ԿԱՐԵՆ ՋԱՆԻԲԵԿՅԱՆ. «ՍԻՐՏՍ ԲԱՐԱԿԵԼ Է, ՄԵԾ ՄԱՐԴ ԵՄ»

ԿԱՐԵՆ ՋԱՆԻԲԵԿՅԱՆ.  «ՍԻՐՏՍ ԲԱՐԱԿԵԼ Է, ՄԵԾ ՄԱՐԴ ԵՄ»

Մայիսի վերջին Գ. Սունդուկյանի անվան ազգային ակադեմիական թատրոնում կկայանա "Վանա կատու"| ներկայացման պրեմիերան: Ներկայացման հեղինակը` պիեսի եւ բեմադրության, դրամատուրգ ԼԻԱՆԱ ԱՆԹԱՌԱՆՅԱՆՆ է: "Իրավունքի" հետ զրույցում ՀՀ ժողովրդական արտիստ, սիրված դերասան ԿԱՐԵՆ ՋԱՆԻԲԵԿՅԱՆԸ հավաստիացրեց, որ ներկայացումը արծարծում է Ցեղասպանության թեման, որը յուրաքանչյուր հայ ժողովրդի համար չսպիացած վերք է:
Կ.Ջանիբեկյանը մի քանի թատրոններից հրավիրված դերասանների հետ անհամբեր սպասում է ներկայացման պրեմիերային: Բայց մինչ այդ, Կ. Ջանիբեկյանին բարկացնում է այն փաստը, որ հաճախ հայերս բողոքում ենք, թե այսքան տարի ոչինչ չնկարահանվեց` Ցեղասպանության մասին վիշտն ավելի խորը ներկայացնելու համար:

"ԹՈՒՐ ՈՒ ԹՎԱՆՔ ԱՌՆԵՆ ԳՆԱՆ ԹՈՒՐՔԵՐԻՆ ՄՈՐԹԵ՞Ն"

- Պարոն Ջանիբեկյան, հաջորդ տարի կլրանա Ցեղասպանության 100-րդ տարելիցը, ի՞նչն է պատճառը, որ մինչեւ այսօր չծնվեցին հզոր գործեր...

- Իսկ ո՞վ ասաց թե չունեցանք, մենք ազգովի դժգոհ ենք, մենք ամեն ինչից դժգոհում ենք, մեր բնավորությունն է այդպիսին: Հիմա դուք դժգոհում եք, ինչո՞ւ, տեսեք, ինչպես են Ցեղասպանությունը մեկնաբանում ամբողջ հեռուստաալիքները` տարբեր երկրներից: Էլ ի՞նչ եք ուզում, ի՞նչ պիտի անեն, թուր ու թվանք առնեն, գնան թուրքերին մորթե՞ն: Այ, մայիսի վերջին եկեք, նայեք իմ ներկայացումը, որը կոչվում է "Վանա կատու": Ամեն ինչ ասվում է այդ ներկայացման մեջ, բայց ես չեմ դժգոհում, չէ՞: Ներկայացումը Ցեղասպանության 100-ամյակին նվիրված գործ է, որը տաղանդավոր, հանճարեղ մի կին է գրել, դա իմ կինն է` Լիանա Անթառանյանը, որը հրաշալի է գրել եւ բեմադրում է այն: Ինձ թվում է` կարժանանա պետական մրցանակի, որովհետեւ այնպիսի բաներ է խոսվում, որ երբեք չի խոսվել այդ մասին:

"ԵԹԵ ՄԵՆՔ Ո'Չ ՇԵՆՔ ՈՒՆԵՆՔ, Ո'Չ ՏԱՐԱԾՔ..."

- Գ. Սունդուկյանի թատրոնում "Վանա կատուն" խաղացանկային ներկայացո՞ւմ է լինելու:
- Այն Գուրգեն Ջանիբեկյանի անվան թատրոնի ու հիմնադրամի ներկայացումն է: "Վանա կատուն" անտերպրիզային ներկայացում է, հավաքել ենք տարբեր թատրոնների դերասաններին, ու պիտի ասեմ, որ տաղանդավոր խումբ է հավաքված: Անտերպրիզային ներկայացումը ժամանակի ընթացքում սպառվում է` 1- 2 տարի հետո ու վերջ: Ինչպե՞ս ներկայացումը կարող է լինել խաղացանկային, եթե մենք ո'չ շենք ունենք, ո'չ տարածք: Մի կերպ գումար ենք հայթայթում այստեղից-այնտեղից, որ կարողանանք ներկայացում անել: Փառք տիրոջը, կարողացանք ճարել մի փոքր գումար, որպեսզի անենք այս ներկայացումը:

"Ա~Խ, ԱՍՈՒՄ ԵՄ` ԵՍ ՁԵՐ... ԹՈՒՐՔ..."

- Պարոն Ջանիբեկյան, Ցեղասպանությունը բոլոր հայերի համար խորը չսպիացված վերք է...
- Գիտեք, ինչ որ այսօր նայում եմ հեռուստացույցով` Ցեղասպանության կադրերը, չեմ դիմանում, անջատում եմ, որովհետեւ սիրտս բարակել է, մեծ մարդ եմ: Երբ տեսնում եմ այդ երեխաներին, դիակները... Ա~խ, ասում եմ` ես ձեր... թուրք... Ախր, ամբողջ ցավն այն է, որ առանց կռվի այդ հողերը տվեցինք, եւ թուրքը ծածանեց իր դրոշը հայաշատ հողերի վրա: Ախր, եթե կռվով տայինք, ուրիշ հարց... բայց...

"ԵՍ ԴԵՐԱՍԱՆ ՄԱՐԴ ԵՄ"

- Հաճախ ասում են, թե` լավ, ընդունեն Ցեղասպանությունը, հետո ի՞նչ պիտի լինի:
- Շարունակությունը կլինի այն, ինչ որ պիտի լինի: Հիմա ես հո քաղաքական գործիչ չեմ, դիվանագետ չեմ, ես դերասան մարդ եմ: Ես ոչ Գալուստ Սահակյանն եմ, ոչ էլ` Շարմազանովը, ի՞նչ իմանամ...

"ՆԵՐԿԱՅԱՑՈՒՄՆ ԷԼ ԱՆԵՄ, ՆՈՐ ՀԱՆԳԻՍՏ ԳՆԱՄ ԷՆ ԱՇԽԱՐՀ"

- Իսկ գնացել ե՞ք հուշահամալիր:
- Ոչ, ի վիճակի չեմ, չեմ կարողանում քայլել, հազիվ եմ քայլում: Ես մենակ ուզում եմ այդ ներկայացումը` "Վանա կատուն", կարողանամ խաղալ: Իմ մոտ ծանր հիվանդություն է հայտնաբերվել, թոքերի շատ վատ հիվանդություն ունեմ, որը  հայտնաբերվեց հիմա` ես տառապում եմ: Ներկայացումն էլ անեմ, պրծնեմ ու նոր հանգիստ գնամ էն աշխարհ:

ԼԻԼԻԹ ԵՂԻԱԶԱՐՅԱՆ