ՙՄՇԱԿՈՒԹԱՅԻՆ ԱՋԱԲՍԱՆԴԱԼ, ԹԵ ՄՇԱԿՈՒՅԹԻ ՆՈՐ ՆԱԽԱՐԱՐ

ՄՇԱԿՈՒԹԱՅԻՆ ԱՋԱԲՍԱՆԴԱԼ, ԹԵ ՄՇԱԿՈՒՅԹԻ
ՆՈՐ ՆԱԽԱՐԱՐ

Մի քանի օր անց պարզ կլինի, թե նոր ձեւավորված կառավարությունում որ նախարարները կշարունակեն իրենց գործունեությունը: Այս օրերին հանրությունը, ինչպես նաեւ մշակույթի գործիչներն անհանգստացած են, միթե Մշակույթի ամենաերկարակյաց նախարար Հասմիկ Պողոսյանը, ով 2006 թվականից այդ պաշտոնում է, կշարունակի իր գործունեությունը նախարարական աթոռին: Բայց սա թողնենք վերադասներին: Իսկ մենք փորձենք վերհիշել. Մշակույթի նախարարի պաշտոնավարման այս 8 տարիների ընթացքում նրա թեթեւ ձեռքով մշակութային բազմաթիվ կոթողներ, հուշարձաններ ու պատմական ժառանգության մասունքներ քիչ-քիչ մաշվեցին ու դեռ շարունակում են մաշվել եւ ոչնչանալ ոչ միայն Հայաստանում, այլեւ` մեր երկրի սահմաններից դուրս: Քանի±  հայկական եկեղեցիներ, մշակութային կոթողներ, տեր չկանգնելու պատճառով հարեւան Վրաստանում` Ջավախքում, վրացացվեցին ու թուրքացվեցին... Էլ չենք խոսում երաժշտական` ժողովրդական գործիքների մասին, որոնց տեր չկանգնելուց հետո լավ էլ իրենցով են անում ազերին ու թուրքը...
Հեռու չգնալով` հիշենք, որ ամիսներ առաջ ՀՀ մշակույթի նախարար ՀԱՍՄԻԿ ՊՈՂՈՍՅԱՆԸ կողմ էր հայհոյասեքսախառն բառապաշարով տպագրված գրքերին, ավելին` որեւէ վատ բան չտեսնելով երիտասարդ գրողների կողմից այլասերված ՙմտքի գոհարների՚ տպագրման մեջ, խորհուրդ է տալիս այդ գրքերը կարդալիս էրոտիկ, սեռական ու բաց տեսարանների հանդիպելու դեպքում թերթել այդ էջերը, ինչպես օրինակ` փոխում են հեռուստաալիքը` բաց տեսարանների ժամանակ:
Վերջերս էլ տիկին նախարարը ձեռնամուխ եղավ Գառնիի հեթանոսական տաճարի տարածքում բիզնես ծրագիր իրականացնել` տաճարի տարածքում սրճարան բացելու գաղափարը հավանության արժանացնելուց բացի` Հ. Պողոսյանը մի բան էլ արդարացավ, որ եթե հնագիտական շերտին չենք կպչում եւ չենք վնասում, կարելի է եւ կառուցել: Ավելին, թեեւ Գառնիում հանրության ընդվզման շնորհիվ ՙդուքյան՚ կառուցելը կասեցվեց, սակայն դեռ կա նման բան Զվարթնոցում, Քարահունջում, Լոռվա բերդում կառուցելու ախորժակ... Նախարարի թարմ գլուխգործոցներից էր նաեւ Ալ. Սպենդիարյանի անվան օպերայի եւ բալետի ազգային ակադեմիական թատրոնի` անհասկանալի ու մշակույթից շատ հեռու մի անձնավորությանը տնօրեն նշանակելը... էլ որն ասենք, էլ որը...
Թե ով կզբաղեցնի Մշակույթի նախարարի պաշտոնը` շրջանառվող անուններն ու հավանական թեկնածուները շատ են, պարզապես հուսանք, որ գումարելիների տեղը փոխելիս գումարն այս անգամ փոփոխական կլինի, ու ով էլ գա այդ պաշտոնին, հաշվի կառնի, որ եթե ուզում ենք կրթված, բանիմաց ու դաստիարակված սերունդ ունենալ, առաջին հերթին պիտի սկսենք մշակույթից, քանի որ այսօր բացի մշակույթից` ամեն ինչ կա մեր մշակույթում: Այսինքն` սնվենք մշակութային աջաբսանդալո±վ, թե որոնենք Մշակույթի նոր նախարար:

Կույտը մշակեց
ԼԻԼԻԹ ԵՂԻԱԶԱՐՅԱՆԸ