ՄԱՄՈՒԼԻ ՏԵՍՈՒԹՅՈՒՆ.ՀԱՅԿԱԿԱՆ ԺԱՄԱՆԱԿ

Արխիվ 12-16 1 Մայիս, 2014 16:15

ՄԱՄՈՒԼԻ ՏԵՍՈՒԹՅՈՒՆ

ՀԱՅԿԱԿԱՆ ԺԱՄԱՆԱԿ

թերթը նախորդ համարում անդրադարձել էր նորանշանակ նախարարների ունեցվածքին.

Ինչեր ունեն Արամայիս Գրիգորյանը, Հովհաննես Մանուկյանն ու Երվանդ Զախարյանը. հայտարարագրեր

3 Մայիսի, 2014 | 12:45

Օրերս նախարարի պորտֆել ստացած պաշտոնյանտիճան պաշտոնատար անձանց էթիկայի հանձնաժողովին ներկայացրած, պաշտոնի ստանձնման եւ տարեկան հայտարարագրերի համաձայն, Արարատի նախկին մարզպետ, բնապահպանության նորանշանակ նախարար Արամայիս Գրիգորյանը 2013 թ. հարկային տարվա սկզբում ունեցել է 810,6 միլիոն դրամ, իսկ տարեվերջին արդեն՝ 880,3 միլիոն: Գրիգորյանը հայտարարագրել է 300 հազար ռուբլի եւ 776 հազար դոլար: Մարզպետի պաշտոնը ստանձնելու ընթացքում, 2013թ. Գրիգորյանի տարեկան եկամուտները կազմել են 93,3 միլիոն դրամ, որից 40,2 միլիոնը՝ շահաբաժնից ստացված եկամուտ, 52,4 միլիոնը՝ այլ եկամուտներ, եւ ընդամենը 734 հազար դրամը՝ աշխատավարձ: Գրիգորյանը նախարարի պաշտոնը ստանձնելու հայտարարագրում ներկայացրել է 75 հազար դրամի չափով բաժնեմասեր տարբեր ընկերություններում: «Անշարժ գույք» բաժնում Արամայիս Գրիգորյանը հայտարարագրել է անհատական բնակելի տուն` հողամասի վրա կառուցված եւ իր տնտեսական շինություններով կառույց, 2 բնակարան՝ բազմաբնակարան շենքում, 1 բազմաբնակարան բնակելի շենք, բազմամյա տնկի, 1 հողամաս եւ հասարակական նշանակության 1 շինություն: Գրիգորյանը հայտարարագրել է նաեւ «Lexus LS 600 HL», «VAZ 2121», «Mitsubishi Pajero IO 2.0» եւ «ZIL MMZ-45021» մակնիշի ավտոմեքենաներ: Նախարարի կինը՝ Ալիսա Գրիգորյանը, հայտարարագրել է 300,6 միլիոն դրամ ունեցվածք եւ 43,5 միլիոն դրամ եկամուտ:

Հովհաննես Մանուկյանի հայտարարագիրը

Արդարադատության նախարար Հովհաննես Մանուկյանը հայտարարագրել է 7 միլիոն դրամ, 290 հազար եվրո եւ 490 հազար դոլար ունեցվածք: Նրա տարեկան եկամուտները կազմել են 26,1 միլիոն դրամ՝ վարձակալության դիմաց ստացված վճարից եւ 28 հազար դոլար աշխատավարձ: Նախարարի կնոջ՝ Արմինե Մանուկյանի հայտարարագրում լրացված է 150 հազար դրամ, 100 հազար եվրո եւ 170 հազար դոլար ունեցվածք: Տիկինը 15 միլիոն դրամի չափով էլ դրամական նվիրատվություն է ստացել:

Երվանդ Զախարյանի հայտարարագիրը

Էներգետիկայի եւ բնական պաշարների նախարար Երվանդ Զախարյանը, տարեկան հայտարարագրի համաձայն, 2013 թվականին 7,2 միլիոն դրամով «Lexus LS 460» մակնիշի ավտոմեքենա է գնել: Նա հայտարարագրել է 29,8 միլիոն դրամի ունեցվածք եւ 4,1 միլիոն դրամի աշխատավարձից ստացված եկամուտ (Զախարյանը, նախարար նշանակվելուց առաջ, 2009 թ.-ից անշարժ գույքի կադաստրի պետական կոմիտեի նախագահն էր): Նրա կինը՝ Զինա Զախարյանը, հայտարարագրել է 21 միլիոն դրամ ունեցվածք:

Առողջապահության նորանշանակ նախարար Արմեն Մուրադյանը հայտարարագիր չի ներկայացրել: