Կրկին վերանշանակված մշակույթի նախարար ՀԱՍՄԻԿ ՊՈՂՈՍՅԱՆԸ հայտարարել է.

Կրկին վերանշանակված մշակույթի նախարար ՀԱՍՄԻԿ ՊՈՂՈՍՅԱՆԸ հայտարարել է. ՙԵս փորձել եմ իմ հնարավորությունների սահմաններում անել այն ամենը, ինչ որ կարեւոր եմ համարել մշակույթի ոլորտը զարգացնելու համար՚: Զարմանալի է, զարգացում չերեւաց, բայց փոխարենը ի հայտ եկավ պատմական արգելոց-թանգարաններում ՙտուրիզմին նպաստելու համար՚ դուքյաններ կառուցելու ամոթալի ծրագիրը: Հանրային բողոքի շնորհիվ Գառնիում հաջողվեց կանխել դուքյանաշինությունը, շաբաթօրյակին էլ այդ խայտառակության հետքերը մաքրվեցին: Բայց դեռ չի հնչել հավաստիացում, որ դուքյաններ չեն ծլի Զվարթնոցում, Քարահունջում, Լոռվա բերդում... Ինչեւէ, զարմանալով հանդերձ, մնում է հուսալ, որ տիկին Պողոսյանն իր կողմից կարեւոր համարածներից ոչինչ չի անի: Գոնե զերծ կմնանք հերթական տհաճ անակնկալներից:
Ժամանակին նախկին պատգամավոր ԱԶԱՏ ԱՐՇԱԿՅԱՆԸ հանդես էր գալիս ամենաթունդ դիրքորոշումով` ընդդեմ Մաքսային միության: Բայց մեծ էր մեր զարմանքը, երբ տեսանք, որ նրա մոտեցումը փոխվել է. ՙՍեպտեմբերի 3-ից հետո այս 6 ամիսների ընթացքում իրողություն է փոխվել, դրան նպաստեցին ուկրաինական դեպքերը, աշխարհի արձագանքները, կարծում եմ, էապես փոխվել է նաեւ Ռուսաստանը: Եվ այդ փոփոխությունը ի շահ մեզ է: Ինչու, որովհետեւ այսօր Ռուսաստանին նվաճված, կամազուրկ երկրներ հարկավոր չեն, այլ` դաշնակիցներ, հետեւաբար` նրան անհրաժեշտ է ինքնիշխան, ուժեղ Հայաստան՚: Դե ինչ, ՙհին քոթուկը՚ ուրիշ է, 1980-90-ականների թոհուբոհը, այդ շրջանի քաղաքական փորձը մարդուն սովորեցրել են ճկուն մտածել, վերլուծել, սեփական տեսակետը վերանայել, եթե այն սխալ է կամ թերի է եղել: Այ, եթե նաեւ մյուսները նրանից օրինակ վերցնեն...
Որ խոսք գնաց Ռուսաստանի մասին, չենք կարող չհիշատակել մի զարմանալի ապատեղեկատվություն` իբր Պրահայում ՍԵՐԺ ՍԱՐԳՍՅԱՆԸ Ադրբեջանի, Վրաստանի, ՙԱրեւելյան գործընկերության՚ այլ երկրների նախագահների հետ միասին հարց է բարձրացրել, թե ռուսական զորքը պետք է հետ քաշվի Ուկրաինայի սահմանից: Անշուշտ, ստի ոտքերը կարճ են, եւ չուշացավ մեր ԱԳՆ-ի պարզաբանումը, որ նման բան ՀՀ նախագահի կողմից չի եղել, բայց... Ինչպիսի ստեր կարող են մատուցել ինտերնետը եւ հեռուստատեսությունը: Հետաքրքիր է, ստի դեդեկտոր միացնելու դեպքում, այն ինտերնետից ավելի շուտ կբոցավառվի եւ շարքից դուրս կգա, թե` հեռուստացույցից...
Մեզ որոշ չափով զարմացրեց եւ ՕԵԿ առաջնորդ ԱՐԹՈՒՐ ԲԱՂԴԱՍԱՐՅԱՆԸ: Ներկայացնելով կոալիցիայից դուրս գալու պատճառաբանությունները` նա նաեւ ասաց. ՙՄենք ուզում ենք ռեալ արդյունքներ, արդյունքին միտված քաղաքականություն, մենք ուզում ենք պատասխանատու դիրքորոշում, եւ ընդհանրապես մենք ուզում ենք ազատություն՚: Հիմա ՕԵԿ-ի 236 օրենսդրական առաջարկություններից 200-ը ընդունվել են, սրանից էլ բարձր արդյունք: Կամ արդյոք կոալիցիայի կազմում ՕԵԿ-ի դիրքորոշումն անպատասխանաատու էր, որ հիմա պատասխանատու դիրքորոշում են ուզում: Կամ ինչ էր պատահել ազատության հետ, քաղբանտարկյալ էին ՕԵԿ-ականները, կամ շղթայակապ էին շրջում, կամ խանգարող կար որեւէ բան նախաձեռնելու կամ արտահայտվելու: Զարմանալով հանդերձ, մնում է հիշել ժողովրդական խոսքը` Աստծուց կրակ եք ուզում:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