Ի ՀԻՇԱՏԱԿ ՀԱՅՈՑ ՄԵԾ ԵՂԵՌՆԻ

Ի ՀԻՇԱՏԱԿ ՀԱՅՈՑ ՄԵԾ ԵՂԵՌՆԻ

Ապրիլի 22-ին Կոմիտասի անվան կամերային երաժշտության տանը տեղի կունենա Հայաստանի պետական կամերային նվագախմբի և Երևանի պետական կամերային երգչախմբի  համերգը` ի  հիշատակ Հայոց  Մեծ եղեռնի:
Առաջին անգամ Հայաստանում կհնչի Վիեննայի  Մխիթարյան վանքի «Այտընեան- Բէօմ» պատարագը:  Համերգը կղեկավարի  Հայաստանի պետական կամերային նվագախմբի գեղարվեստական ղեկավար  և գլխավոր  դիրիժոր Վահան Մարտիրոսյանը:

Արսեն Այտընեանը ծանոթ է հայագիտական շրջանակներում որպես մեծ հայագետ և հայտնի է գրաբարի և  աշխարհաբարի հոյակապ աշխատություններով:  Բազմաթիվ հայագիտական աշխատանքների,  հայերեն տառատեսակների և զարդագրերի հեղինակ է, և հայտնի է իր հոյակապ հայատառ մեծ աշխարհագնդով,/գլոբուս/,  որը այսօր Վիեննայի Մխրթարյան միաբանության մատենադարանի զարդն է համարվում:

Բացի այդ նա օժտված էր բազմաթիվ տաղանդներով:  Ծնված լինելով Պոլսում, կրթությունը  ստացել է տեղի  Մխիթարյան վարժարանում, այնուհետ կրթությունը շարունակել է Վիեննայի Մխիթարյան վանքում:  Տիրապետել է բազմաթիվ լեզուների, զբաղվել է աստղագիտությամբ, երաժշտությամբ և նկարչությամբ: 1845 թ.-ին, 22 տարեկանում օծվել է կուսակրոն քահանա Մխիթարյան միաբանությունում,  իսկ 1886թ-ին`  ստացել է արքեպիսկոպոսական օծում:

Այտընեանը Վիեննայի վանքում հնչեցրած պատարագները  մշակել է եվրոպական նոտագրությամբ, այնուհետ  Վայսի օգնությամբ վերածել խառը երգչախմբի համար քառաձայնի: Ավելի ուշ Յոզեֆ Բէօմը ավելացրել է նվագախմբի բաժինը ՝ լարային, փողային և հարվածային գործիքներով:

Երգչախմբի և նվագախմբի մասնակցությամբ  այս  պատարագը առաջին անգամ կատարվել է 1887-ին Այտընեանի եպիսկոպոսական օծման առթիվ:

Վ. ՄՈՒՐԱԴՅԱՆ