ՙԱՆՀՐԱԺԵՇՏ Է ՍԵՎԱՆ ՔԱՂԱՔՈՒՄ ԱՍՏԻՃԱՆԱԲԱՐ ԶԱՐԳԱՑՆԵԼ ՏՈՒՐԻԶՄԸ՚

ՙԱՆՀՐԱԺԵՇՏ Է ՍԵՎԱՆ ՔԱՂԱՔՈՒՄ ԱՍՏԻՃԱՆԱԲԱՐ ԶԱՐԳԱՑՆԵԼ ՏՈՒՐԻԶՄԸ՚

ՙԻրավունքի՚ զրուցակիցն է Գեղարքունիքի մարզի Սեւան քաղաքի քաղաքապետ Ռուդիկ Ղուկասյանը, ում հետ զրուցեցինք վերջին շրջանում իր եւ Գեղարքունիքի մարզպետի լարված հարաբերությունների մասին շրջանառվող խոսակցությունների, եւ Սեւան քաղաքի հիմնահարցերի մասին:
-Պարոն Ղուկասյան, վերջին շրջանում խոսակցություններ տարածվեցին այն մասին, որ Ձեր եւ Գեղարքունիքի մարզպետի միջեւ բավականին լարված հարաբերություններ են: Որքանո±վ են այդ խոսակցությունները համապատասխանում իրականությանը:
- Ես կցանկանայի, որ մնացած համայնքի ղեկավարները եւ մարզպետները ունենային այն հարաբերությունները, որոնք այս պահին ունենք ես եւ Գեղարքունիքի մարզպետը: Մենք տասնվեց տարվա աշխատանքային կենսագրություն ունենք իրար հետ, դրանք անիմաստ խոսակցություններ են, նման բան չկա:
- Այդ դեպքում, ըստ Ձեզ, ովքեր են նման խոսակցություններ տարածողները:
- Երեւի պարապ, զբաղմունք չունեցող մարդիկ:
-  Ինչ ակնկալիքներ ունեք նոր վարչապետից եւ նոր ձեւավորվող կառավարությունից:
- Ես եւ նոր վարչապետը ունենք աշխատանքային կենսագրություն, մենք միասին աշխատել ենք դեռեւս այն տարիներին քաղաքական խորհրդի նախագահներ` ինքը Արտաշտում, ես` Սեւանում, ունեցել ենք մոտ հարաբերություններ: Պետք է ասեմ, որ շատ ճիշտ ընտրություն է նրան վարչապետ նշանակելը, նա բավականին մեծ աշխատանքային փորձ ունեցող անձնավորություն է: Վստահ եմ, որ Աբրահամյանը կարող է անել այնպիսի քայլեր, որոնք կթեթեւացնեն հանրության հոգսը, պարզապես մի քիչ համբերություն է պետք:
- Պարոն Ղուկասյան, Սեւանը համարվում տուրիստական քաղաք, համեմատած անցած տարիներին` Դուք ի±նչ առաջընթացներ եք տեսնում:
- Ցավով պետք արձանագրեմ, որ այո, Սեւանն ինքն իրենով տուրիստական քաղաք է, բայց այն հանրապետության ծրագրերում ներառված չէ որպես տուրիստական քաղաք: Տուրիստական քաղաքներ են այսօր համարվում Ծաղկաձորը, Դիլիջանը եւ Ջերմուկը, որոնք ընդգրկված են համապատասխան ծրագրերում: Այդ բացը լրացնելու համար վերջերս քննարկումներ ենք ունեցել Էկոնոմիկայի նախարարությունում: Սեւանը բացի տուրիստական քաղաք լինելուց այլ կարգավիճակ պարզապես չի կարող ունենալ` ոչ արդյունաբերական, ոչ գյուղատնտեսական:
- Ինչպիսի աշխատանքներով է զբաղվում քաղաքի բնակչությունը:
- Բնակիչների աշխատատեղերը հիմնականում լողափներն են, այսինքն հիմնական զբաղմունքը տուրիզմով զբաղվելն է:
- Վերջին շրջանում հաճախակի են խոսում արտագաղթի մասին, արտագաղթի ի±նչ միտում եք նկատում կոնկրետ Սեւան քաղաքում:
- Ի տարբերություն հանրապետության մնացած շրջանների, այդ թվում նաեւ Գեղարքունիքի մարզի մնացած բնակավայրերի, Սեւանում արտագաղթի ավելի ցածր տեմպեր կային նախորդ տարիներին: Հիմա, ցավոք սրտի, այն զգալի է դարձել:
- Ինչպիսին եք տեսնում քաղաքի զարգացման հեռանկարները:
- Առաջին հերթին քաղաքը պետք է ունենա նոր գլխավոր հատակագիծ, գլխավոր հատակագիծը հենց զարգացման հեռանկարն է: Ինչպես նշեցի, տուրիզմից բացի մենք ոչինչ չունենք, իսկ տուրիզմ հասկացողությունը դա մեծ արտադրություն է, այսինքն եթե կա հանգստացող, ուրեմն կա լողազգեստ, եթե կա լողազգեստ` կա հանգստացող եւ այսպես շարունակ: Եվ ես համոզված եմ, որ նոր կառավարությունը անպայման կաջակցի այդ ամենին հասնելու համար, քանի որ գիտեմ, նոր վարչապետի աշխատանային ջիղը:
- Որոնք են այսօրվա Սեւան քաղաքի երեք հիմնական խնդիրները:
- Առաջին խնդիրն այն է, որ Սեւանում մենք ունենք ութ հարյուր հազար քառակուսի մետր ազատ տարածք, սակայն ցավով պետք է արձանագրեմ, որ տարիների ընթացքում այդ մաշվածությունը հասել է հարյուր տոկոսի: Մենք պետք է կարողանանք իրագործել բարեկարգման աշխատանքները, ունենք լուրջ խնդիրներ, բացթողումներ նաեւ կանաչապատման աշխատանքների հետ կապված:
Երկրորդ` ունենք ենթակառուցվածքների զարգացման խնդիր` քաղաքը օրգանական կապ պետք է հաստատի հանգստի գոտու հետ: Երրորդը` անհրաժեշտ է Սեւան քաղաքում աստիճանաբար զարգացնել տուրիզմը:

ԻԼՈՆԱ ԱԶԱՐՅԱՆ