ՀԱՅԱՍՏԱՆՈՒՄ ԳՈՅՈՒԹՅՈՒՆ Ո՞ՒՆԻ ՀԵՂԻՆԱԿԱՅԻՆ ԻՐԱՎՈՒՆՔ ԱՍՎԱԾԸ

ՀԱՅԱՍՏԱՆՈՒՄ ԳՈՅՈՒԹՅՈՒՆ Ո՞ՒՆԻ ՀԵՂԻՆԱԿԱՅԻՆ ԻՐԱՎՈՒՆՔ ԱՍՎԱԾԸ

Օրերս նշվեց հեղինակային իրավունքի միջազգային օրը: Հայաստանում այն կարծես այդքան էլ չհիշատակվեց, գուցեեւ հենց այն պատճառով, որ մեր երկրում այդքան էլ կայացած չէ հեղինակային իրավունքի ինստիտուտը:

Հեղինակային իրավունքների չպաշտպանված լինելու մասին հիմնականում բողոքում են երգիչ-երգչուհիներն ու երաժիշտները, որոնք էլ, վերջին շրջանում դադարել են բարձրաձայնել իրենց խախտված իրավունքների մասին:

«ԱՇԽԱՐՀՈՒՄ ՕՐ ՕՐԻ ԲԱՐԴԱՆՈՒՄ Է ՀԵՂԻՆԱԿԱՅԻՆ ԻՐԱՎՈՒՆՔԻ ՎԻՃԱԿԸ»

ԵՐԳԱՀԱՆ ԿԱՐԵՆ ԳՐԻԳՈՐՅԱՆ - Հեղինակային իրավունքներն են պատճառը, որ չեն արտադրվում ձայնասկավառակներ` հիմնակում այն վաճառքի դուրս չի գալիս, որովհետեւ, երգը թողարկվում է, միանգամից հայտնվում համացանցում ու վերջ, էլ ոչ ոք ցանկություն չունի ձայնասկավառակ գնելու: Պատկերացրեք, իմաստ էլ չկա արդեն: Գոնե դրսում համացանցում այդ հեղինակային իրավունքները պաշտպանված են. մարդը կարող է օնլայն տարբերակով գնել երգը: Իսկ Հայաստանում այն ընդհանրապես չի գործում, մարդիկ սովորել են, որ պետք է անվճար ներբեռնեն երգերը: Շատ քչերն են ուզում ունենալ ձայնասկավառակ, հիմնականում դա այն մարդիկ են, որոնց համար կարեւոր է ունենալ տվյալ արտիստի ձայնասկավառակը, կամ ավտոմեքենայում լսելու համար այդպես ավելի հարմար է: Իսկ ինչ վերաբերում է Հայաստանում հեղինակային իրավունքների պաշտպանված լինելուն, ապա նշեմ, որ մի քանի տարի առաջ ես խնդիր ունեցա եւ որեւէ պաշտպանություն չեմ ունեցել: Իհարկե, ոչ մի բանում չեմ մեղադրում Հայհեղինակին, որովհետեւ չեմ կարծում, որ այն այդպես հզոր կառույց է, որը կարող է պաշտպանել: Ինչ-որ առումով պաշտպանում է, բայց իմ դեպքում ոչ մ
ի բանով չպաշտպանեց: Այսինքն` զուտ խոսքեր էին, եւ տեսականորեն դրանից ոչինչ չփոխվեց: Ամեն դեպքում, դա մի քիչ բարդ է, ու միայն Հայհեղինակի եւ Հայաստանի խնդիրը չէ: Հիմա աշխարհում գնալով օր օրի բարդանում է հեղինակային իրավունքների վիճակը, քանի որ համացանցը գրավել է այդ ամբողջ բնագավառը, եւ մի քիչ դժվար է վերահսկման ենթարկել այդ ամբողջ վիճակը: Վստահ եմ, որ յուրաքանչյուր արտիստ` լինի` դրսի, թե` Հայաստանի, բախվել է այդ խնդրին: Երեւի թե, պետք չէ այդպես շատ ծանր դրան վերաբերվել, ուղղակի դա ուղիղ իմաստով մեր եկամուտներին է հարվածում:

«ՀԱՅԱՍՏԱՆՈՒՄ ՆՄԱՆ ՕՐԵՆՔ ԳՈՐԾՈՒՄ Է»

ԵՐԳԻՉ, ԵՐԳԱՀԱՆ ՏԻԳՐԱՆ ՊԵՏՐՈՍՅԱՆ - Իսկ Հայաստանում նման օրենք գործո՞ւմ է: Որ Հայհեղինակը գոյություն ունի, դա պարզ է, բայց հեղինակային իրավունքն ինչքանո՞վ է ընդհանրապես գործում Հայաստանում: Իմ երգերն այդպես շատ հեղինակություն չեն վայելում, ասենք` ենթադրենք, որքան ռաբիսը, դրա համար, ես այդ առումով մի քիչ ապահովված եմ: Իսկ ինչ վերաբերում է առհասարակ օրենքին, ինձ թվում է այն այդպես էլ չգործեց, եւ ո±ւր հասան` չգիտեմ: Ինչ-որ բաներ քննարկվում էր, առաջարկվում էր... Ես մի բան գիտեմ, ձայնասկավառակը, որպես այդպիսին, ընդհանրապես չի վաճառվում, որովհետեւ թողարկեցի, ու այն մնաց, վերջում նվիրել եմ մարդկանց: Այն ընդամենը այնքանով պետք եկավ, որ ծառայեց որպես այցեքարտ կամ նվեր, որպես բիզնես` ընդհանրապես չծառայեց իր նպատակին: Չնայած, որ ամբողջ աշխարհում այդպես չէ: Շուտով պատրաստ կլինի իմ 2-րդ ձայնասկավառակը, որը մտադիր չեմ որպես ձայնասկավառակ թողարկել: Երեւի թե, մոտ 100 օրինակ կտպեմ, որ նվիրեմ, երգը կլինի համացանցում: Կայքեր կան, որոնք պաշտպանված են, ունեն հստակեցված սիստեմ, որն աշխատում է ամբողջ աշխարհում, ամեն մի ներբեռնումից 99 ցենտ, որի մի մասը հեղինակներինն է, մի մասը կատարողինը: Ինձ թվում է` դա ամենաճիշտ տարբերակն է:

Ներկայացրեց ԼԻԼԻԹ ԵՂԻԱԶԱՐՅԱՆԸ