ՙԾԱՅՐԱՀԵՂ ԴԺԳՈՀ ԵՆՔ ՆԱԽԱՔՆՆՈՒԹՅԱՆ ԸՆԹԱՑՔԻՑ՚

ՙԾԱՅՐԱՀԵՂ ԴԺԳՈՀ ԵՆՔ
ՆԱԽԱՔՆՆՈՒԹՅԱՆ ԸՆԹԱՑՔԻՑ՚

Ավարտվել է Սյունիքի նախկին մարզպետ Սուրեն Խաչատրյանի տանը նախորդ տարի հունիսի 2-ին հնչած կրակոցների գործով նախաքննությունը:

Հիշեցնենք, որ կրակոցների հետեւանքով մահացավ Գորիսի քաղաքապետի նախկին թեկնածու Ավետիք Բուդաղյանը, իսկ հրազենային վնասվածքներ ստացան Արտակ Բուդաղյանը, ով ԼՂՀ N զորամասի հրամանատար է, եւ Նիկոլայ Աբրահամյանը, ով Սյունիքի մարզպետ Սուրեն Խաչատրյանի ազգականն է ու թիկնապահը: Նշենք նաեւ, որ սույն գործի շրջանակներում միակ մեղադրյալը Արտակ Բուդաղյանն է, ում մեղադրանք է առաջադրված Քրեական օրենսգրքի 137-րդ հոդվածի հատկանիշներով` սպանության, առողջությանը ծանր վնաս պատճառելու կամ խոշոր չափի գույք ոչնչացնելու սպառնալիքը:  Գո±հ են արդյոք Բուդաղյանները նախաքննական մարմնի իրականացրած քննությունից, թե ոչ, հարցով դիմեցինք  Բուդաղյանների ընտանիքի փաստաբան ՀԱՅԿ ԱԼՈՒՄՅԱՆԻՆ, ով մասնավորապես նշեց.
-Գոհ եմ (ծիծաղում է- Ի.Ա.), իհարկե ոչ: Դժգոհ եմ, դժգոհը այն խոսքը չի` ծայրահեղ դժգոհ ենք նախաքննության ընթացքից, վրդովված եմ ահավոր: Ոնց կարող ենք գոհ լինել, եթե սպանություն կատարողը եւ Արտակ Բուդաղյանին ծանր մարմնական վնաս պատճառողը ազատվել է քրեական պատասխանատվությունից, իսկ քրեական պատասխանատվության փորձում են ենթարկել Արտակ Բուդաղյանին. դրանից ավելի կոպիտ նախաքննական խախտում, արհամարհանք արդարադատության նկատմամբ ես ոչ միայն չեմ տեսել, այլեւ նույնիսկ չեմ էլ լսել:
Սա իր օրինակով աննախադեպ քրեական գործի քննությունն էր, եւ հուսով եմ` չի էլ դառնա նախադեպ: Համենայնդեպս մենք ամեն ինչ կանենք, որպեսզի արդարությունը վերականգնենք:
- Ամեն դեպքում Արտակ Բուդաղյանի մասով գործն արդեն դատարանում է:
- Բուդաղյանների միակ ակնկալիքը, հույսը մեր ներպետական ատյաններում` դատարանն է: Որովհետեւ մեր նախաքննական մարմինը եւ դատախազությունը ցույց տվեցին, որ այս գործով իրենք ի վիճակի չեն իրականացնել իրենց վրա դրված պարտականությունները: Մենք  հասնելու ենք նրան, որ ոչ միայն Արտակ Բուդաղյանին արդարացնեն, այլ բողոքարկել ենք նաեւ քրեական հետապնդումը դադարեցնելու մասին որոշումները: Միակ ատյանը, որի հետ ինչ-որ հույսեր կապում ենք, դրանք դատարաններն են:

ԻԼՈՆԱ ԱԶԱՐՅԱՆ