ՙԵՐԲ ՌՈՄԵՈՆ ՋՈՒԼԻԵՏԻՆ ԳՏՆՈՒՄ Է ՍՈՑՑԱՆՑՈՒՄ

ԵՐԲ ՌՈՄԵՈՆ ՋՈՒԼԻԵՏԻՆ ԳՏՆՈՒՄ Է ՍՈՑՑԱՆՑՈՒՄ

«Արմմոնո» միջազգային թատերական 12-րդ փառատոնի շրջանակում դեբյուտային էտյուդ-ներկայացմամբ հանդիսատեսին հանձնվեց մերօրյա «Ռոմեոն»:  Դերակատար ՆԱՐԵԿ ՀԱՐՈՒԹՅՈՒՆՅԱՆԸ իր Ջուլիետի հետ կապ էր հաստատում ոչ թե դայակի, հոգեւորականի կամ սուրհանդակի, այլ ո՛չ ավելի, ո՛չ պակաս` սոցցանցի միջոցով:

Եվ ինչպես մերօրյա բոլոր ռոմեոները, նա էլ իր հույզերը, զգացմունքներն ու ռոմանտիզմը խեղդում էր` նեթբուքի առջեւ նստած: Ներկայացումից հետո «Իրավունքը» զրուցեց «Ռոմեոյի» բեմադրիչ, երաժշտական ձեւավորման հեղինակ ՀԱՅԱՐՓԻ ԱՍՈՅԱՆԻ հետ:
-Եվս մի անդրադարձ շեքսպիրյան Ռոմեոյին, արդյոք այս ռոմանտիկ հերոսն այսօր չի հնացել:
- Ճիտն ասած, երբեք չեմ մտածել, թե Ռոմեոն հնացած է կամ հնացած չէ, որովհետեւ դրա իրավունքն էլ չունենք ասել, որ այսօր Շեքսպիրը հնացած է: Այո, շատ են խաղացել, թեման շատ է ծեծված, բայց  Նարեկ Հարությունյանի տարիքի տղայի համար մենք փնտրում էինք, թե ինչ խաղա ու որոշեցինք, որ ավելի լավ է` սա: Նա ցանկացավ խաղալ, ինչպես ինքն է ասում, որպեսզի ապացուցի կամ հուսադրի իր տարեկիցներին, որ այդպիսի սեր գոյություն ունի, որի համար պատրաստ է նույնիսկ զոհվելու: Իհարկե, մենք արտառոց բան չէինք անում բեմում` ոչ մի նորամուծություն չենք արել, չենք ցանկացել աջ ձեռքով ձախ ականջը բռնել: Ուղղակի, սիրուն ինչ-որ բեմադրություն է ստացվել, որպեսզի տղան ներկայանա եւ խաղա իր տարիքին համապատասխան դեր, որը շատ կարեւոր է:
- Ինչ ապագա կունենա «Ռոմեո» ներկայացումը` Շեքսպիրյան փառատոն կտեղափոխվի՞, թե արտասահմանյան ինչ-որ փառատոնի կմասնակցի:
- Ծրագրեր դեռ չկան: Արձագանքից է կախված: Սա ընդամենը 20 րոպե տեւողությամբ հետաքրքիր խաղ էր, որը որպես դերասան ներկայանալու հնարավորություն է, որովհետեւ Նարեկն այս տարի ավարտում է Գ. Սունդուկյանի անվան ազգային ակադեմիական թատրոնում գործող ստուդիան:
- Ընդհանրապես, ջուլիետներ այսօր սոցցանցում փնտրելը Ձեզ համար ընդունելի՞  է:
- Որպես Ջուլիետի սեռի ներկայացուցիչ` ասեմ, որ ինձ հետ էլ է պատահել, բայց Ջուլիետ չեմ դարձել, բարեբախտաբար: Փորձը ցույց է տալիս, որ հնարավոր է, ինչու` ոչ, դա էլ է տարբերակ: Ժամանակները փոխվում են:
- Ըստ Ձեզ, շեքսպիրյան ռոմանտիկան արդյոք կտեղափոխվի համացանց, թե կբախվեն Շեքսպիրն ու համակարգիչը:
- Կարծում եմ` կբախվեն: Կարող է` հիմա իմ բեմականացմանը հակասում եմ, բայց կարծում եմ` այդտեղ բախում կլինի, որովհետեւ այն, ինչ կապված է զգացմունքի հետ, առերես պետք է լինի, դեմ առ դեմ շփվելով, հպվելով, այսինքն` բոլոր մնացած իսկական հարաբերությունների նման:

ՀՐԱՆՏ ՍԱՐԱՖՅԱՆ