«ՕՐԻՆԱՑ ԵՐԿԻՐԸ» ԴԵՌ ՊԵՏՔ Է ԳՈՐԾՈՂՈՒԹՅՈՒՆՆԵՐՈՎ ԱՊԱՑՈՒՑԻ, ՈՐ ԸՆԴԴԻՄՈՒԹՅՈՒՆ Է»

«ՕՐԻՆԱՑ ԵՐԿԻՐԸ» ԴԵՌ ՊԵՏՔ Է ԳՈՐԾՈՂՈՒԹՅՈՒՆՆԵՐՈՎ ԱՊԱՑՈՒՑԻ,
ՈՐ ԸՆԴԴԻՄՈՒԹՅՈՒՆ Է»

Ի զարմանս մի շարք քաղաքական ուժերի, այսօր ընդդիմադիր է իրեն հռչակում«Օրինաց երկիրը»: Վերջիններս հնարավո՞ր է, որ տեղ գտնեն ձեւավորված ոչ իշխանական քառյակում ու արդյունքում ստացվի հնգյակ, «Իրավունքը» պարզեց ԱԺ «Ժառանգություն» խմբակցության պատգամավոր ԹԵՎԱՆ ՊՈՂՈՍՅԱՆԻՑ.
-Պետք է չորս ուժերով հարցը քննարկենք, բայց մինչ այդ «Օրինաց երկիրը» դեռ պետք է իր գործողություններով ապացուցի, որ ընդդիմություն է: Միայն ասելով չէ, թե ընդդիմադիր եմ: Եթե ՕԵԿ-ը ընդդիմադիր վարք դրսեւորի, բնականաբար, միշտ էլ հնարավոր է, որ համագործակցելու եզրեր գտնվեն: Իսկ թե, ի վերջո, կդառնա քառյակ, հնգյակ կամ ընդհանրապես Հանրապետականն էլ ընդդիմությանը կմիանա ու այդպես կդառնանք վեց ուժերով հզոր ընդդիմություն, կյանքը ցույց կտա: Իսկ այսօրվա դրությամբ ասել, որ հնարավոր է, թե` ոչ, պետք է նշեմ, որ ամեն ինչ էլ հնարավոր է: Ուղղակի, սա կանխատեսումների խնդիր չէ, դա իրենց ընտրությունը պետք է լինի:
- Այս դեպքում, երեք նախագահների օրոք այս ու այն կողմ շուռումուռ եկած ուժի հետ համագործակցելը, արդյո՞ք կարող է նպատակահարմար լինել:
- Քառյակում կա ՀԱԿ-ը, որը ժամանակին եղել է իշխանություն, հետո ընդդիմություն, «Բարգավաճ Հայաստանը», որը ժամանակին եղել է իշխանություն, հիմա` այլընտրանք, կա նաեւ ՀՅԴ-ն, որը նույնպես ժամանակին եղել է ընդդիմություն, հետո դարձել է իշխանություն, ապա կրկին ըննդիմություն, եւ կա «ժառանգությունը», որը միշտ եղել է ընդդիմություն: Այսինքն` կան քաղաքական ուժեր, որ նմանատիպ ճանապարհ են անցել, եւ հիմա ասել, թե ինչ է եղել անցյալում, երեւի այդքան էլ ճիշտ չէ: Ուղղակի, դա տեղեկություն է, որը պետք է իմանանք, հասկանանք, գիտակցենք, իսկ մնացածը ապագան միշտ պետք է պայմանավորվի ապագա վարքագծի շրջանակներում: Բոլորս գիտենք` ով ինչ է անում, եւ ըստ իրենց վարքագծի` հասկանալի կլինի, թե ինչպես ենք աշխատելու: Իսկ հիմա ասել, թե կոնկրետ մեկի հետ չենք աշխատելու, մի քիչ սխալ է, որովհետեւ խորհրդարանում էլ, այդպես չենք աշխատում: Եղել են օրենքներ, որ ողջ խորհրդարանը միաձայն է քվերակել, օրենքներ էլ եղել են, որ տարբեր ձեւ ենք քվեարկել: Այնպես որ, ապագայի հարց է, որոնց խնդիրը «եթե»-ների մեջ է, ու կանխատեսումներ անելը անշնորհակալ գործ է:

ՀՐԱՆՏ ՍԱՐԱՖՅԱՆ