ՙՙԱՐԱՐԱՏ՚ ՋՕԸ-Ն ԱՆԽԱՓԱՆ ՋՐԱՄԱՏԱԿԱՐՈՒՄ Է ԻՐԱԿԱՆԱՑՆՈՒՄ՚

ՙՙԱՐԱՐԱՏ՚ ՋՕԸ-Ն ԱՆԽԱՓԱՆ ՋՐԱՄԱՏԱԿԱՐՈՒՄ Է ԻՐԱԿԱՆԱՑՆՈՒՄ՚

Վերջերս տարբեր լրատվամիջոցներով տեղեկություններ տարածվեցին, որ Արարատյան դաշտավայրի բնակիչները ոռոգման ջրի հետ կապված ինչ-ինչ խնդիրներ ունեն: Թե որքանով են այդ խոսակցություններն իրական, եւ ինչ խնդիրների մասին է խոսքը, փորձեցինք պարզել ՙԱրարատ՚ Ջրօգտագործողների ընկերության (ՋՕԸ) գործադիր տնօրեն ԽԱՉԻԿ ՀԱՐՈՒԹՅՈՒՆՅԱՆԻՑ, ով մեզ հետ զրույցում մասնավորապես նշեց.
-Ճիշտ է, այս տարի անբարենպաստ տարի եղավ գյուղատնտեսության եւ ֆերմերների համար (կարկտահարության եւ ցրտահարության հետ կապված- Խ. Հ.), սակայն դա ՙԱրարատ՚ ՋՕԸ-ին որեւէ կերպ չխանգարեց իր գործունեությունը ինչպես կարգն է` իրականացնել: Տասներեք համայնքներում ջրամատակարարումը մարտի 15-ից սկսված է, ջրամատակարարման դադարումներ չեն եղել եւ ջրամատակարարումը կատարվել է անխափան: Հայտեր ներկայացնելու եւ ջրի պահանջարկ լինելու դեպքում բոլորին անխտիր ջրամատակարարում է իրականացվել եւ կատարվել է առանց վարձավճարների պահանջի, սակայն ջրամատակարարման դիմաց ըստ ջրօգտագործողների  իրենց օգտագործած ջրի համապատասխան խորանարդ մետրով ջրբաշի մատյաններում ձեւավորվել է հասույթ: Այսինքն, անկախ ամեն ինչից, ՙԱրարատ՚ ՋՕԸ-ն անխափան ջրամատակարարում է իրականացնում:
- Մարզում կան այնպիսի համայնքներ, որտեղ ոռոգման ջրերի հետ կապված խնդիրներ կան:
- Ոչ, նման համայնք չունենք: ՙԱրարատ՚ ՋՕԸ-ն տասներեք համայնք է սպասարկում եւ բոլոր համայնքներում ջրամատակարարում է իրականացվում, բոլոր համայնքներում պոմպերը սարքին վիճակում են, ջրատարներն էլ մաքրված:
- Ջրամատակարարման հետ կապված կան կոնկրետ խնդիրներ, որոնք ըստ Ձեզ, լուծման կարիք ունեն:
- Խնդիրը միայն կապված է ջրօգտագործման վարձավճարների գանձման հետ: Կատարվում է ջրամատակարարում, սակայն ֆերմերները ի վիճակի չեն ժամանակին իրենց սպառած ջրի վարձերը վճարելու: Իսկ համաձայն պայմանագրի` ամեն հաջորդ ջրին, պետք է նախորդ ջրի վարձավճարները փոստային բաժանմունքում ֆերմերները վճարած լինեն, որ հաջորդ ջրամատակարարումն իրականացվի, հիմնականում խնդիրն այստեղ է: Սակայն ՋՕԸ-ն ջրամատակարարումը նույնիսկ այդ դեպքում չի դադարեցնում, ըմբռնումով է մոտենում, մինչեւ մի որոշ ժամանակ հետո կարողանում են  վարձերը վճարել:
Պարոն Հարությունյանը մեզ հետ զրույցում հույս հայտնեց. ՙՄեծ ակնկալիքներ ունենք նոր ձեւավորվելիք կառավարությունից, եւ հույս ունենք, որ նա ամեն կերպ կաջակցի ցրտահարված պտղատու այգիներին, գոնե հիսուն տոկոսով, քանի որ նախնական այդպես է քննարկվում: Որ կարողանան ջրի վարձավճարների փոխհատուցման խնդիրը լուծել, էլի գյուղացու համար մեծ օգնություն կլինի՚:

ԻԼՈՆԱ ԱԶԱՐՅԱՆ