ԱԴՐԲԵՋԱՆԸ ԽՈՒՃԱՊԻ ՄԵՋ Է ԱՄՆ ՀԱՄԱՆԱԽԱԳԱՀ ՋԵՅՄՍ ՈՒՈՐԼԻՔԻ ՀԱՅՏԱՐԱՐՈՒԹՅՈՒՆՆԵՐԻՑ

ԱԴՐԲԵՋԱՆԸ ԽՈՒՃԱՊԻ ՄԵՋ Է ԱՄՆ ՀԱՄԱՆԱԽԱԳԱՀ ՋԵՅՄՍ ՈՒՈՐԼԻՔԻ ՀԱՅՏԱՐԱՐՈՒԹՅՈՒՆՆԵՐԻՑ

«Մեզ հայտնի է, որ ԵԱՀԿ Մինսկի խմբի ամերիկացի համանախագահ Ջեյմս Ուորլիքը նոր կապեր ունի ԱՄՆ հայ համայնքի հետ: Սոցկայքերի գրառումները նույնիսկ աչքի տակով անցկացնելով` հասկանալի է դառնում, որ ամերիկացի համանախագահը նախընտրում է ավելի շատ շփումներ ունենալ ԱՄՆ հայ համայնքի հետ»,-հայտարարել է ԼՂ հակամարտության կարգավորման հարցով Ադրբեջանի նախագահ Իլհամ Ալիևի հատուկ ներկայացուցիչ Արազ Ազիմովը:

Ազիմովի հայտարարության մեջ Ուորլիքը սուր քննադատության է ենթարկվում. «Պարոն Ուորլիքը իրեն թույլ է տալիս ազատ մեկնաբանել միջազգային իրավունքի նորմերը և սկզբունքները, որոնք ընկած են հակամարտության կարգավորման հիմքում: Ամերիկացի համանախագահի որոշ արտահայտություններ առահասարակ կրում են սադրիչ բնույթ: Իսկ առաջարկը, որով առաջարկվում էր քննարկել, թե ինչ օգուտ կարելի է քաղել Ուկրաինայում տիրող իրավիճակից Հայաստանի և Ադրբեջանի միջև հակամարտության կարգավորման համար, չի դիմանում քննադատության:

Այս ամենը թույլ է տալիս մեզ կոնկրետ ենթադրություններ անել ամերիկացի համանախագահի նպատակների և դիրքորոշման վերաբերյալ:

ԶԼՄ-ները հայտնում են, որ ամերիկացի համանախագահը պատրաստվում է այսօր ելույթ ունենալ հայկական համայնքի կողմից կազմակերպված «Ճանապարհ դեպի առաջ և  ինքնորոշում Լեռնային Ղարաբաղի Հանրապետության համար» թեմայով միջոցառման ժամանակ: Այս միջոցառմանը մասնակցելն արդեն ինքնին անթույլատրելի է միջնորդի համար»:

Հայտարարության վերջում Ազիմովը ասել է. «Վերնշյալ փաստերը թույլ են տալիս ադրբեջանական կողմին Մինսկի խմբի ամերիկացի համանախագահին անվստահություն հայտնելու և նրա հետ աշխատելուց հրաժարվելու համար: Մենք դիմում ենք ԵԱՀԿ գործող նախագահին` պահանջելով ետ  կանչել Ջեյմս Ուորլիքին համանախագահությունից: Ջ. Ուորլիքը այլ ընտրություն չթողեց մեզ»: