ՙՙՖՈՒՏԲՈԼԱՅԻՆ ԽԱՂԱԴԱՇՏԻՑ ԴՈՒՐՍ ՏՐՎՈՂ ՀԱՐՑԵՐԻՆ ՄԽԻԹԱՐՅԱՆԸ ՊԱՏԱՍԽԱՆԵՑ ԽԱՂԱԴԱՇՏԻՑ

ՖՈՒՏԲՈԼԱՅԻՆ ԽԱՂԱԴԱՇՏԻՑ ԴՈՒՐՍ ՏՐՎՈՂ ՀԱՐՑԵՐԻՆ ՄԽԻԹԱՐՅԱՆԸ ՊԱՏԱՍԽԱՆԵՑ ԽԱՂԱԴԱՇՏԻՑ

Հայաստանի հավաքականի եւ Դորտմունդի ՙԲորուսիայի՚ կիսապաշտպան Հենրիխ Մխիթարյանի համար այս ֆուտբոլային ամիսը վերելքային ստացվեց: Մխիթարյանը չեմպիոնների լիգայի խաղարկությունում այնքան էլ լավ չկարողացավ իրեն դրսեւորել Մադրիդի ՙՌեալի՚ դեմ խաղերում, ինչի արդյունքում կրկին քննադատությունների ալիք բարձրացավ: Տպավորություն է թե ֆուտբոլային աշխարհը դեռ չի ՙմարսել՚ այն 27.5 մլն եվրոն, որի դիմաց հայ ֆուտբոլիստը տեղափոխվել է գերմանական ակումբ:
Ամեն հարմար առիթի դեպքում Մխիթարյանի գործողությունները քննադատվում են, վերջինիս մեղադրում են անվստահության մեջ, հատկապես` ուժեղ մրցակիցների դեմ խաղերում: ՙԱրքայական՚ ակումբի դեմ խաղերից հետո Մխիթարյանի վրա մեծ ճնշում գործադրվեց, սակայն դրան հաջորդող դիմակայությունները ֆուտբոլիստի համար լավ առիթ դարձան` ֆուտբոլային խաղադաշտից դուրս տրվող հարցերին տալ պատասխան` հենց խաղադաշտից:

Հենրիխ Մխիթարյանն աչքի ընկավ Բունդեսլիգայում ՙԲորուսիայի՚ թերեւս ամենաբարդ մրցակցի`ՙԲավարիայի՚ դեմ խաղում: Այդ խաղից հետո Whocored.com-ը ներկայացրել է Մխիթարյանի վիճակագրությունը, ինչպես նաեւ տվել է նրա խաղի գնահատականը. Մխիթարյանը ՙԲավարիայի՚ դարպասի ուղղությամբ կատարել է մեկ հարված, որն արդյունավետ է եղել: Նա գնդակին դիպել է 53 անգամ, կատարել է 31 փոխանցում` 74 տոկոս ճշգրտությամբ: Հենրիխը երեք անգամ մրցակցից խլել է գնդակը եւ մեկ անգամ հաղթել օդային մենապայքարում: Հայ կիսապաշտպանի հետ պայքարում հյուրերը չորս անգամ խախտել են կանոնները: 83-րդ րոպեին Հայաստանի հավաքականի ֆուտբոլիստը զգուշացվել է: Մխիթարյանը չի հայտնվել խաղից դուրս վիճակում: Արդյունքում` նա արժանացել է 8.29 գնահատականինª զիջելով միայն դորտմունդցիների գերմանացի կիսապաշտպան Մարկո Ռոյսին` 8.74:
Դորտմունդի ՙԲորուսիայի՚ եւ Գերմանիայի հավաքականի պաշտպան Մատս Հումելսը ruhrnachrichten.de-ին տված հարցազրույցում նշել է. ՙՄխիթարյանը վերջին երկու խաղերում գերազանց խաղ է ցուցադրում: Նա կարողացավ դիմակայել սարսափելի ճնշմանը: Այդ հատկանիշի շնորհիվ նա երբեք չի տապալվի: Միկին ֆանտաստիկ ֆուտբոլիստ է, մենք բոլորս գիտենք այդ մասին: Ով այդպես չի կարծում, պատկերացում չունի ֆուտբոլի մասին՚:
Այս հանդիպումն օգնեց Մխիթարյանին սկիզբ դնել հաջողակ հանդիպումների շարքին, որը, հուսով ենք, կշարունակվի: Իսկ ՙՎոլֆսբուրգի՚ դեմ գավաթային խաղում գերմանական ՙDer Westen՚ պարբերականը Մխիթարյանին ճանաչել է հանդիպման լավագույն ֆուտբոլիստ: Մխիթարյանը բացել է հանդիպման հաշիվը եւ փոխարինվել 72-րդ րոպեին: ՙԲորուսիան՚ արդյունքում 2:0 հաշվով հաղթանակ է տոնել եւ նվաճել եզրափակիչի ուղեգիր: Գերմանիայի առաջնության 31-րդ տուրի շրջանակներում ՙՄայնցի՚ դեմ Մխիթարյանը հերթական հիանալի հանդիպումն անցկացրեց. այս խաղում նա աչքի ընկավ գոլային փոխանցմամբ: Whocored.com-ը Մխիթարյանի խաղը արժանացրել է 7.32 գնահատականին: Ակումբի մարզական տնօրեն Միխայել Ցորկը վերջին խաղերում Մխիթարյանի ցուցադրած արդյունքների մասին Der Westen-ին ասել է. ՙՄխիթարյանը հրաշալի է իրեն զգում կիսապաշտպանության եզրերում: Նա շատ օգտակար է թիմին, երբ խաղում է եզրերում: Մխիթարյանն անընդմեջ անցկացրեց մի քանի գերազանց հանդիպում՚:

ՔՐԻՍՏԻՆԵ ՊԵՏՐՈՍՅԱՆ