ՄԱՄՈՒԼԻ ՏԵՍՈՒԹՅՈՒՆ.ՀԱՅԿԱԿԱՆ ԺԱՄԱՆԱԿ

ՄԱՄՈՒԼԻ ՏԵՍՈՒԹՅՈՒՆ

ՀԱՅԿԱԿԱՆ ԺԱՄԱՆԱԿ

թերթի նախորդ համարում անդրադարձել էին ՀՀ Նախագահի օգնական Ավետիս Բերբերյանի եկամուտներին. նախորդ տարի նա հայտարարագրել է 3 մլն. դոլար: Իսկ Բերբերյանի թոշակառու մայրը անցած տարի 100.000, իսկ կինը 150.000 դոլարի նվիրատվություններ են ստացել: Ավետիս Բերբերյանը նաեւ «Կայմ» հեռուստաընկերության տնօրենն է: Ավետիս Բերբերյանը պատասխանեց մի քանի հարցերի.

- Պարոն Բերբերյան,  ինչպե՞ս եք կուտակել 3 մլն. դոլար:

- Կարող եք բացել «Կայմ» հեռուստաընկերության հարկային մուծումները ու կտեսնեք, որ 2011 թ.-ին 1 միլիոն 429 հազար դոլար հարկ է վճարվել, 2010-ին՝ նույնքան: Այսինքն` հարկ վճարվում է շահութահարկի տեսքով ու այդ շահույթը չի թաքցվում:

- Ինչքա՞ն ժամանակում կուտակեցիք 3 մլն. դոլար:

- Մինչ 2011 թ.-ը՝ պաշտոնը ստանձնելը, ես 2005, 2006, 2007, 2008 թվականներին բավականաչափ եկամուտ ունեցել եմ, մինչ պաշտոն ստանձնելը ես հարուստ մարդ եմ եղել: Դուք պետք է ողջունեք, որ ես բարեկամների, հարազատների անունով գումարներ չեմ կուտակում:

- Ու՞մ նկատի ունեք:

- Որեւէ մեկին նկատի չունեմ: Առհասարակ նման երեւույթ կա:

- Ձեր կինը 150.000, իսկ մայրը 100.000 դոլար նվիրատվություններ են ստացել: Ումի՞ց են այդքան ճոխ նվիրատվություններ ստացել:

- Ես ինձանից եմ այդ գումարները փոխանցել մորս ու կնոջս: Նվիրատվությունը իմ կողմից է եղել:

- Նախագահի աշխատակազմում այլ մարդիկ կան, որոնց մայրերին կամ զավակներին նվիրատվություն է կատարվել մեծ չափի գումարներ: Սա ի՞նչ է նշանակում:

- Եթե ես ծնողիս փող եմ տալիս, ըստ այդ հայտարարագրի նորմերի, համարվում է նվիրատվություն իմ կողմից: Չեք կարող դա այլ կերպ ձեւակերպել:

- Ձեր եկամտի քանի՞ տոկոսն է կազմում աշխատավարձը որպես նախագահի օգնական:

- Ճիշտն ասած՝ ստույգ տվյալ տալը կդժվարանամ, չեմ հաշվել: