ԻՆՔՆԱՍՊԱՆՈՒԹՅԱՆ ՓՈՐՁ ԲԵՄԱԿԱՆԱՑՐԱԾ ԿԻՆԸ. ՙԼԱՎ ԵՄ ԱՐԵԼ, ԲԱ ՊԻՏԻ ԱՆԵՄ...՚

ԻՆՔՆԱՍՊԱՆՈՒԹՅԱՆ ՓՈՐՁ ԲԵՄԱԿԱՆԱՑՐԱԾ ԿԻՆԸ. ՙԼԱՎ ԵՄ ԱՐԵԼ, ԲԱ ՊԻՏԻ ԱՆԵՄ...՚

Ապրիլի 13-ին փրկարարների ահազանգով սահմանամերձ Բերդավան գյուղ է  մեկնել Նոյեմբերյանի բժշկական կենտրոնի շտապ օգնության խումբը: Պարզվել է, որ  նույն գյուղի բնակիչ 33-ամյա Նազելի Աթոյանը վառել է  անկողինը, ապա սպառնացել հրդեհել նաեւ իրենց տունը:
ՙՓառք Աստծո, փրկարարները հասցրել են հանգցնել կրակը, իսկ վառված անկողինը տնից դուրս են բերել՚,- մեզ հետ զրույցում ասաց Բերդավանի գյուղապետ Արարատ Գաբրիելյանը: Գյուղապետի խոսքով Նազելին բոլորին ասում է, որ այդ կերպ փորձել է ինքնասպանություն գործել, բայց իրականում.
- Նազելին իր նմանատիպ վարքագծով, ոչ ադեկվատ վիճակով հոգնեցրել է բոլորին անխտիր. ե°ւ համապատասխան ծառայություններին, ե°ւ հարեւաններին: Ինքն ապրում է մոր եւ հոգեկան խնդիրներով տառապող եղբոր հետ: Սակայն ի տարբերություն եղբոր, նա ոչ թե ավելի շատ հոգեկան հիվանդ է, այլ ահավոր կախվածության մեջ է ալկոհոլից: Եթե եղբայրը, հոգեկան հիվանդ լինելով, որեւէ մեկին չի անհանգստացնում, ապա քույրն ահավոր է: Չնայած, եթե խմած չի լինում, իսկ դա շատ հազվադեպ է, շատ լուրջ դատողություններ, վերլուծություններ է անում: Իր մոտ ալկոհոլի կախվածության վերջին աստիճանն է: Նա նախկինում իրեն մի քանի տասնյակ անգամ վնասել է, բայց գնալով դառնում է անկառավարելի եւ խիստ վտանգավոր թե° շրջապատի համար, թե° ընտանիքի, թե° հարեւանության: Այսօր ամբողջ օրը հարեւանները անհանգստացած գնում-գալիս են, թե հանկարծ իր ցանկությունը չկատարի` հրդեհի իր տունը, կողքից էլ հարեւաններին բաժին հասնի:
Հետաքրքիրն այն է, որ նա ինչ-որ անում է, անում է գիտակցաբար: Օրինակ ասում է, թե ինքնասպանության փորձեր է անում, բայց ոչ մի անգամ ինքը իրեն խոր չի վնասում, ածելիով վնասում է սպիերը, մենակ թե ածելին արյունոտվի ու դրանից հետո ինքն իրեն այդ վիճակում մշակում է ածելիով քերծած տեղերը: Բայց դրանով չի սահմանափակվում. զանգում է 911 եւ ասում, որ ինքնասպանություն է ուզում գործել: Երբ համապատասխան մարմինները գալիս են, նա կարծես ձեռ է առնելով, ծիծաղելով ասում է. ՙԼավ եմ, արել, բա պարապ նստած եք, բա պիտի անեմ: Համ էլ ուզում էի տեսնեիª ինչքան ժամանակում կգաք կհասնեք՚: Մենակ տեսնող մարդը կհասկանա, որ նա այդ կերպ կարծես խաղ է անում բոլորի հետ: Նրա ձեռքերին մինչեւ  արմունկները կտրվածքների բազմաթիվ հետքեր կան, սակայն նա երբեք չի կտրել երակները: Նա ագրեսիվանում է, երբ խմած է լինում, իսկ առանց ոգելից խմիչքի ազդեցության համարյա թե չի լինում:
- Լավ, բայց մի ելք պետք է գտնել: Չե որ այդ բնույթի ալկոհոլիզմը եւս հոգեկան հիվանդությունից պակաս չէ:
- Եթե համապատասխան օղակներ կան, որոնք որ պետք է զբաղվեն նման մարդուն մեկուսացնելու խնդրով, թող ուշադրություն դարձնեն Նազելիի վրա, ով արդեն իսկապես էական վտանգ է ներկայացնում շրջապատի համար: Թող մանր-մունր բացատրությունների, պատճառաբանությունների հետեւից չընկնեն` պետք է բուժեն, թող բուժեն` պետք է մեկուսացնեն` թող մեկուսացնեն:

ԻԼՈՆԱ ԱԶԱՐՅԱՆ