ԿԱՄԵՐԱՅԻՆ ԹԱՏՐՈՆՈՒՄ ԿԱՅԱՑԱՎ ՀՈՒՇ-ԵՐԵԿՈ՝ ՆՎԻՐՎԱԾ ՆԿԱՐԻՉ ՎԱԼԵՆՏԻՆ ՊՈԴՊՈՄՈԳՈՎԻՆ

ԿԱՄԵՐԱՅԻՆ ԹԱՏՐՈՆՈՒՄ ԿԱՅԱՑԱՎ ՀՈՒՇ-ԵՐԵԿՈ՝ ՆՎԻՐՎԱԾ ՆԿԱՐԻՉ ՎԱԼԵՆՏԻՆ ՊՈԴՊՈՄՈԳՈՎԻՆ (+Լուսանկարներ)

Ապրիլի 29-ին Երևանի կամերային թատրոնում կայացավ նկարիչ Վալենտին Պոդպոմոգովի 90-ամյակին նվիրված հուշ-երեկո, որի ընթացքում ցուցադրվեցին Վ. Պոդպոմոգովի գործերը, ներկայացվեց գեղանկարչական աշխատանքների կատալոգը, ցուցադրվեց ստեղծագործական կյանքին նվիրված ֆիլմ:

Վալենտին Պոդպոմոգովը 1938թ.-ից աշխատել է «Հայֆիլմ» կինոստուդիայում` որպես նկարիչ: Նա հանդիսանում է ավելի քան 25 ֆիլմերի բեմադրող-նկարիչ, որոնց շարքում են` «Կարինե», «01-99», «Առաջին սիրո երգը», «Ճանապարհ դեպի կրկես», «Անձնապես տեղյակ է» և այլն: 1960-ականներին նպաստել և մեծ ավանդ է ունեցել հայկական մուլտֆիլմի զարգացման գործում: Նրա նվիրյալ աշխատանքի շնորհիվ վերաբացվել է «Հայֆիլմ» -ի մուլտ ստուդիան: 1967թ.-ից էկրանավորել է այնպիսի մուլտֆիլմեր, ինչպիսիք են «Մի կաթիլ մեղր», «Փարվանա», «Գարսևանը արձակուրդում» և այլն: Եղել է Երևանի քաղաքի գլխավոր նկարիչը: Գեղանկարչությամբ սկսել է զբաղվել 50 տարեկան հասակում: Վալենտին Պոդպոմոգովի ստեղծագործության հիմքում ընկած է փիլիսոփայական սկզբունքը:

Նրա ամենահայտնի գործերից են՝ «Խորհրդավոր ընթրիք», «Կարոտախտ», «Ես կամ»: Պոդպոմոգովի ստեղծագործությունների մեջ առանձնահատուկ տեղ են զբաղեցնում հայրենիքին, նրա պատմությանն ու ճակատագրին նվիրված գործերը. «Անդրանիկ», «Ռեքվիեմ 1915», «Կոմիտաս», «Հորովել», ինչպես նաև զարմանահրաշ «Արցախ»-ը՝ դեպի երկինք սլացող մոնումենտալ խաչքարը:

Նյութը և լուսանկարները՝ Վ. ՄՈՒՐԱԴՅԱՆԻ