ՈՒՂՂԱՓԱՌ ԵԿԵՂԵՑԻՆ ԴԵՄ Է «ԽՏՐԱԿԱՆՈՒԹՅԱՆ ԴԵՄ» ՕՐԵՆՔԻՆ

ՈՒՂՂԱՓԱՌ ԵԿԵՂԵՑԻՆ ԴԵՄ Է «ԽՏՐԱԿԱՆՈՒԹՅԱՆ ԴԵՄ» ՕՐԵՆՔԻՆ

«Ի վերջո, խտրականության դեմ օրենք մտավ վրացական պառլամենտ եւ այս պահի դրությամբ առաջին ընթերցմամբ ընդունվել է այն ու հնարավոր է որոշակի փոփոխություններից հետո երկրորդ ընթերցմամբ հաստատվի», - ասուլիսի ժամանակ անդրադառնալով Վրաստանում տեղի ունեցող ներքաղաքական վերջին զարգացումներին` նշեց Վրաստանի հարցերով փորձագետ Ջոնի Մելիքյանը: Ապա նկատեց. «Այդ օրենքին դեմ են դուրս գալիս ուղղափառ եկեղեցին, քանի որ իրենք հայտարարում են, որ ավանդական վրացական ընտանիքին է այն զուտ հարված տալու, չնայած նրան, որ իշխանությունները հայտարարում են, թե իրենք որոշ այլ կոնսենսուսի կգնան»: Ասուլիսի ժամանակ եւս մի ուշագրավ հայտարարություն արեց Ջ.Մելիքյանը. «Քանի որ այս պահի դրությամբ սահմանադրական միջգերատեսչական խորհուրդ է ստեղծվել եւ իրենք սահմանադրական ռեֆորմ են պատրաստում, նոր սահմանադրության մեջ նախատեսել են մեկ կետ մտցնել, որով կֆիկսվի, որ ամուսնությունը տղամարդու եւ կնոջ միջեւ կարող է լինել: Նրանք ուզում են այդ ամենը ամրագրել սահմանադրության մեջ, որ այդ օրենքի ընդունելուց հետո որոշակի սխալմունքներ չլինեն»: «Իրավունքի» այն հարցին, թե արդյո՞ք այդքան խայտառակ ծայրահեղ վիճակում է գտնվում մեր հարեւան երկիրը, քանի որ կարիք ունի սահմանադրությամբ ամրագրել, որպեսզի իրենց համար պարզ լինի, որ ամուսնությունը միայն կնոջ եւ տղամարդու միջեւ է հնարավոր, բանախոսը պարզաբանեց. «Հիմնականում այդ վատ իրավիճակով չէ պայմանավորված: Քանի որ այս պահի դրությամբ վրաց ուղղափառ եկեղեցին բավականին ազդեցիկ է Վրաստանում եւ ԵՄ ասոցացման պայմանագրի շրջանակներում կային պարտականություններ, որոնք իրենք պետք է իրականացնեին, այդ հիմնական կետերից մեկն էլ այդ օրենքի ընդունումն էր: Նույնիսկ որոշ ժամանակ առաջ Ֆյուլեն այցելելով Վրաստան` հանդիպեց Պատրիարքին ու բացատրեց, որ իրենք չենք վնասելու եկեղեցուն եւ այլն: Եվ իշխանությունները փորձում են այլընտրանքներով ինչ-որ ձեւով եկեղեցուն ցույց տալ, որ իրենք այդպիսի բաներ չեն անելու: Չնայած դրա վտանգն էլ կա. եթե «Խտրականության դեմ» օրենք է ընդունվում, ուրեմն` երբ ինչ-որ միասեռականներ փորձեն նախաձեռնությամբ դուրս գալ, որ իրենց ամուսնությունը պետք է ամրագրվի, այդ ամենը խտրականություն կարող է ընկալվի: Դրա համար իրենք փորձում են սահմանադրության մեջ այդ ամենը ֆիկսել, որ հետո խնդիրներ չլինեն»:

ՀՐԱՆՏ ՍԱՐԱՖՅԱՆ