Վ. ՇԱՀՎԵՐԴՅԱՆ. «ՄԱՐԴԻԿ ԿԱՆ, ՈՐ ՏՆՕՐԵՆԻ ԱԹՈՌԻ ՎՐԱ ԱՉՔ ՈՒՆԵՆ»

Վ. ՇԱՀՎԵՐԴՅԱՆ. «ՄԱՐԴԻԿ ԿԱՆ, ՈՐ ՏՆՕՐԵՆԻ ԱԹՈՌԻ ՎՐԱ ԱՉՔ ՈՒՆԵՆ»

Ամիսներ առաջ Վանաձորի Աբելյանի անվան պետական դրամատիկական 80-ամյա թատրոնի աշխատակիցների սեռական շեղումների մասին ծագած խոսակցություններն ու հրապարակումները երկար ժամանակ մնացին հայկական լրատվամիջոցների կիզակետում:

Ըստ հրապարակումների` այդ թատրոնում աշխատող 10 տղամարդուց 7-ը միասեռական է: Աշխատակիցներից ոմանք սկսեցին դա բարձրաձայնել միայն այն ժամանակ, երբ թատրոնի տնօրենը աշխատանքից ազատեց նկարիչ բեմադրող Հովսեփ Մեսրոպյանին: Այդ ընթացքում թեմայի մասին ով ասես` խոսեց, նույնիսկ` ոլորտի ու թեմայի հետ առնչություն չունեցողը, բացի թատրոնի գեղարվեստական ղեկավար ՎԱՀԵ ՇԱՀՎԵՐԴՅԱՆԻՑ: Այդ ընթացքում Վ. Շահվերդյանը գտնվում էր ԱՄՆ-ում: Սակայն, «Իրավունքը» վերադարձից հետո խոսելով թատրոնի գեղարվեստական ղեկավարի հետ, պարզեց.
- Այդ խոսակցությունները մեկ սկսվում են, մեկ` մարում, որովհետեւ որեւէ հիմք չունեն: Պարզապես աշխատանքով պետք է զբաղվել: Կոնֆլիկտ կար թատրոնի նկարիչի եւ տնօրենի միջեւ, լուծվեց: Կարծում եմ` այն տարբերակը, որով լուծվել է այս խնդիրը, այսինքն` նկարիչը հեռացել է թատրոնից, ճիշտ է, որովհետեւ մթնոլորտը խաղաղվել է, հանգիստ է, չնայած, դրսում թեթեւ խոսակցություններ գնում են: Հիմա թատրոնը հետաքրքիր աշխատում է, ինչպես միշտ: Մոտ օրերս էլ երկու նոր ներկայացումների պրեմիերաներ կլինեն: Իսկ ամենակարեւորը` թատրոնն աշնանը պատրաստվում է հյուրախաղերի: Պիտի մեկնենք Թբիլիսի:
- Պարոն Շահվերդյան, նման խոսակցությունները հաճախակի են լինում Վանաձորի թատրոնի մասին:
- Այո, լինում է, հետո մարում է, հետո նորից է գլուխ բարձրացնում...
- Իսկ ի՞նչն է պատճառը:
- Որովհետեւ այնտեղ մարդիկ կան, որ տնօրենի աթոռի վրա աչք ունեն: Բայց դե, դրանք, փառք Աստծո, 2-3 հոգի են:

ԼԻԼԻԹ ԵՂԻԱԶԱՐՅԱՆ