Զարմանալի բացահայտումներ են արել ռուս լրագրողներն ու փորձագետները:

Զարմանալի բացահայտումներ են արել ռուս լրագրողներն ու փորձագետները: Դեռ մարտի 31-ին ՌԴ ԱԳՆ-ն իր մտահոգությունն էր հայտնել, որ Կիեւում իշխանություն վերցրած մայդանցիները Ուկրաինայի հարավ-արեւելքում բողոքները ճնշելու նպատակով հրավիրել են վարձկանների Greystone Limited մասնավոր ռազմական ձեռնարկությունից: Այնուհետ եղավ տեղեկատվություն, որ ԱՄՆ Կենտրոնական հետախուզական վարչության տնօրեն ՋՈՆ ԲՐԵՆԱՆԸ կեղծ փաստաթղթերով ժամանել էր Կիեւ` որոշում կայացնելու, թե ինչպես պետք է ճնշվի Հարավ-Արեւելքը: Կիեւը դա փրփուրն ի բերան հերքում էր, սակայն այցի փաստը հաստատեց ամերիկյան կողմը: Եվ ահա ի հայտ եկավ առավել քան զարմանահրաշ, ապշեցուցիչ հանգամանք` պարզվում է ԱՄՆ-ի ՙգլխավոր լրտեսը՚ Կիեւ էր ժամանել, քանի որ Դոնեցկի մարզում անհետ կորել են ԱՄՆ քաղաքացի 20 վարձկաններ` Greystone Limited-ից, որոնք ժամանակին Իրաքում խաղաղ ցուցարարների գազանային գնդակահարությամբ հայտնի Blackwater մասնավոր ռազմական ձեռնարկության վերակազմավորված տեսակն են: Դե ինչ, զարմանալով հանդերձ մնում է ամեն մի չափ ու սահման կորցրած ամերիկացիներին հիշեցնել, որ ռազմագերիների իրավունքների մասին միջազգային համաձայնագրերը չեն տարածվում վարձկանների վրա, եւ եթե մի օր համացանցում հայտնվի այդ 20-ի կտորտանքների պատկերը, ոչ ոքի դրա համար մեղադրելու օրինական հիմքեր չեն լինելու...
Գարնանային սրացումներն արտահայտվում են եւ քաղաքական ոլորտում: Այսպես, ՀԱԿ խմբակցության ղեկավար ԼԵՎՈՆ ԶՈՒՐԱԲՅԱՆԸ զարմանալիորեն կորցրել է գարնանային վառ գույներով եւ բնության զարթոնքով ուրախանալու հատկությունը, ու նրա աչքին ամենուրեք շախմատային կոմբինացիաներ են երեւում. ՙԱյս պահին Սերժ Սարգսյանը շախմատային լեզվով ասած, հայտնվել է ցուգցվանգի մեջ, իսկ ժողովուրդն էլ ցայտնոտի մեջ է հայտնվել ոչ լեգիտիմ իշխանության ձեռքին՚: Զարմանալի է, թե ինչպես այդ ՙոչ լեգիտիմը՚ դեռ կոշտուկ չի գոյացրել Լ. Զուրաբյանի լեզվին եւ նրան ունկնդրողների թմբկաթաղանթներին, սակայն զարմանալով, պետք է հորդորենք այդ խորապես դժբախտ գործչին` ժպտա աշխարհին, եւ աշխարհը քեզ կժպտա:
Սակայն գարնանային սրացումների անվիճելի ռեկորդակիրը, անկասկած, ռուսատյացության հողի վրա շեղված ԻԳՈՐ ՄՈՒՐԱԴՅԱՆՆ է: Ահա թե ինչ ենք հայտնաբերել համացանցում. ՙՄոսկվայի լրագրողական շրջանակներում տեղեկություն է տարածվում, որ Երեւանի մոտակայքում վերջերս խմբակային բռնաբարության է ենթարկվել Ռուսաստանից մի լրագրողուհի, խուլիգանական մղումներով, նրան ուղեկցող մեկ այլ ռուսաստանցի լրագրողի ներկայությամբ: Այս կապակցությամբ, քաղաքագետ Իգոր Մուրադյանը մեր հարցմանն ի պատասխան ասել է, որ բռնաբարությունը տեղի է ունեցել ոչ թե խուլիգանական մղումներով, այլ գաղափարական հողի վրա, եւ բռնաբարության միտքն առաջացել է միանգամից, այլ ոչ թե նախօրոք ծրագրված ու չարամտության ռեժիմում: Ռուսաստանցի լրագրողներն իրենց պահել են խիստ ճչացող ձեւով եւ վիրավորել են Հայաստանն ու հայ ժողովրդին՚: Ի±նչ լրագրողուհի, ի±նչ բռնաբարություն, այն էլ` ՙգաղափարական՚, եթե ռուսական ԶԼՄ-ները դրանից տեղյակ չեն, դեսպանատունը տեղյակ չէ, ոչ ոք բողոքներ չի ներկայացնում... Զարմանալով հանդերձ, մնում է ենթադրել, որ պարզապես Իգոր Մուրադյանը երազում տեսել է, որ գաղափարական հողի վրա ռուս լրագրողուհի է բռնաբարում եւ մինչեւ հիմա չի կարողանում դուրս գալ այդ երազի տպավորության ազդեցությունից:

Զարմացած է
ՀՈՎՀԱՆՆԵՍ ԳԱԼԱՋՅԱՆԸ