ԴԱՀԿ-Ն 8 ՏԱՐԻ ՊԱՐՏԱԿՈՒՄ Է ԵՐՎԱՆԴ ԶԱԽԱՐՅԱՆԻ ԱՊՕՐԻՆՈՒԹՅՈՒՆԸ` ՀՕԳՈՒՏ ՕԼԻԳԱՐԽԻ

ԴԱՀԿ-Ն 8 ՏԱՐԻ ՊԱՐՏԱԿՈՒՄ Է ԵՐՎԱՆԴ ԶԱԽԱՐՅԱՆԻ ԱՊՕՐԻՆՈՒԹՅՈՒՆԸ` ՀՕԳՈՒՏ ՕԼԻԳԱՐԽԻ

ՀՀ քաղաքացի Լյուբով Սուրենի Փիլոյանը ՀՀ նախագահ Սերժ Սարգսյանին դիմել է բաց նամակով.
ՙԵրեւանի քաղաքապետարանի եւ Դատական ակտերի հարկադիր կատարման (ԴԱՀԿ) ծառայության կողմից օրենքի կոպիտ խախտումների վերաբերյալ, որոնք ելնելով Արա Աբրահամյանին պատկանող ընկերության շահերից, 8 տարվա ընթացքում անհրաժեշտ միջոցներ չեն ձեռնարկում 29.05.2006թ. 05-3374 դատական կատարողական թերթով իմ օրինական պահանջները կատարելու համար:
Սկսած 2005 թվականից, Արամի փողոց 38 հասցեով սեփական տան ինձ պատկանող 1/3 բաժնեմասը վերցվել է ՙպետական կարիքների համար՚` հօգուտ ՙՍոգլասիե Արմենիա՚ ՓԲԸ-ի, իսկ փոխարենը, ըստ հաշտության համաձայնության, ես քաղաքապետարանից պետք է ստանամ նույն հասցեով հողատարածքը (332.6 քառ.մ.) որպես պետության կողմից իմ սեփականությունը վերցնելու դիմաց փոխհատուցում:
Չնայած նրան, որ հաշտության համաձայնությունը 16.12.2005թ. հաստատվել է Վերաքննիչ դատարանի կողմից եւ 21.04.2006թ. վավերացվել բարձրագույն` Վճռաբեկ դատարանի կողմից, ես 8 տարիների ընթացքում ստիպված եմ պայքարել դատարաններում եւ պաշտպանելով իմ իրավունքները` մի քանի անգամ անցնել բոլոր դատական ատյաններով, պաշտպանվելով քաղաքապետարանի եւ ԴԱՀԿ ծառայության կամայականություններից…
07.03.2013թ. Վարչական դատարանը իմ հայցով ՎԴ 2350/05/11 գործով որոշում ընդունեց կատարողական վարույթի հերթական դադարեցման դեմ եւ նորից պարտավորեցրեց ԴԱՀԿ ծառայությանը` հարկադիր կարգով կատարել ինձ հողատարածքի (332.6 քառ.մ.) տրամադրման մասով 29.05.2006թ. 05-3374 կատարողական թերթի պահանջը:
Այդ դատական որոշման հիման վրա 17.05.2013թ. կատարողական վարույթը վերսկսվել է, սակայն ԴԱՀԿ ծառայության աշխատակիցները շարունակում էին անգործություն ցուցաբերել, առաջին անգամ վկայակոչելով այն, որ ինձ համար նախատեսված հողատարածքը վաճառվել է ՙՍոգլասիե Արմենիա՚ ՓԲԸ-ին: Դա նշանակում է, որ դատաքննությունների ժամանակ քաղաքապետարանը 2008թ. տվյալ ՙգործարքը՚ գիտակցաբար թաքցնում էր, քանի որ պետական փոխհատուցման վաճառքը անօրինական է եւ հակասում է Վերաքննիչ դատարանի եւ Վճռաբեկ դատարանի որոշումներին: 332.6 քառ.մ. հողատարածքի անօրինական վաճառքի փաստը բացահայտվել է միայն իմ հարցումից եւ 2012թ. Անշարժ գույքի կադաստրի պետական կոմիտեի պաշտոնական պատասխանից հետո:
Փաստորեն, Հայաստանի բարձրագույն դատարանների` ինձ 332.6 քառ.մ. տրամադրելու վերաբերյալ որոշումների առկայության պայմաններում, Երեւանի քաղաքապետ Ե. Զախարյանը, չարաշահելով իր ծառայողական դիրքը, դատարանից թաքուն 27.05.2008թ. կատարել է աննախադեպ անօրինական ակտ, կնքելով Արա Աբրահամյանին պատկանող ընկերության` ՙՍոգլասիե Արմենիա՚ ՓԲԸ-ի հետ 332.6 քառ.մ. իմ փոխհատուցումը ներառող հողատարածքի ուղղակի վաճառքի պայմանագիր:
