ՙՏԻԳՐԱՆ ՈՒՐԻԽԱՆՅԱՆԸ ՀՈՐԴՈՐՈՒՄ Է ՉՀԱՎԱՏԱԼ ԼՈՒՍԱՆԿԱՐՆԵՐԻՆ

ՏԻԳՐԱՆ ՈՒՐԻԽԱՆՅԱՆԸ ՀՈՐԴՈՐՈՒՄ Է ՉՀԱՎԱՏԱԼ ԼՈՒՍԱՆԿԱՐՆԵՐԻՆ

ԱԺ պատգամավորները սկսել են առեղծվածային հայտարարություններ անել` օրերս կայացած ԱԺ նախագահի ընտրությունների արդյունքի վերաբերյալ: Հիշեցնենք, որ ԱԺ նախագահի պաշտոնում առաջադրվել էին երկու թեկնածու` ԱԺ ՀՀԿ խմբակցության ղեկավար Գալուստ Սահակյանը եւ ինքնառաջադրված ԱԺ ՀԱԿ խմբակցության պատգամավոր, ՙԱզատություն՚ կուսակցության նախագահ Հրանտ Բագրատյանը: Արդյունքում ստացվել էր հետեւյալ պատկերը. 101 կողմ` հօգուտ արդեն նորընտիր ԱԺ նախագահ Գ.Սահակյանի, 3 կողմ` հօգուտ Հ. Բագրատյանի եւ քվեատուփում եղել են 2 անվավեր քվեաթերթիկ: Սակայն ԱԺ ՀԱԿ խմբակցության պատգամավոր Նիկոլ Փաշինյանը, ԱԺ ՙԺառանգություն՚ խմբակցության ՀՀՇ-աֆիկացված պատգամավոր Ալեքսանդր Արզումանյանը, ԱԺ ՀԱԿ խմբակցության պատգամավոր Հրանտ Բագրատյանն ու ԱԺ ԲՀԿ խմբակցության պատգամավոր Վահան Բաբայանը պնդում են, թե քվեարկել են Հ. Բագրատյանի օգտին: Թե այս դեպքում, եթե չասենք` ստում, ապա ով է փորձում այլակերպել իր քվեարկությունը ու, այնուամենայնիվ, չի քվեարկել ինքնաառաջադրված թեկնածուի օգտին, ՙԻրավունքը՚ փորձեց պարզել ԱԺ ԲՀԿ խմբակցության պատգամավոր, ԲՀԿ մամուլի պատասխանատու ՏԻԳՐԱՆ ՈՒՐԻԽԱՆՅԱՆԻ տեսակետը.
-Իսկ Ձեզ ով է ասել, որ Նիկոլ Փաշինյանը կողմ է քվեարկել:
- Բայց չէ որ նա սովորություն ունի իր քվեարկությունը ապացուցել լուսանկարած քվեաթերթիկի միջոցով:
- Այս անգամ նա չի լուսանկարել: Նախ` ես չգիտեմ` ինչու է մամուլը որոշել, թե նա լուսանկարել է, եւ երկրորդ` ամենեւին էլ կասկածի տակ չեմ դնում մեր գործընկերների քվեարկությունը, ի տարբերություն ոմանց, բայց լուսանկարել կարելի է մեկ բան, իսկ քվեատուփ կարելի է նետել այլ բան: Շեշտում եմ հատուկ, որ խոսքս չի վերաբերում Նիկոլ Փաշինյանին, բայց առհասարակ քվեարկության արդյունքների մասին խոսելիս` թող մտածեն բոլորը, թե ով խնդիր ունի Գալուստ Սահակյանի օգտին քվեարկելու, կամ ով խնդիր ունի չքվեարկելու, ով կարող է որեւէ բանով կաշկանդված լինել, ով կարող է կաշկանդված չլինել: Հետեւաբար, ինձ համար վիրավորական է թվում արդեն այն հարցը, որն ուղղված է ինձ կամ իմ մի շարք գործընկերներին` քվեարկության արդյունքների մասին, թե ինչպես են քվեարկել: Մեկը` ես արժանապատվությունիցս ցածր եմ համարում ընդհանրապես այդ թեմայի շուրջ խոսելը, քանի որ հարցը չի առաջացել հանրության մեջ: Իմ բոլոր կողմնակիցները շատ լավ գիտեն, թե ինչպիսին կարող է լինել եւ եղել է իմ քվեարկությունը: Եվ քվեարկությամբ չէ, որ պայմանավորվում է որեւէ բան, այլ գործողություններով, քաղաքական կուրսով, անելիքով, բացասական երեւույթների, թալանի, կոռուպցիայի, չարաշահումների, հակաժողովրդական որոշումների դեմ պայքարով եւ որպես այլընտրանք` պետականանպաստ, ժողովրդանպաստ որոշումներ կամ նախագծեր առաջադրելով: Եվ եթե ինչ-որ մեկը կարող է երաշխավորել, բացառապես Հանրապետական պատգամավորներից բաղկացած 7 հոգանոց խմբի, հաշվարկի եւ քվեաթերթիկները մշակելու ընթացքի ու արդյունքի բացարձակ անշեղում լինելը, ապա ես չեմ համաձայնի:
- Ի վերջո, ում եք հակված ավելի հավատալու` Ալեքսանդր Արզումանյանի±ն, թե± Վահան Բաբայանին:
- Հինգ քվեաթերթիկ է եղել, որոնք չեն հաշվարկվել հոգուտ Գալուստ Սահակյանի: Թե ինչպես են այն երկուսը դարձել անվավեր, եւ արդյոք ընդամենը այդ երկուսն են անվավեր դարձել, թե` ոչ, չգիտեմ: Անկեղծ ասած, ինձ շատ քիչ է հետաքրքրում, որովհետեւ ունեմ իմ պատկերացումները: Բայց ես վստահ եմ, որ Վահան Բաբայանը, ճիշտ այնպես, ինչպես եւ ես, քվեարկել է Գալուստ Սահակյանի դեմ:

ՀՐԱՆՏ ՍԱՐԱՖՅԱՆ
Հ.Գ.- Ի դեպ, նշենք, որ այս քվեարկությանը քվեաթերթիկը լուսանկարելու նիկոլփաշինյանական ավանդույթը փոխանցվել էր Ալ. Արզումանյանին: