ՙԱՌԱՋԻՆ ԱՆԳԱՄ ՉԵՄՊԻՈՆ ԴԱՌՆԱԼԸ ՄԻ ՔԻՉ ՏԱՐԲԵՐ Է ԵՐԿՐՈՐԴ-ԵՐՐՈՐԴԻՑ՚

ՙԱՌԱՋԻՆ ԱՆԳԱՄ ՉԵՄՊԻՈՆ ԴԱՌՆԱԼԸ ՄԻ ՔԻՉ ՏԱՐԲԵՐ Է ԵՐԿՐՈՐԴ-ԵՐՐՈՐԴԻՑ՚

Ֆինլանդիայի Վանտա քաղաքում կայացած Եվրոպայի առաջնությունում oլիմպիական խաղերի բրոնզե մեդալակիր Արթուր Ալեքսանյանը երրորդ տարին անընդմեջ հռչակվեց հունահռոմեական ոճի ըմբշամարտի Եվրոպայի չեմպիոն: Հայ ըմբիշը պայքարից դուրս էր թողել ուկրաինացի, խորվաթ, գերմանացի, նորվեգացի մարզիկներին, իսկ եզրափակչում աշխարհի փոխչեմպիոնը ուժերը չափեց եւ 5:0 հաշվով վստահ հաղթանակ տարավ թուրք Չենկ Իլդեմի նկատմամբ: Եվրոպայի եռակի չեմպիոնի հետագա ծրագրերի մասին ՙԻրավունքը՚ հետաքրքրվեց ըմբիշի անհատական մարզիչ ԳԵՎՈՐԳ ԱԼԵՔՍԱՆՅԱՆԻՑ:
-ՙԻրավունքը՚ շնորհավորում է Ձեզ` Արթուրի չեմպիոն դառնալու կապակցությամբ, նախ` որպես հայր, ապա` որպես նրա անհատական մարզիչ:

- Շնորհակալ եմ...
- Ապրիլի 9-ին անցկացված ասուլիսում Արթուրը նշեց, որ յուրաքանչյուր հաղթանակից հետո ուրախանում է ինչպես առաջին անգամ, իսկ Դուք` որպես նրա մարզիչ, ի՞նչ կասեք` զգացմունքային առումով տարբերվո՞ւմ էր առաջին հաղթանակը երրորդից:
- Քանի որ Եվրոպայի եւ աշխարհի առաջնությունները տեղի են ունենում ամեն տարի, բացառությամբ օլիմպիական տարվա, այստեղ ամեն անգամ պետք է գնալ ապացուցելու, որ առաջինն ես: Արթուրը յուրաքանչյուր հաղթանակից ուրախանում է յուրովի, որովհետեւ մեկնում է միայն հաղթելու նպատակով: Թե° երկրորդ անգամ եւ թե° երրորդ անգամ շատ ուրախացավ իհարկե, բայց էմոցիաները այդքան ցույց չտվեց: Կարծում եմ, առաջին անգամ չեմպիոն դառնալը մի քիչ տարբեր է երկրորդ-երրորդից` էմոցիաներն ավելի շատ են: Իր ամեն հաղթանակի համար հպարտություն կա, ինձ համար կապ չունի` Արթուրը տասներորդ անգամ էլ չեմպիոն դառնա, հպարտությունն ու ուրախությունը նույնչափ կլինեն:
- Առջեւում աշխարհի առաջնությունն է, ինչ ծրագրեր ունի Եվրոպայի եռակի չեմպիոնն այս մրցաշարի հետ կապված:
- Թեեւ ծրագիր ասվածն այդքան էլ չեմ հասկանում, ասեմ, որ եթե մրցաշարին մասնակցում է այսպիսի արդյունքներ ցույց տվող մարզիկ, ուրեմն` պետք է մասնակցի միայն ոսկե մեդալ նվաճելու համար: Մինչ առաջնությունը նախապատրաստական փուլ կլինի, մայսի 12-ից կամ 13-ից կսկսվեն հավաքները, մինչ առաջնությունը երկու միջազգային մրցաշար էլ կլինի, ոչ թե արդյունքների կամ մրցանակների համար, այլ դրանք կկազմեն նախապատրաստական փուլի մի մասը:
- Արթուրը տարին սկսել է փայլուն հաղթանակներով` մրցակիցներին չզիջելով ոչ մի միավոր, ո:րն է այս հաղթական տարվա գլխավոր նպատակը:
- Աշխարհի առաջնությունը... Միավորներ չի տալիս մրցակիցներին, ու թվում է, թե անսխալ է գործում, բայց ինձ համար, որպես նրա մարզչի, Արթուրը դեռ չի հասել այն վիճակին, որը ես եմ ուզում: Կփորձենք նրան այդ վիճակին հացնել Աշխարհի առաջնութան համար

ՔՐԻՍՏԻՆԵ ՊԵՏՐՈՍՅԱՆ