ՎՐԱՑԻ ԵՐԿԱԹՈՒՂԱՅԻՆՆԵՐՆ ԱՋԱԿՑՈՒՄ ԵՆ ԱԲԽԱԶԱԿԱՆ ԵՐԿԱԹՈՒՂՈՒ ՎԵՐԱԳՈՐԾԱՐԿՄԱՆԸ

ՎՐԱՑԻ ԵՐԿԱԹՈՒՂԱՅԻՆՆԵՐՆ ԱՋԱԿՑՈՒՄ ԵՆ ԱԲԽԱԶԱԿԱՆ ԵՐԿԱԹՈՒՂՈՒ ՎԵՐԱԳՈՐԾԱՐԿՄԱՆԸ

Վերջին ժամանակներս խոսակցություններն աբխազական եւ նույնիսկ թուրքական երկաթուղիների վերագործարկման ու Իրան-Հայաստան երկաթուղու շինարարության մասին գնալով ավելի հաճախակի են դառնում: Անգամ պարբերաբար հնչում են այդ ծրագրերի հետ կապված կոնկրետ ժամկետներ: Եվ ահա Հայաստանի համար կենսական նշանակություն ունեցող այդ ծրագրերի հետ կապված մեզ իր մոտեցումները ներկայացրեց ՙՀարավկովկասյան երկաթուղի՚ ընկերության գլխավոր տնօրեն Վիկտոր Ռեբեցը.
-Իհարկեª այդ ամենը նախ քաղաքական լուծումներ են պահանջում: Բայց մենք էլ, ամեն դեպքում նախապատրաստվում ենք, որ քաղաքական լուծումներ լինելու դեպքում տեխնիկապես պատրաստ լինենք այդ ծրագրերին: Օրինակ թուրքական ուղղությամբ, ինչպես հայտնի է, հանգուցային միակ կետը ՙԱխուրյան՚ կայարանն է, որն այսօր միանգամայն պատրաստ է աշխատել: Եվ նույնիսկ անցած տարի այդ փաստը մատնացույց ենք արել թուրք գործարարներին, որից հետո թուրք երկաթուղայինները իրենց մոտ սկսեցին այդ ուղղությամբ վերականգնման աշխատանքներ իրականացնել: Անցած շաբաթ ես Ստամբուլում էի եւ նման այցերի միջոցով փորձում ենք թուրք երկաթուղայինների հետ ընդհանուր մոտեցումներ գտնել, միգուցե քաղաքագետներին, բիզնեսին մատնացույց անել այդ փոխադարձ շահերը: Ամեն դեպքում հուսանք, որ թուրք երկաթուղայինների կողմից մեզ տված խոստումները կիրականանան:
Ինչ վերաբերում է իրանական ուղղությանը, դա, իհարկե շատ հեռանկարային ծրագիր է: Այն համաձայնագիրը, որը ստորագրվեց անցած տարի, ընթացքի մեջ է, մշակվում է տեխնիկա-տնտեսական հիմնավորումը: Ես ինքս երկու անգամ այցելել եմ Իրան, ունեցել մի շարք հանդիպումներ: Ինչպես մեր, այնպես էլ իրանական կողմն այս հարցով իրականացրել է բավականին լուրջ ուսումնասիրություններ: Այս երկխոսությունը, իհարկե, դեռ ավարտված չէ, ու այն պետք է շարունակել: Եվ, համոզված եմ, որ սա միանգամայն հեռանկարային ծրագիր է, եւ որ այդ երկաթուղին կարող է լինել միանգամայն մրցակցային տվյալ տարածաշրջանում առկա եւ բավականին զարգացած ողջ տրանսպորտային համակարգում:
- Առավել եւս, եթե այն աբխազական ուղղությամբ կապվի Ռուսաստանի հետ:
- Այդ երկու ծրագրերը նույն շղթայի օղակներն են: Ընդ որում, եթե իրանական ուղղությամբ դեռ լուրջ աշխատանք է պետք կատարել երկաթուղու կառուցման համար, աբխազական ուղղությամբ պահանջվող ներդրումներն ու աշխատանքներն անհամեմատ քիչ են: Այս ուղղությամբ էլ մենք սերտորեն համագործակցում ենք վրացական մեր գործընկերների հետ, գիտենք, որ նրանց դիրքորոշումը հստակորեն ուղղված է այդ ծրագրի բացարձակ աջակցությանը: Իրականացնում ենք տեխնիկական բնույթի քննարկումներ, այդ առումով աստիճանաբար ընդհանուր հայտարարի ենք գալիս: Դե իսկ մնացածը մնում է քաղաքական գործիչներին: