ԼՔՎԱԾ ԿՆՈՋԻՑ ՄԻՆՉԵՎ ՉԿԱՅԱՑԱԾ ՏՂԱՄԱՐԴ` «ԱՐՄՄՈՆՈՅՈՒՄ»

ԼՔՎԱԾ ԿՆՈՋԻՑ ՄԻՆՉԵՎ ՉԿԱՅԱՑԱԾ ՏՂԱՄԱՐԴ` «ԱՐՄՄՈՆՈՅՈՒՄ»

Օրերս «Արմմոնո» միջազգային թատերական 12-րդ փառատոնի մեկնարկը տրվեց Բրիտանիայից ժամանած հանրահայտ դերասան Փեթար Միլուշեւսկու` Beautifull («Գեղեցիկը») մոնոներկայացմամբ: Հենց դերասանի գրած տեքստի հիման վրա ստեղծված ներկայացումը խիստ վիզուալ ու ֆիզիկական, պոստ-մոդերնիստական ու պոստ-Բրեխտյան թատրոնից վերցրած մի հատված է, որը ժամանակակից վերաբերմունք է գեղեցկության հանդեպ` փոխաբերական ու սիմվոլիկ եղանակով: «Գեղեցիկը» միայնակ, բազմաչափ կերպար է, որը մեկ վախ է սփռում, մեկ մելանխոլիկ է, բայց չի հիասթափվում: Եվ այս մոնոներկայացմամբ դերասանը կարծես հանդիսատեսին հարց է ուղղում` իսկ ինչն է ստիպում  անձին փոփոխվել ու դառնալ ավելի գեղեցիկ:

ԲՐԻՏԱՆԱԿԱՆ «ԳԵՂԵՑԻԿԸ» ՀԵՇՏ ՉԸՆԿԱԼՎԵՑ
ՀԱՅ ՀԱՆԴԻՍԱՏԵՍԻ ԿՈՂՄԻՑ

Հայ հանդիսատեսը կարծես այնքան էլ հեշտ չընկալեց բրիտանական գեղեցկության յուրատեսակ մեկնաբանությունը: Միեւնույն ժամանակ կարող ենք նշել մեկ կարեւոր փաստ. բրիտանացի դերասանը մարմնի այնպիսի պլաստիկա ցույց տվեց բեմում, որ դժվար թե հայաստանյան մեծ մասամբ կլորիկ որովայնով տղամարդ դերասանները կկարողանային նման ճկունություն ու խաղ ցուցադրել: Բայց, այդուհանդերձ, Փեթարի հերոսը կարծես մարտյան եղանակ լիներ, սա իհարկե, փոխաբերական իմաստով. մեկ լալիս էր, մեկ ժպտում, մեկ էլ հանկարծ իրեն պատեպատ տալիս` փորձելով գտնել գեղեցիկի սահմանը: Ի դեպ, ՓԵԹԱՐ ՄԻԼՈՒՇԵՎՍԿԻՆ լրագրողների հետ զրույցում նշեց, թե երջանիկ է, որ բավականին սարսափելի թռիչքից հետո վերջապես ժամանել է Երեւան. «Երեկ բավականին լավ օր անցկացրի: Երեւանում շատ հրաշալի եղանակ էր: Իսկապես հրաշալի մթնոլորտ է, ինձ այստեղ դուր է գալիս»: Բրիտանացի դերասանը օգտվելով առիթից, որ Երեւանում է, որոշել է ուսումնասիրել տեղի մշակութային օջախները. «Արդեն մեկ շաբաթվա համար ցուցակ ունեմ, թե որ թանգարանները եւ որ ցուցահանդեսները պետք է այցելեմ»:

«ԿՅԱՆՔԸ ՄԻԱՅՆ ՔԱՂՑՐԱՎԵՆԻՔ ՈՒ ԾԱՂԻԿՆԵՐ ՉԷ»

