ՙՙԺԱՌԱՆԳՈՒԹՅՈՒՆԸ՚ ԱԼԻԿ ԱՐԶՈՒՄԱՆՅԱՆԻ ՎՐԱ ՉԻ ԿԱՐՈՂ ԱԶԴԵԼ

ՙԺԱՌԱՆԳՈՒԹՅՈՒՆԸ՚ ԱԼԻԿ ԱՐԶՈՒՄԱՆՅԱՆԻ ՎՐԱ ՉԻ ԿԱՐՈՂ ԱԶԴԵԼ

ԱԺ որոշ խմբակցությունների որոշումներ կամ դիրքորոշումներ առ ոչինչ են դարձել, քանի որ խմբակցության պատգամավորները վարվում են այնպես, ինչպես իրենց սիրտն է թելադրում ու ոչ մի կերպ չեն տեղավորվում սեփական խմբակցության հարթակում: ՀԱԿ-ին վաղուց բանի տեղ չեն դնում ԱԺ ՀԱԿ խմբակցության պատգամավորներ Հրանտ Բագրատյանն ու Նիկոլ Փաշինյանը, իսկ ՙԺառանգությունում՚ անտանելի է դառնում ՙԱզատ դեմոկրատի՚ անցյալով նորաթուխ-հին ՀՀՇ-ական Ալեքսանդր Արզումանյանի ներկայությունը: Այս եւ ԱԺ ՙԺառանգություն՚ խմբակցության ղեկավար Ռուբեն Հակոբյանի` որպես ԱԺ նախագահի թեկնածու առաջադրվելու, ապա ինքնաբացարկ հայտարարելու մասին ՙԻրավունքը՚ զրուցեց ԱԺ ՙԺառանգություն՚ խմբակցության պատգամավոր ԹԵՎԱՆ ՊՈՂՈՍՅԱՆԻ հետ:
-Պարոն Պողոսյան, ՙԺառանգություն՚ խմբակցությունում քննարկվել եւ ԱԺ նախագահի թեկնածու էր առաջադրվել Ռուբեն Հակոբյանը, իսկ քննարկվե±լ էր նաեւ նրա ինքնաբացարկի հարցը:
- Ոչ, արդեն Ռուբեն Հակոբյանն ասել է, որ ընդամենը քննարկել էինք, որ պետք է առաջադրվեր:
- Իսկ խմբակցության քննարկմանը մասնակցո±ւմ էր Ալեքսանդր Արզումանյանը:
- Ոչ, ինչն է խնդիրը:
- Այն, որ թեպետ կար խմբակցության որոշում` ԱԺ նախագահի ընտրությանը չմասնակցելու, բայց Ալ. Արզումանյանը, այնուամենայնիվ, մասնակցեց:
- Իր որոշումն է: Ամեն պատգամավոր ազատ է եւ կաշկանդված չէ, այլ կաշկանդված է միայն իր ներքին զգացումներով:
- Բայց չէ որ եղել էր խմբակցության հստակ որոշում:
- Եղել էր, դե հիմա... նա էլ այդպես վարվեց, խմբակցության որոշումն էլ հասկացել է` ի գիտություն: Նման խնդիր ՀԱԿ-ում էլ կար, ասում էին` չենք մասնակցելու, բայց իրենց խմբակցությունից մարդիկ մասնակցեցին ընտրությանը: Դաշնակցությունն էլ միշտ իր կարգապահությամբ է յուրահատուկ եղել, ասացին չենք մասնակցելու ու չմասնակցեցին: Իսկ ՙԲարգավաճ Հայաստանը՚, չնայած բոլորը խոսում էին, որ չեն մասնակցելու, բայց որոշեցին ազատ լինել, քանի որ հասկացան, որ եթե հայտարարեն, թե չենք մասնակցելու, ապա միգուցե լինեն պատգամավորներ, որ գնան եւ քվեարկեն:
- Ամեն դեպքում, հատկապես, որ չէր քննարկվել խմբակցությունում, արդյոք վիրավորական չէր Ձեզ համար այն, որ Ռ. Հակոբյանի մասին Ձեր ելույթից, խմբակցության որոշումից հետո, պարոն Հակոբյանը հայտարարեց, թե հանում է իր առաջադրումը:
- Մարդը ինքն է որոշում, չես կարող պարտադրել: Պարոն Հակոբյանը նաեւ բացատրեց, թե ինչու է իր թեկնածությունը հանում: Նա փորձեց համախմբել քառյակին, որպեսզի իրար հետ միասին դուրս գային ստեղծված խնդրից: Ամեն դեպքում, հատուկ ցավալի բան չեմ տեսնում:

ՀՐԱՆՏ ՍԱՐԱՖՅԱՆ