«ԵՐԵՔ ՔՈՒՅՐԵՐԸ» ՄՆԱԼՈՎ ԿԵՐՊԱՐԻ ՄԵՋ` ՉԴԻՄԱՑԱՆ ՔՆՆԱԴԱՏՈՒԹՅԱՆԸ

«ԵՐԵՔ ՔՈՒՅՐԵՐԸ»  ՄՆԱԼՈՎ ԿԵՐՊԱՐԻ ՄԵՋ` ՉԴԻՄԱՑԱՆ ՔՆՆԱԴԱՏՈՒԹՅԱՆԸ

«Թատրոն X» հանրապետական փառատոնի շրջանակներում օրերս «Համազգային» թատրոնի բեմում տեղի ունեցավ Ա. Չեխովի «Երեք քույր» պիեսի բեմականացումը` Տաթեւ Մխիթարյանի եւ Նանե Հովսեփյանի մեկնաբանությամբ: Նրանք նաեւ 3 քույրերից 2-ի դերակատարներն էին: Դերակատարներ, ովքեր այնքան էին ապրում դերով ու ձուլվել էին կերպարին, որ այդպես էլ չկարողացան դերից դուրս գալ, թողնել աստղային փառքն ու տարերքը, որին, անկեղծ ասած, չենք էլ պատկերացնում, թե երբ են հասցրել արժանանալ այս «արվեստագետները», համենայնդեպս այդպես էին անվանում իրենք իրենց: Մեղքը երեւի արդեն կայացած այն մասնագետներինն Էր, ներկայացման ավարտից հետո, քննարկման ժամանակ, գովերգում էին մարդու, «արվեստագետի» այդ տեսակին:

Եվ, մինչ աղջիկները հիացական հայացքներով ու դեմքներին մեծամտական արտահայտությամբ սպասում էին հաջորդ` իրենց մեծարող կարծիքին, տեղի ունեցավ հակառակն ու անսպասելին… Երաժշտագետ ՆԵԼԻ ԱՎԵՏԻՍՅԱՆԻ քննադատական խոսքը խոցեց աղջիկներին. «Կողմնակից չեմ այն պիեսներին, որոնք շեղվում են իսկական գեղարվեստական ստեղծագործությունից: Շատ ժամանակակից տեսքով աչոնիկներ եք, ինչո՞ւ չխաղաք «Երեք քույր», չէ որ մենք էլ դեպ Մոսկվա ու դեպ ԱՄՆ ենք գնում: Եթե այն, ինչ դուք արեցիք, Չեխով եք անվանում, ուրեմն ես ձեզ շնորհավորում եմ, որովհետեւ սա նոր Չեխով էր, Չեխովի հետ կապ չունեցող Չեխով: Մի դիտարկում եւս. եթե բեմադրության մեջ օգտագործում եք երաժշտություն, ապա այն պետք է տիպիկ լինի ներկայացմանը: Չհասկացա նաեւ ձեր ոտաբոբիկ լինելու ասելիքը` միգուցե դա էսթետիկա՞ է, գեղագիտությո՞ւն, թեթեւությո՞ւն: Հարցեր, որոնք կարելի է տալ, բայց…»:
Աղջիկները, սովոր չլինելով քննադատական խոսքի, անկարելի է ասել, թե ինչպես արձագանքեցին եւ թե ինչ անկեղծ պոռթկմամբ «քույրերից» երրորդը խոստովանեց, որ սա իր առաջին քննադատությունն էր, բայց արվեստագետի համար դա էլ իհարկե անհրաժեշտություն է: Եվ մինչ «Երեք քույր» ներկայացնող 3 «արվեստագետները» հեգնական ու անհարգալից վերաբերմունքով փորձում էին պատասխանել հնչած կարծիքներին` իհարկե միայն բացասականներին, մեկ տասնյակից ավելի հանդիսականներ արագ քայլով դուրս եկան` այդկերպ հայտնելով իրենց ընդվզումն աղջիկների պահվածքի ու հնչած կարծիքների հանդեպ անհարգալից վերաբերմունքի հանդեպ:
Նշենք, որ հանդիսատեսի այս խմբի դուրս գալուց հետո` աղջիկներին դասավանդող դասախոս, Թատրոնի եւ կինոյի ինստիտուտի պրոֆեսոր Վահե Շահվերդյանն անդրադարձավ նրանց պահվածքին, ասելով, որ ինքը լիովին ողջունում է այն, ինչ արվում է բեմում, ներկայացման ժամանակ, բայց ոչ այն, ինչ իրենք արեցին ներկայացումից դուրս:

Կույտը մշակեց ԷԹԵՐԻ ՄԱՄՈՒԼՅԱՆԸ