«ՄԵՆՔ ԼԻՆԵԼՈՒ ԵՆՔ ԿԱՌՈՒՑՈՂԱԿԱՆ ԸՆԴԴԻՄՈՒԹՅՈՒՆ»

«ՄԵՆՔ ԼԻՆԵԼՈՒ ԵՆՔ ԿԱՌՈՒՑՈՂԱԿԱՆ ԸՆԴԴԻՄՈՒԹՅՈՒՆ»

Վերջին շրջանում «Օրինաց երկիր» կուսակցության շուրջ հնչող տեսակետների, նրանց ներքաղաքական քայլերի ու անելիքների մասին «Իրավունքը» զրուցեց ԱԺ ՕԵԿ խմբակցության պատգամավոր ԼԵՎՈՆ ԴՈԽՈԼՅԱՆԻ հետ:
-Պարոն Դոխոլյան, ՕԵԿ-ը դառնալով ընդդիմություն` հնարավո՞ր է, որ ձեւավորված ոչ իշխանական քառյակի մաս կազմի:
- Նախ` ես համարում եմ, որ քառյակը քաղաքական մարմին չէ, այլ քաղաքական կուսակցությունների կողմից ստեղծված ձեւաչափ: Մեր քաղաքական խորհուրդը հայտարարությունով է հանդես եկել` նշելով, որ մենք դուրս ենք գալիս կոալիցիայից եւ դառնում ենք ընդդիմություն, իսկ մնացած բոլոր մանրամասների մասին պարոն Բաղդասարյանն ամսի 25-ին, ինչպես եւ մենք խոստացել ենք, իր մամլո ասուլիսի ժամանակ կտա բոլոր հարցերի պատասխանները: Բայց, ամեն դեպքում, մենք լինելու ենք կառուցողական ընդդիմություն, անկախ նրանից, թե Դուք ինչպես եք պատկերացնում այդ ձեւաչափը:
-Օրինակ, ԱԺ «Ժառանգություն» խմբակցության պատգամավոր Թեւան Պողոսյանը նշում է, որ ՙՕրինաց երկիրը՚ նախ պետք է ապացուցի, որ ընդդիմություն է: Արդյո±ք այսօր ապացուցելու խնդիր ունեք:
- Յուրաքանչյուր քաղաքական կուսակցություն որոշակիորեն անցնում է քաղաքական ուղիով, եւ մենք մեր քայլերը, որ երբեւիցե արել ենք թե՛ ընդդիմության, թե՛ իշխանության մեջ, եղել են հստակ: Այսօր այն մարդիկ, ովքեր գալիս են մեզ հետ ու վստահում են, մենք նրանց ապացուցելու խնդիր չունենք: Մենք հստակ ենք եղել մեր դիրքորոշումներով թե՛ այն  ժամանակ, որ եղել ենք կոալիցիայի կազմում, թե՛ այսօր, որ կոալիցիայից դուրս ենք եւ համոզված եմ` մեր քաղաքական կառուցողական   մոտեցումները ապագայում նույնպես տեսանելի կլինեն:
- Եթե, այնուամենայնիվ, որեւէ կոմպրոմիսներ լինեն Հանրապետական կուսակցության կողմից, հնարավո՞ր է, որ «Օրինաց երկիրը» կրկին վերադառնա կոալիցիա կամ հայտարարի, որ կրկին իշխանություն է:
- Չեմ կարծում, նաեւ բացառում եմ Ձեր հարցը, որովհետեւ մենք 2008 թվականին ենք կոալիցիա մտել եւ այսօր, թե ինչու ենք կոալիցիայից դուրս եկել, ներկայացրել ենք հայտարարությամբ:
- ՕԵԿ-ական գյուղնախարար Սերգո Կարապետյանը կուսակցությունից դուրս գալու մասին իր հայտարարության մեջ, ըստ էության, նշել էր, որ Սերժ Սարգսյանի ծրագրերն իրականացնելու համար էր մտել ՕԵԿ, եւ դրանով է պայմանավորված, որ հիմա դուրս է գալիս: Որքանո՞վ է ընդունելի Ձեզ համար այսպիսի հայտարարությունը:
- Կարծում եմ` որոշումն իրենցն է, եւ դուրս գալու կամքն էլ է իրենցը: Մեր բոլոր նախկին նախարարներն իրենց հայտարարություններով հանդես են եկել, եւ դա իրենց որոշումն է, իրենց նպատակահարմարության հարցն է:
- Շուտով սպասվում է, որ կառավարության ծրագրի հաստատումը քվեարկության կդրվի խորհրդարանում, որին քառյակը որոշել էր անվստահություն հայտնել: Այս հարցում նոր ընդդիմություն դարձած ՕԵԿ-ը կաջակցի՞ ընդդիմությանն ու այլընտրանքին:
- Նախագիծը երբ լինի, մենք կծանոթանանք ու այն ժամանակ կկարողանանք կարծիք հայտնել:
- ՕԵԿ-ի կողմից ծայրահեղ ընդդիմադիր կեցվածք սպասելի՞ է խորհրդարանում:
- Ճիշտն ասած, ես ընդդիմությունը կամ իշխանությունը որոշակիորեն դասակարգերի չեմ բաժանում` ծայրահեղ, ծայրագույն կամ ռադիկալ... Համարում եմ, որ մենք միշտ կառուցողական ենք եղել թե՛ կոալիցիայի մեջ, թե՛ ընդդիմության մեջ, եւ ապագան նաեւ որոշակի հարցերի պատասխանը կտա:
- Քաղաքական վերլուծաբանները տեսակետներ էին հնչեցնում, որ Արեւմուտքը ցանկանում էր ՀՀ նախկին վարչապետ Տիգրան Սարգսյանին փոխարինել Արթուր Բաղդասարյանով: Արեւմուտքի կողմից նման շահագրգռվածություն կա՞ր:
- Յուրաքանչյուր անձ, քաղաքական գործիչ կամ  կուսակցություն վերջին օրերին տարբեր հրապարկումներով, նաեւ տարբեր կարծիքներով է հանդես եկել: Մեր կարծիքը հայտնել է մեր քաղաքական խորհուրդը, եւ  նպատակահարմար չեմ համարում մեկնաբանել յուրաքանչյուր քաղաքացու, վերլուծաբանի կամ գործընկեր պատգամավորների ասածը:
- Ձեր խմբակցության ղեկավար Հեղինե Բիշարյանը օրերս կոպիտ հայտարարություն էր արել` ասելով, որ առանձին-առանձին անդրադառնալու է բոլորին: Ըստ Ձեզ, ո՞ւմ նկատի ունի տիկին Բիշարյանը ՀՀԿ-ի՞ն, թե՞ ընդդիմության հնչեցրած կարծիքները:
- Ես գտնում եմ, որ դա վերաբերում էր բոլորին, ով «Օրինաց երկիր» կուսակցության մասին ոչ կոռեկտ դիրքորոշում է հայտնել, այդ թվում` նաեւ  ՀՀԿ-ին:

ՀՐԱՆՏ ՍԱՐԱՖՅԱՆ