ԿԱՅԱՑԱՎ ՀԵՐԹԱԿԱՆ ՀԱՄԵՂ ՄԻՋՈՑԱՌՈՒՄԸ

ԿԱՅԱՑԱՎ ՀԵՐԹԱԿԱՆ ՀԱՄԵՂ ՄԻՋՈՑԱՌՈՒՄԸ

Վերջերս Կոտայքի մարզի Աբովյան քաղաքում տեղի ունեցավ "Հայ խոհարարական  ավանդույթների զարգացման և պահպանման" ՀԿ-ի և Աբովյանի քաղաքապետարանի համատեղ ուժերով կազմակերպած  Ձկան մրցույթ-փառատոնը:

Իսկական տոն էր Աբովյանի ու աբովյանցու համար. ազգային երգ ու պար, գեղարվեստական գործերի ցուցադրություն, ձկնեղենի բազմաթիվ ու բազմազան տեսակներ՝ իշխանից մինչև ոսկե ձկնիկ՝ իհարկե եփած տեսքով, նոր ու հետաքրքիր բաղադրատոմսեր, համեղ տրամադրություն:

"Մեր հերթական համեղ միջոցառումը նպատակ ունի ի հայտ բերելու ձկան պատրաստման նորագույն եղանակներ, նպաստել Հայաստանը զբոսաշրջիկների համար գրավիչ դարձնելուն, ուրախացնել ժողովրդին և կազմակերպել ավագանու ու շինականի հանդիպումը, որը, միգուցե, նոր մտքերի ու նախագծերի առիթ հանդիսանա:  Ձկան մասը մեր ազգային խոհանոցում թերզարգացած է, այս փառատոնը կօգնի նաև նոր բաղադրատոմսերի ի հայտ գալուն. մտադիր ենք տպագրելու է մի փոքրիկ աշխատություն՝ մրցույթում ներկայացված բոլոր ճաշատեսակների բաղադրատոմսերով, որը օգտակար կլինի և՛ տնային տնտեսուհիների, և՛ հանրային սննդի օբյեկտների համար, ի վերջո, խոհանոցը զարգանում է հենց այդ կետերից",- "Իրավունք"-ի հետ զրույցում նշեց "Հայ խոհարարական  ավանդույթների զարգացման և պահպանման" ՀԿ-ի նախագահ ՍԵԴՐԱԿ ՄԱՄՈՒԼՅԱՆԸ:

Իսկ թե պատահակա՞ն էր արդյոք Սուրբ զատիկ-Ձկան փառատոն հանդիպումը, թե ոչ, խոհարարը պարզաբանեց, որ դա, միգուցե, Բարձրյալի նախախնամությունն էր, քանզի հենց այդ օրը փառատոնն անցկացնելու հատուկ նպատակայնություն չի եղել:

"Հայերս իսկապես հպարտանալու շատ առիթներ ունենք, դա ապացուցվեց նաև ժյուրիին բավականին բարդ ընտրության առաջ կանգնեցնելով. ճաշատեսակների համեղ ու բազմազան մրցակցությունն էր ծավալվել", - ասաց պրն. ՄԱՄՈՒԼՅԱՆՆ ու ներկայացրեց հաղթողների անունները:

2014 թ., քաղաք Աբովյան, Ձկան փառատոն՝ անվանակարգերում հաղթողները 1-ին, 2-րդ, 3-րդ տեղերի համար պարգևատրվեցին համապատասխանաբար բրոնզե, արծաթե և ոսկե մեդալներով, և արդյունքում ոչ մի մասնակից, կազմակերպություն, թիմ  ձեռնունայն չհեռացավ, պարգևատրվեցին նույնիսկ ժյուրիի անդամները՝ "Լավագույն թիմ", Աբովյանի քաղաքապետարանը՝ "Լավագույն հովանավորչական դրսևորում" և միջոցառման հաղորդավար Ժակը՝ "Լավագույն նորամուտ" տիտողոսներով:

Ամենայն հավանականությամբ Ձկան փառատոնը կդառնա ամենամյա, ու Աբովյանն էլ կնշվի որպես ձկան փառատոնի վայր:

ԷԹԵՐԻ ՄԱՄՈՒԼՅԱՆ