ՙԿԻՊՐՈՍԻ ԴԱՏԱԽԱԶՈՒԹՅՈՒՆԻՑ ՍՏԱՑՎԵԼ ԵՆ ՆՈՐ ՓԱՍՏԱԹՂԹԵՐ

ԿԻՊՐՈՍԻ ԴԱՏԱԽԱԶՈՒԹՅՈՒՆԻՑ ՍՏԱՑՎԵԼ ԵՆ ՆՈՐ ՓԱՍՏԱԹՂԹԵՐ

Օրերս տեղեկություն տարածվեց այն մասին, որ Կիպրոսում հաստատվել է, թե հայտնի օֆշորային փաստաթղթերի տակ դրված է Տիգրան Սարգսյանի ստորագրությունը: Որքանով է այդ տեղեկատվությունը համապատասխանում իրականությանըª փորձեցինք պարզել ՀՀ Գլխավոր դատախազության լրատվական ծառայությունից, որտեղից միայն հաստատեցին, որ Կիպրոսի դատախազությունից ստացել են նոր փաստաթղթեր, սակայն նախաքննական գաղտնիքից ելնելով` չեն կարող հրապարակել փաստաթղթերի  բովանդակությունից որեւէ տվյալ: Իսկ այս պատմությունից ամենաշատը տուժած, այժմ սնանկացման շեմին հայտնված գործարար Փայլակ Հայրապետյանը անդրադառնալով վերոնշյալ խոսակցություններին` ասաց.
-Ինձ ոչ ոք ոչինչ պաշտոնապես չի ասել այդ առումով, բայց հավատացեք, որ ես չեմ զարմանա, եթե իրոք նախկին վարչապետի ստորագրությունը լինի այդ օֆշորային գործարքների փաստաթղթերի վրա: Եթե նույնիսկ իրենն էլ չլինի, դա նրան պատասխանատվությունից չի ազատում, քանի որ հենց նա է այս ամենի կազմակերպիչը, այսպես ասած` գլխավորը: Այսօր, երբ իմ տարիներով ստեղծած ունեցվածքը ՙԱմերիա՚ բանկը վաճառում է, եւ իմ ունեցածի տերը դառնում են լրիվ ուրիշ մարդիկ, դրա մեղավորը նախ` վարչապետն է, հետո` նոր նրա կամակատար Աշոտ Սուքիասյանը: Նախկին վարչապետը էն մարդն է, որն իր անունը մաքուր պահելու համար ՙփուռը՚ տվեց իր ընկերոջը` Աշոտին, էլ էդ տեսակ մարդուց ի±նչ սպասես:
Անդրադառնալով իր կորցրած բիզնեսներին` գործարարը հավելեց.
- Ասում էին, բայց չէի հավատում, սակայն արդեն հավաստի աղբյուրներից տեղեկացա, որ իմ բիզնեսներից մեկը` Գաջեգործների 1/1 հասցեում գտնվող նախկին ՙԷրեբունի՚ միավորման տարածքը` ՙԱկվա Մարի լայթ՚ ՍՊԸ-ն գնել է Մհեր Սեդրակյանը: Քանի որ ինձ պատկանող ողջ գույքն արգելանքի տակ է, այն շատ էժան գնով գնվել է ՙԱմերիա՚ բանկից: Այնտեղ 800 աշխատատեղ էր ստեղծված` ադամանդագործության, ոսկերչության եւ տրիկոտաժի համար: էսքան բաներ իմանալուց հետո մտածում եմ` ինչ օգուտ, որ էդ ստախոսներին պատասխանատվության ենթարկեն, չէ որ մինչեւ էդ հնարավոր է, որ իմ ողջ ունեցվածքը բանկը վաճառի:

ԻԼՈՆԱ ԱԶԱՐՅԱՆ