ՀԱԿ-ՈՒՄ ԱՐԴԵՆ ԳԱԳԻԿ ՋՀԱՆԳԻՐՅԱՆԻ՞Ն ԷԼ ՀԱՇՎԻ ՉԵՆ ԱՌՆՈՒՄ

ՀԱԿ-ՈՒՄ ԱՐԴԵՆ ԳԱԳԻԿ ՋՀԱՆԳԻՐՅԱՆԻ՞Ն ԷԼ ՀԱՇՎԻ ՉԵՆ ԱՌՆՈՒՄ

Երեկ ԱԺ-ում մինչ ԱԺ ՀԱԿ խմբակցության ղեկավար Լեւոն Զուրաբյանը սպասում էր, թե ԲՀԿ-ից ինչ հրահանգներ կհնչեն, որպեսզի իր դիրքորոշումը հայտնի` ԱԺ նախագահի ընտրությանը մասնակցել-չմասնակցելու հարցում, «Իրավունքը» փորձեց խմբակցության որոշումը պարզել ԱԺ ՀԱԿ խմբակցության պատգամավոր ԳԱԳԻԿ ՋՀԱՆԳԻՐՅԱՆԻՑ.
- Ֆրակցիան իր տեսակետը կհայտնի, կլսեք...
- Իսկ Դուք անձամբ հակված եք մասնակցելո՞ւ, թե՞ չմասնակցելու...
- Ասացի` ֆրակցիան իր տեսակետը կհայտնի, կլսեք...

Այո, իսկապես ԱԺ ՀԱԿ խմբակցությունն իր տեսակետը հայտնեց եւ ինչպես նախագահական ընտրություններում, այնպես էլ ԱԺ նախագահի ընտրության ժամանակ «ծախեց» ԱԺ ՀԱԿ խմբակցության պատգամավոր Հրանտ Բագրատյանին` չպաշտպանելով նրա թեկնածությունը: Մինչդեռ Հ. Բագրատյանը հերթական ապտակը հասցրեց հարազատ խմբակցությանը` քաղաքական մեծամասնության հետ միասին կողմ քվեարկելով հաշվիչ հանձնաժողովի ձեւավորմանը, ինչի շնորհիվ այսօր կկայանա ԱԺ նախագահի ընտրությունը: Ի դեպ, երբ Հ. Բագրատյանը առաջադրելով իր ԱԺ նախագահ դառնալու թեկնածությունը, որոշ ծրագրային դրույթներ էր ներկայացնում ԱԺ ամբիոնից, դահլիճը շտապեցին լքել ԱԺ ՀԱԿ խմբակցության պատգամավորներ Լյուդմիլա Սարգսյանը, Ստեփան Դեմիրճյանն ու Գագիկ Ջհանգիրյանը` հավանաբար ամաչելով նայել Հ. Բագրատյանի աչքերին: Չմոռանանք նշել, որ պարոն Բագրատյանի առաջադրվելու հանգամանքը այնքան էր զվարճացրել ԱԺ ԲՀԿ խմբակցության քարտուղար Նաիրա Զոհրաբյանին, որ անգամ ԱԺ փոխնախագահ Էդուարդ Շարմազանովը նկատեց: Իսկ Հ. Բագրատյանը հուզված կամ հիացած տիկնոջը փորձեց հանգստացնել ձեռքսեղմումով:

ՀՐԱՆՏ ՍԱՐԱՖՅԱՆ