Մ. ՄԽԻԹԱՐՅԱՆ. «ԵԹԵ ԿԱՆ ՏԱՐԲԵՐ ԿԱՐԾԻՔՆԵՐ, ՆՇԱՆԱԿՈՒՄ Է ՓԱՌԱՏՈՆԸ ԿԱՅԱՑԱՎ»

Մ. ՄԽԻԹԱՐՅԱՆ. «ԵԹԵ ԿԱՆ ՏԱՐԲԵՐ ԿԱՐԾԻՔՆԵՐ,

ՆՇԱՆԱԿՈՒՄ Է ՓԱՌԱՏՈՆԸ ԿԱՅԱՑԱՎ»

Երեկ ավարտվեց «Արմմոնո» մոնոներկայացումների միջազգային 12-րդ փառատոնը: Այսօր «ազդակ» լրագրողական ակումբում, ամփոփելով արդյունքները փառատոնի տնօրեն ՄԱՐԻԱՆՆԱ ՄԽԻԹԱՐՅԱՆԸ գոհունակություն հայտնելով նշեց. «Եթե կան տարբեր կարծիքներ այս կամ այն ներկայացման վերաբերյալ` նշանակում է` փառատոնը կայացավ: Մեր դերասանները ստացան հրավերներ այլ փառատոներից, բայց այդ մասին կտեղեկացնենք, երբ պաշտոնական հրավերը կլինի ձեռքներիս: Հուսանք, որ այն, ինչ ծրագրել ենք, կկայանա»,- ասաց Մ. Մխիթարյանն ու հավաստիացրեց, որ այս տարի նույնպես հանդիսատես-դերասան երկխոսությունը կայացավ:

Մ. Մխիթարյանը նաեւ հավելեց, որ  տարվա ընթացքում տեղի կունենան մի շարք մոնոներկայացումների պրեմիերաներ, որոնց կաջակցի «Արմմոնո» փառատոնը:

Լիտվացի բեմադրիչ ՍԱՈՒԼԻՍ ՎԱՌՆԱՍԸ, լրագրողների հետ ունեցած հանդիպմանը, շնորհավորելովփառատոնի հաջողությունների համար, հավելեց. «Այնքան էլ հեշտ չէ նման փառատոն կազմակերպելը, քանի որ մոնոներկայացում բեմադրելն ինքնին դժվար է: Այս փառատոնի միջոցով, կարծես, պատուհան բացեք դեպի մյուս փառատոներ: Թատրոնը  թարգմանության կարիք չունի, այն սկսվում  է այնտեղից,  որտեղ վերջանում է բառի սահմանը»,- ասաց լիտվացի բեմադրիչն ու հավելեց. «Հատկանշական է, որ տարբեր երկրներից Հայաստան էին եկել տարբեր թատերախմբեր, և այսքան շատ դերասաններ կային Հայաստանից: Փառատոնում շատ ներկայացումներ կային, մանավանդ ` Հայաստանից, որոնցից շատերը կներկայացվեն նաև արտասահմանում: Սա կարծես պատուհան է դեպի այլ փառատոներ»:

ԼԻԼԻԹ ԵՂԻԱԶԱՐՅԱՆ