Բնապահպանության նոր նախարարից բնապահպանների սպասելիքները մեծ չեն, ավելին, նրանք որևէ դրական փոփոխության հույս չունեն:

Այսօր լրագրողների հետ հանդիպմանը բնապահպան Ինգա Զարաֆյանը նկատեց, որ ավիրվում են ջրային ռեսուրսները և դրա վառ ապացույցը Արարատյան դաշտի աղետալի վիճակն է. «Դրան հասցրեց հասնել նախորդ կառավարությունը»:

Ինչ վերաբերում է նոր նախարարին, ապա ըստ Ինգա Զարաֆյանի, Արարատի նախկին մարզպետ Արամայիս Գրիգորյանը «զուտ բիզնես ոլորտի մարդ է»:

«Բիզնեսի շահերը պաշտպանող մարդ է, նա ոչ մի անգամ չի եղել այդ ոլորտի մասնագետ, ոչ տրամաբանական ոլորտից մարդիկ են բերել նախարարություն»,- ավելացրեց նա:

«Թեղուտի պաշտպանություն» քաղաքացիական նախաձեռնության անդամ Արթուր Գրիգորյանը ևս սպասելիքներ չունի նոր կառավարությունից. «Գնալով որակազրկվում է: Մենք հիմա պետք է ֆիքսենք խնդիրները, հիմնավորենք դրանք և ցույց տանք, թե որոնք են բնապահպանության նախարարի ֆունկցիաները»: