«ԱՐՄՄՈՆՈ» ՓԱՌԱՏՈՆԻ ՀԻՄՆԱԿԱՆ ՆՊԱՏԱԿՆ Է ՍՏԵՂԾԵԼ ՆԵՐԿԱՅԱՑՈՒՄՆԵՐ ՀԱՅԱՍՏԱՆԻ ԵՎ ՀԱՅ ԴԵՐԱՍԱՆՆԵՐԻ ՀԱՄԱՐ»

Մ. Մխիթարյան. «ԱՐՄՄՈՆՈ» ՓԱՌԱՏՈՆԻ ՀԻՄՆԱԿԱՆ ՆՊԱՏԱԿՆ Է ՍՏԵՂԾԵԼ ՆԵՐԿԱՅԱՑՈՒՄՆԵՐ ՀԱՅԱՍՏԱՆԻ ԵՎ ՀԱՅ ԴԵՐԱՍԱՆՆԵՐԻ ՀԱՄԱՐ»

Այսօր մեկնարկում է «Արմմոնո» միջազգային թատերական 12-րդ փառատոնը, ինչի առթիվ հրավիրված ասուլիսին մասնակցում էին փառատոնի տնօրեն Մարիաննա Մխիթարյանը, ՀՀ մշակույթի նախարարության ժամանակակից արվեստի վարչության գլխավոր մասնագետ Վարդան Գրիգորյանը եւ Մեծ Բրիտանիայից ժամանած դերասան Փեթար Միլուշեւսկին: Խոսելով արդեն մեծ ճանաչում ունեցող փառատոնի մասին` ՀՀ մշակույթի նախարարության ժամանակակից արվեստի վարչության գլխավոր մասնագետ ՎԱՐԴԱՆ ԳՐԻԳՈՐՅԱՆԸ նշեց. «Հերթական 12-րդ փառատոնը, որն այսօր կմեկնարկի, խոսուն վկայություն է, որ նախորդ բոլոր տարիներին այն մեր թե՛ մշակութային կյանքում, թե՛ մասնավորապես թատերական կյանքում կայացած ու ճանաչում ձեռք բերած փառատոններից է: Այն մեզ հնարավորություն է ընձեռում արդեն այլ ոճերի մեջ, այլ ձեւաչափի մեջ թատերական մոնո ժանր տեսնելու, նաեւ համեմատելու ներկայացումների թատերական արտահայտչամիջոցները, նոր ձեւերի այն փոփոխությունները, որոնք տեղի են ունենում արդի աշխարհում, թատերական դաշտում»: Այս տարի «Արմմոնոյում» ընդգրկված ներկայացումների եւ ընդհանուր փառատոնային ծրագրի մասին փառատոնի տնօրեն ՄԱՐԻԱՆՆԱ ՄԽԻԹԱՐՅԱՆԸ մանրամասնեց. «Հինգ օրվա ընթացքում կդիտենք 17 ներկայացում, որոնցից 6-ը կլինեն արտասահմանյան ներկայացումներ` Մեծ Բրիտանիայից, Լեհաստանից, Լիտվայից, Ռուսաստանից  հրավիրված դերասանների մասնակցությամբ:  Մենք անցած տարվանից սկսել ենք  նաեւ «Արմմոնո-Դեբյուտ» ծրագիրը, որի ընթացքում կլինի երեք ներկայացում` իրենց առաջին քայլերն անող դերասանների մասնակցությամբ: Ուզում եմ նշել, որ մեր հայտնի դերասանները, ինչպիսիք են ՀՀ. վաստ. արտիստ Ռոբերտ Հակոբյանը, Զարուհի Խաչատրյանը, Արա Գեւորգյանը, Յուրի Իգիթխանյանը, Վարազդատ Փանոյանը, Մարի Գրիգորյանը, նույնպես հանդես կգան շատ հետաքրքիր մոնոներկայացումներով , որոնք իմ կարծիքով դուք կհավանեք»: «Արմմոնո» միջազգային թատերական 12-րդ փառատոնը կհարստանա եւս մի նոր ծրագրով, ինչի վերաբերյալ բանախոսը ընդգծեց. «Արմմոնո-Տրիումֆ» ծրագրում տեղ կգտնեն այն ներկայացումները, որոնք բեմադրվել են անցյալ տարի եւ ունեցել են հաջողություն թե՛ Հայաստանում, թե՛ Հայաստանից դուրս: Այսօր «Տրիումֆի»  շրջանակում կկայանա ՀՀ. վաստ. արտիստուհի Նարինե Գրիգորյանի մոնոներկայացումը: Նարինեն Երեւանում անցած տարի խաղաց այդ ներկայացումը եւ ափսոս, որ այն խաղացվեց ընդամենը մեկ անգամ: Փառատոնն աշխատում է Հայաստանի համար, իհարկե, շատ գովելի եւ հաճելի է, երբ հրավիրվում են ներկայացումներ ուրիշ երկրներից, բայց մեր փառատոնի հիմնական նպատակն է ստեղծել ներկայացումներ Հայաստանի եւ մեր հայ դերասանների համար, աջակցել իրենց, որպեսզի հաջողվեն նաեւ այդ ժանրում: «Արմմոնո-Տրիումֆ» ծրագրում ընդգրկված երկրորդ ներկայացումը ՀՀ վաստ. արտիստ Մուրադ Ջանիբեկյանի ներկայացումն է, որը նույնպես ստեղծվեց անցած տարի եւ մեծ հաջողություններ ունեցավ թե՛ Հայաստանում, թե՛ Հայաստանից դուրս»:

Չմոռանանք նշել, որ փառատոնն իրենց մասնակացությամբ պատվել են, ինչպես Մ. Մխիթարյանն է նշում, VIP հյուրերը` մոնոներկայացումների միջազգային փառատոների հանրահայտ տնօրեններ` Յոլանտա Սուտովիչը /Գերմանիա/, Մարիա Տանանան /Լիտվա, Մարիա Յուրևան /Սանկտ Պետերբուրգ/, Ռախել Տարանատսը /Իսրայել/, հանրահայտ բեմադրիչ Սաուլիս Վառնասը/ Լիտվա/, Ուլյանովսկի Ի. Գոնչարովի անվան դրամատիկական թատրոնի փոխտնօրեն Յարոսլավ Անդրոնովը: Փառատոնի շրջանակներում կանցկացվեն վարպետության դասընթացներ Երեւանի Կինոյի եւ Թատրոնի ինստիտուտի ուսանողների համար: Իսկ «Արմմոնոյի» անակնկալներն այսքանով չեն սահմանափակվում, ինչի վերաբերյալ փառատոնի տնօրենը ակնարկեց. «Մենք կունենանք հունիս ամսին «Արմմոնո» մարզային փառատոնը, իսկ թե որտեղ է լինելու, ես դեռ չեմ ասի: Առայժմ թող մնա գաղտնիք»:

Ի դեպ, փառատոնը կբացի Մեծ Բրիտանիայից ժամանած հանրահայտ դերասան Փեթար Միլուշեւսկին՝ «Beautifull» («Գեղեցիկը») մոնոներկայացմամբ: Երիտասարդ դերասանը թեպետ ասուլիսի ժամանակ դժգոհեց երկարատեւ ճամփորդությունից դեպի Երեւան, բայց, այնուամենայնիվ, տպավորված էր երեւանյան եղանակից եւ փառատոնի կազմակերպիչների հյուրընկալությունից:

ՀՐԱՆՏ ՍԱՐԱՖՅԱՆ