ես գրանցվեցի քննության համար, կար երեք հերթ` առավոտ, կեսօր եւ օրվա վերջ: Իմ գրանցվելուց հետո խնդիր էր առաջացել` վերջին օրով անունս, չգիտես ինչի, ջնջել էին: Ես նորից գրանցել տվեցի, այս անգամ արդեն ինձ վերջին հերթ գցեցին: Դա էր պատճառը, որ դատը սկսելուց առաջ բերեցի միջնորդությունը, այսինքն` ես նախապես չեմ իմացել, վերջին օրով եմ իմացել, որ ժամը 4-ին եմ քննության: Ավելի շուտ կարող էի միայն պարոն Բաղդասարյանին զգուշացնել, այն էլ` մտքովս չանցավ:
Մի խոսքով, ՙԻրավունքի՚ եւ ՙՇանթի՚ բազմասերիանոց դատավարության շուրջ սկսել են շատ տարօրինակ բաներ կատարվել` ԵՊՀ-ում ջնջում են անուններ, ՙՇանթի՚ փաստաբանի մտքով չի անցնում այն, ինչ կանցներ ցանկացած բարեկիրթ մարդու մտքով եւ այլն, եւ այլն: Իհարկե, մենք հասկանում ենք, որ այդքան պատահականություններ մի տեղում չեն լինում, եւ կարծես կռահում ենք, թե որտեղ է աղբյուրը, սակայն մի քիչ էլ սպասենք...

ԻԼՈՆԱ ԱԶԱՐՅԱՆ