ԺԱՆ ԿԱԶԱՆՋՅԱՆ. «ՀՊԱՐՏ ԿԼԻՆԵՄ, ԵԹԵ ԿԱՐՈՂԱՆԱՄ ՆԱԵՎ ՀԱՅԱՍՏԱՆՈՒՄ ՆԿԱՐԵԼ»

ԺԱՆ ԿԱԶԱՆՋՅԱՆ. «ՀՊԱՐՏ ԿԼԻՆԵՄ, ԵԹԵ ԿԱՐՈՂԱՆԱՄ ՆԱԵՎ ՀԱՅԱՍՏԱՆՈՒՄ ՆԿԱՐԵԼ»

Երեկ  Հայաստանի Ազգային Պատկերասրահում բացվեց ֆրանսահայ հայտնի նկարիչ ԺԱՆ ԿԱԶԱՆՋՅԱՆԻ գործերի ցուցահանդեսը: Հատկանշական է, որ սա նկարչի առաջին ցուցահանդեսն էր հյարենիքում: Իսկ մինչ այս` Ժան Կազանջյանը ունեցել է ցուցահանդեսներ Փարիզում, Բեռլինում, Ժնևում, Նյու Յորքում և ոչ միայն:

Հայաստանում ցուցահանդես ունենալը նկարչի համար մեծ կարևորություն ուներ. Ըստ նրա, յուրաքանչյուր մարդու համար  կայուն  հիմք է հանդիսանում իր հողը: Ինչպես հենց ինքը` նկարիչն է նշում, այս  առաջարկին  ինքը  սպասում էր. «Առաջարկն ինձ համար սպասելի էր:Ես չափազանց խանդավառված եմ, որովհետև իմ մեծ ընտանիքի մեջ եմ, որն ինձ համար ամենագեղեցիկ բանն է, իսկ գեղեցկությունն  անսահման է»:

Իսկ իր նկարչական ուղղության մասին Ժան Կազանջյանն ասաց հետևյալը. «Ես միշտ հակում եմ ունեցել դեպի սյուրեալիզմը, այսօր էլ ներկայացված աշխատանքների մեջ կան այդ ուղղությանը պատկանող նկարներ»:

Ցուցադրված նկարներն իսկապես արվեստի գործեր էին, այդ գործերից յուրաքանչյուրը մի աշխարհ էր` խորը և հաճախ նույնիսկ անհասանելի: Ի տարբերություն նկարչի, ներկաները դժվարանում էին առանձնացնել որևէ նկար, որն իրենց առավել հարազատ էր. «Ինձ համար ամենահարազատ նկարը,-նշեց նկարիչը,- «Գիր, թե արծիվ»-ն է:Այս նկարի վրա բավականին երկար ժամանակ եմ աշխատել:Այն ներկայացնում է իմ մտքերը հայության մասին, իմ նպատակը:Ուզում եմ, որ մենք զվարթ լինենք, միշտ պարենք և այլևս չլացենք»:

«Pille ou face»` «Գիր, թե արծիվ» հսկայական եռանկարը բաղկացած է երեք մասից, իսկ միասին  դրանք ստեղծում են մեկ միասնություն:Այդ միասնությունը ներկայացնում է տիեզերքի մի մաս  իր չորս տարրերով`օդ, ջուր, հող և հուր: Պարողների արտացոլվող տեսիլքը մտածել է տալիս մարդկային արժեքների վաղանցիկության մասին:

Իր հայրենակիցներին միայն ուրախ և խաղաղ տեսնելու նկարչի ցանկությունն արտահայտվել է նրա վերը նշված նկարում: Սակայն մեզ` հայերիս համար ցավալի է, որ Ժան Կազանջյանն իր հայրենիքում ստեղծագործելու հնարավորություն դեռ չի ունեցել. «Ցավով պետք է նշեմ, որ հայրենիքում ստեղծագործելու հնարավորություն չեմ ունեցել: Շատ ուրախ և հպարտ կլինեմ, եթե ստացվի այնպես, որ կարողանամ նաև Հայաստանում նկարել»:

Ցուցահանդեսի բացմանը ներկա էին նաև նկարչի կինը, և նրա հարազատները Ֆրանսիայից:

Իսկ ցուցահանդեսը կգործի 2014թ. Մայիսի 2-ից 27-ը:

ՀԱՍՄԻԿ ՄԱՆՈՒԿՅԱՆ