ՔԱՌՅԱԿՈՒՄ ԿԱՏԱՐՅԱԼ ԽԱՌՆԱՇՓՈԹ Է

ՔԱՌՅԱԿՈՒՄ ԿԱՏԱՐՅԱԼ ԽԱՌՆԱՇՓՈԹ Է

Ինչպես այսօր հայտարարեց ԲՀԿ խմբակցության քարտուղար Նաիրա Զոհրաբյանը, ընդդիմադիրաայլընտրանքային քառյակը չի քննարկել ԱԺ նախագահի միասնական թեկնածու առաջադրելու հարցը: Եվ իր համար անակնկալ էր ինչպես Հրանտ Բագրատյանի, այնպես էլ Ռուբիկ Հակոբյանի առաջադրումները: Ն. Զոհրաբյանը նաեւ ասաց, որ նոր իրավիճակում ԲՀԿ-ն պետք է եւս քննարկի հարցը եւ որոշում կայացնի, թե ի վերջո ում օգտին է քվեարկելու: Ի դեպ այսօր առավոտյան դեռ հայտնի էր, որ ԲՀԿ-ն պետք է քվեարկեր Գալուստ Սահակյանի օգտին, սակայն քառյակի գործընկերների քայլերը կարծես թե խառնաշփոթ մտցրեցին ԲՀԿ-ի դիրքորոշման մեջ:

ՀՅԴ խմբակցության ղեկավար Արմեն Ռուստամյանը իր ելույթով նույնպես հաստատեց, որ քառյակը ըստ էության դադարել է գոյություն ունենալուց, քանի որ երկու ընդդիմադիր թեկնածուների պարագայում ՀՅԴ-ն հայտարարեց, որ չի մասնակցելու քվեարկությանը, այսինքն ձայնը չի տալու նրանցից ոչ մեկին:

Քառյակի դեմքը փորձեց փրկել Ռուբիկ Հակոբյանը հայտարարելով, թե հանում է ընդամենը կես ժամ առաջ, <Ժառանգության> խորհրդի կողմից առաջադրված իր թեկնածությունը: Այն, որ <Ժառանգության> մոտ տրամադրությունները, որոշումները փոխվում են կայծակնային արագությամբ նորություն չէ, սակայն Ռուբիկ Հակոբյանը կոչ արեց քառյակի պատգամավորներին հրաժարվել քվեարկությանը մասնակցելուց եւ դրանով իսկ վերականգնել քառյակի միասնությունը: Միարժամանակ դա լուրջ փորձություն կլինի ԲՀԿ-ի համար, որը ըստ տարածված լուրերի խոստացել է իր աջակցությունը Գալուստ Սահակյանին, մյուս կողմից խնդիր կառաջացնի ՀԱԿ խմբակցությունում, որի անդամ Հրանտ Բագրատյանը ինքնաառաջադրվել է: Այսպիսով, եթե ԲՀԿ-ն չմասնակցի ընտրություններին, ապա կխախտի Հովիկ Աբրահամյանի վարչապետ նշանակումով ստեղծվող փոխհամաձայնությունը ՀՀԿ-ի հետ: Իսկ եթե ԲՀԿ-ն մասնակցի ընտրությանը, ապա վերջակետ կդնի քառյակ հասկացողությանը:

Նույն բարդ իրավիճակում հայտնվեց ՀԱԿ-ը, որը մասնակցելու դեպքում կխաթարեր քառյակի ընդդիմադիր ոգին, իսկ չմասնակցելով միայնակ թողեց Հրանտ Բագրատյանին: Ուստի սրանով հաստատեց, որ ՀԱԿ խմբակցություն որպես այդպիսին գոյություն չունի: Թեեւ վերջին դատողությունը նորություն չէ, քանի որ Բագրատյանը ոչ միայն չհետեվեց ու չհանեց իր թեկնածությունը, այլ շեշտեց, որ ինքնաառաջադրվել է, ՀԱԿ-ի հետ իր առաջադրումը կապ չունի եւ որ նա պատասխանատու է միայն այն մարդկանց առջեւ, ովքեր ձայն են տվել ՀԱԿ դաշինքին, որն այսօր Բագրատյանի բնորոշմամբ գոյություն չունի: Հատկանշական է, որ այն պահին, երբ Լեւոն Զուրաբյանը հայտարարեց, որ չեն մասնակցելու քվեարկությանը, բոլորի հայացքը ուղղղվեց դեպի Բագրատյանը, որը ծիծաղալով ու ձեռքերով ցույց տալով ամբիոնի մոտ կանգնած Զուրաբյանին բարձր ասաց. <Ես սրանց հետ ինչ կապ ունեմ>:

Մի խոսքով քառյակում կատարյալ խառնաշփոթ է:

ԱՐՄԵՆՈՒՀԻ ՀԱԿՈԲՅԱՆ