Հասկանալով, որ քաղաքապետարանի եւ ԴԱՀԿ աշխատակիցների կամայականության պայմաններում իմ պահանջների կատարումը անհնար է առանց նոր դատաքննության, իմ կողմից հայց է ներկայացվել վարչական դատարան` քաղաքապետարանի ՙգործարքը՚ անվավեր ճանաչելու եւ անօրինական կերպով վաճառված 332.6 քառ.մ. հողատարածքը գրանցված իրավունքներից ազատելու վերաբերյալ:
27.02.2014թ. ՀՀ Վերաքննիչ վարչական դատարանը ՎԴ 2085/05/12 գործով պաշտպանեց իմ օրինական իրավունքները եւ իր որոշմամբ, իմ փոխհատուցման (332.6 քառ.մ.) վաճառքի մասով, քաղաքապետարանի եւ ՙՍոգլասիե Արմենիա՚ ՓԲԸ-ի միջեւ գործարքը ճանաչեց անօրինական եւ անվավեր, այդպիսի գործարքի հետեւանքների կիրառմամբ՚:
Սակայն Երվանդ Զախարյանի եւ ԴԱՀԿ-ի թեթեւ ձեռքով հօգուտ օլիգարխ Արա Աբրահամյանի արված ՙբեսպրեդելը՚ չի վերացվել, ու ավելին, գործընթացը իներցիայով շարունակվում է, եւ մարտի 27-ից ՀՀ Վճռաբեկ դատարանում կա բողոք ընդդեմ Վերաքննիչ վարչական դատարանի` հօգուտ քաղաքացու ընդունված որոշման: Այնուհետ Լ. Փիլոյանն իր բաց նամակում նշում է. ՙԱյսպիսով, փաստորեն պետության անունից.
1. Երեւանի քաղաքապետարանը (ԾԻԳ) 2005թ. վերցրել եւ քանդել է իմ անշարժ գույքը` հօգուտ ՙՍոգլասիե Արմենիա՚ ՓԲԸ-ի, փոխարենը պարտավորվելով ինձ տրամադրել պետական փոխհատուցում նույն հասցեով Արամի փողոց 38, 332.6 քառ.մ. հողատարածքը:
2. Երեւանի քաղաքապետ Ե. Զախարյանը անտեսելով Վերաքննիչ դատարանի եւ Վճռաբեկ դատարանի որոշումներով հաստատված 2005թ. կնքված հաշտության համաձայնության պայմանները, 2008թ. վաճառեց ինձ համար նախատեսված 332.6 քառ.մ. Արա Աբրահամյանի ընկերությանը` ՙՍոգլասիե Արմենիա՚ ՓԲԸ-ին՚:
Ըստ Լ. Փիլոյանի` 8 տարի ոտնահարվում են 332.6 քառ.մ. նկատմամբ իր իրավունքները, չեն վերացվում Երվանդ Զախարյանի անօրինականության հետեւանքները ՙՍոգլասիե Արմենիա՚ ՓԲԸ-ի օգտին եւ անտեսելով 05-3374 կատարողական թերթի պահանջը` ՙԴԱՀԿ ծառայությունը, դատական կատարողական թերթի առկայության պայմաններում, 2006թ. սկսած, կատարողական վարույթի իր անօրինական դադարեցումներով եւ անգործությամբ, 8 տարի է՚, ինչ թույլ է տալիս խուսափել 332.6 քառ.մ. տարածքի` օրինական տիրոջը հարկադիր տրամադրումից:
Քաղաքացին, դիմելով ՀՀ նախագահին եւ 8 տարվա ընթացքում տեղի ունեցածը որակելով ՙռեյդերական գործարք՚, որն այժմ փորձ է արվում ՙՀՀ բարձրագույն Վերաքննիչ դատարանի որոշմամբ օրինականացնել՚,  խնդրում է կասեցնել կոպիտ խախտումները, որոնք արտահայտվում են` չկատարելով ՙիմ օգտին ընդունված, օրինական ուժի մեջ մտած դատական որոշումները, եւ հակաօրինական կերպով գործում են Արա Աբրահամյանի եւ ՙՍոգլասիե Արմենիա՚ ՓԲԸ-ի շահերի օգտին... Խնդրում եմ ցուցում տալ, որպեսզի պետության կողմից իմ սեփականությունը վերցնելու համար որպես փոխհատուցում հողատարածքի (332.6 քառ.մ.) փոխանցումը ինձ վերջապես տեղի ունենա եւ իմ` որպես 05-3374 կատարողական թերթով բռնագանձողի պահանջները բավարարվեն՚: