ՈՒԿՐԱԻՆԱԿԱՆ ԴԵՊՔԵՐՆ ԱՐԱԳԱՑՐԵՑԻՆ ՎՐԱՍՏԱՆԻ ԿՈՂՄԻՑ ԵՄ ԱՍՈՑԱՑՄԱՆ ՊԱՅՄԱՆԱԳՐԻ ՍՏՈՐԱԳՐՈՒՄԸ

ՈՒԿՐԱԻՆԱԿԱՆ ԴԵՊՔԵՐՆ ԱՐԱԳԱՑՐԵՑԻՆ ՎՐԱՍՏԱՆԻ ԿՈՂՄԻՑ ԵՄ ԱՍՈՑԱՑՄԱՆ ՊԱՅՄԱՆԱԳՐԻ ՍՏՈՐԱԳՐՈՒՄԸ

«Ապրիլի 14-ին տեղի ունեցավ Եվրամիության արտգործնախարարների հանդիպումը Լյուքսեմբուրգում, որտեղ ուկրաինական դեպքերից հետո անդրադարձան Մոլդովային եւ Վրաստանին»,- անդրադառնալով հարեւան Վրաստանի վերջին արտաքին քաղաքական զարգացումներին` այսօր ասուլիսի ժամանակ նշեց Վրաստանի հարցերով փորձագետ ՋՈՆԻ ՄԵԼԻՔՅԱՆՆ ու հավելեց. «Այնտեղ հայտարարվեց, որ Վրաստանը եւ Մոլդովան կարող են ժամանակի ընթացքում դառնալ Եվրամիության անդամ երկիր: Խոսվեց նաեւ ԵՄ Ասոցացման պայմանագրի կարեւորության մասին, որը նախատեսվում է արդեն ստորագրել ոչ ուշ, քան հունիս ամսին: Հիշեցնեմ, որ սպասվում էր, թե սեպտեմբերից ոչ շուտ կստորագրվի, բայց ուկրաինական դեպքերն ազդեցին այդ ամենի վրա»: Ըստ Ջ.Մելիքյանի հետաքրքրական հարաբերություններ են ձեւավորվում ՆԱՏՕ-յի շրջանակներում, ինչը եւս կարելի է ուղղակի կապել ուկրաինական իրադարձությունների հետ. «Ապրիլի 10-ին հանդիպում եղավ ՆԱՏՕ-յի շրջանակներում եւ նույնիսկ ԱՄՆ պետքարտուղարի օգնական Վիկտորիա Նուլանդից հնչեց հայտարարություն, որ ԱՄՆ-ն սատարում է Վրաստանին ՄԱՊ տրամադրելու գործընթացին: Բայց կան որոշ ՆԱՏՕ անդամ երկրներ, որոնք դեռեւս վստահ չեն, որ այդ քայլը պետք է արվի: Խոսվում է, որ գալիք ՆԱՏՕ-յի գագաթնաժողովին, որը տեղի կունենա Ուելսում, Վրաստանն աշխատելու է, որ իրեն շնորհեն այդ, սակայն այս պահի դրությամբ այդքան էլ վստահ չեմ, որ դա կարող է տեղի ունենալ»: Բանախոսը նաեւ խոսեց ռուս-վրացական հարաբերությունների մասին. «ՄԱՊ շնորհելը Վրաստանին Ռուսաստանի համար անընդունելի է, որովհետեւ դա նշանակում է, որ ՄԱՊ ստանալուց հետո այդ երկիրը հնարավոր է, որ ապագայում դառնա ՆԱՏՕ անդամ երկիր: Պարզ է, որ կարող է լինել կամ չլինել նման բան, բայց այդ ամենը զուտ մեսիջ է, ինչը շատ բացասական կարող են ռուսներն ընկալել»:

ՀՐԱՆՏ ՍԱՐԱՖՅԱՆ