Հ. Պարոնյանի անվան երաժշտական կոմեդիայի թատրոնի դերասանուհի ԶԱՐՈՒՀԻ ԽԱՉԱՏՐՅԱՆՆ այս անգամ «Արմմոնոյի» շրջանակներում հանդես եկավ Կարինե Խոդիկյանի «Խարույկ գիշերին» պիեսով` Աշոտ Հակոբյանի բեմադրությամբ: Ի դեպ, այդ նույն պիեսը հայ հանդիսատեսին հայտնի է դերասանուհի Կարինե Ջանջուղազյանի խաղով` «Լույսը կբացվի» վերնագրով: Սակայն, ինչպես «Իրավունքի» հետ զրույցում նշեց դերասանուհին, ո՛չ ինքը, ո՛չ էլ ներկայացման բեմադրիչ Ա. Հակոբյանը ներկայացումը չեն դիտել Կ. Ջանջուղազյանի խաղով. «Ոչ, ցավոք չեմ նայել: Լսել եմ, որ շատ հետաքրքիր ներկայացում է, հետաքրքիր բեմադրություն, լավ խաղ: Եվ պիտի ասեմ, որ Կարինեն հրաշալի դերասանուհի է չեմ կասկածում դրանում: Ա. Հակոբյանը` ռեժիսորը, նույնպես չի տեսել այդ ներկայացումը: Ինչպես մոտեցել է ռեժիսորը, միանշանակ իր հետ համակարծիք եմ եղել, եւ ստեղծվել է այսպիսի ներկայացում: Առաջին հերթին պիտի շնորհակալություն հայտնեմ Կարինե Խոդիկյանից, որ այսպիսի հրաշալի պիես է գրել: Գիտեք, կնոջ խնդիրը կին դրամատուրգն ավելի հետաքրքիր եւ շատ ավելի նուրբ գծերով եւ շերտերով է ներկայացնում, այստեղ նույնպես շերտերը շատ հարուստ էին»:
Ինչպես Զ. Խաչատրյանին հաջողվեց մեկ ժամ հանդիսականին պահել դահլիճում, դերասանուհին շեշտեց. «Ճիշտ ռեժիսորի ու դերասանի աշխատանքը շատ արդյունավետ է լինում,- եւ հավելեց,- միշտ ասել եմ, որ լավ պիեսում լավ խաղընկերոջ աչքերի հետ ոչինչ չեմ փոխի, սակայն կյանքում լինում են նաեւ այնպիսի իրավիճակներ, որ պետք է բեմում մենակ ներկայանաս: Իսկ կնոջ, կին-տղամարդ հարաբերությունների թեման կարծում եմ հավերժական է: Կյանքի ամեն էտապում կինը կարող է նոր արտահայտչամիջոցներ գտնել: Կյանքը միայն ծաղիկներ ու քաղցրավենիք չէ, կյանքում կա նաեւ դառը, կծու, թթու պահեր եւ կյանքը դրանով է  հետաքրքիր, գեղեցիկ, երբ գույներն ավելի շատ են»:

ՌՈԲԵՐՏ ՀԱԿՈԲՅԱՆԻ ՉԿԱՅԱՑԱԾ ՎԻՐԱԲՈՒՅԺՆ
ՈՒ ԻՐ ԲԱՐԴՈՒՅԹՆԵՐԸ
ՙ
«Արմմոնոն» արդեն չես պատկերացնում առանց Կ. Ստանիսլավսկու անվան ռուսական դրամատիկական թատրոնի դերասան ՌՈԲԵՐՏ ՀԱԿՈԲՅԱՆԻ, քանի որ վերջին տարիներին դերասանն ամեն անգամ ներկայանում է նոր մոնոներկայացումով` իր իսկ բեմադրությամբ: Եթե նախորդ անգամ դերասանն արծարծում էր Ցեղասպանության թեման, ապա այս տարի մասնակցեց «Զրույց գիշերին» ներկայացմամբ, որը պատմում է վիրաբույժի, միայնակ ու ամուսնալուծված մի տղամարդու կյանքի մասին. «Չկայացած մարդ, ով ժամանակին եղել է հիանալի վիրաբույժ, ամուսին, սակայն ի վերջո չկայացած ամուսին ու մարդ է դառնում, իսկ չկայացած ու թույլ մարդիկ միշտ իրենց մեղքը ուզում են բարդել ուրիշի վրա: Այս դեպքում նրա մտքին կար, որ այդ ամենը բարդի կնոջ վրա, բայց...»:
Ըստ Ռ. Հակոբյանի` իր յուրաքանչյուր ներկայացում ունի կոնցեպցիա, ասելիք. «Միանման ներկայացում բեմադրելը հետաքրքիր չէ առաջին հերթին ինձ եւ իմ գործընկերների համար: Իմ բոլոր ներկայացումները բեմադրում եմ ինքս: Ի դեպ, մտադիր եմ արդեն Ցեղասպանության թեման արծարծող «Ձեզ եմ դիմում պարոնայք» ներկայացումը թարգմանել եւ հայերենով խաղալ»: Իսկ թե ինչ ճակատագիր կունենա «Զրույց գիշերին» ներկայացումը, Ռ. Հակոբյանը դժվարացավ պատասխանել, նշելով, որ եթե լինեն հրավերներ, ապա սիրով կմեկնի հյուրախաղերի: Չնայած դեռ ոչ մի արձագանք չի ստացել ներկայացման վերաբերյալ, բայց հույս հայտնեց, որ հանդիսատեսը հավանած կլինի. «Գուցե մարդիկ լինեն, որ չհավանեն, դա էլ է վերաբերմունք ու մոտեցում, կարեւորը, որ անտարբեր չլինեն, մնացածը նորմալ է»:

ԼԻԼԻԹ ԵՂԻԱԶԱՐՅԱՆ
ՀՐԱՆՏ ՍԱՐԱՖՅԱՆ