ԻՍԿ ՄՈՎՍԵՍԻ ԴԻԱԿՆ ԱՅԴՊԵՍ ԷԼ ՉԿԱ

ԻՍԿ ՄՈՎՍԵՍԻ ԴԻԱԿՆ ԱՅԴՊԵՍ ԷԼ ՉԿԱ

Քրեական աշխարհում հայտնի Թեւոսիկի եղբոր` Արթուր Սաֆարյանի սպանության մեջ մեղադրվող Իսրայել Սարգսյանի գործով որոշ փորձաքննությունների արդյունքներ արդեն պատրաստ են: Այս մասին մեզ հետ զրույցում ասաց Իսրայել Սարգսյանի պաշտպան ԳԱՅԱՆԵ ԳԱԼՈՅԱՆԸ: Փաստաբանի խոսքով, սակայն.
-Որոշ փորձաքննությունների պատասխաններ արդեն կան, բայց դեռեւս չեմ  հասցրել ծանոթանալ, ամեն դեպքում չեմ կարծում, որ ինչ-որ բան հայտնաբերված լինի իմ պաշտպանյալի հետ կապված: Կծանոթանամ, կտեղեկացնեմ:  Մի բանում վստահ եմ` նախաքննական մարմինը շտապեց` հայտարարելով, թե աղմկահարույց սպանության գործը բացահայտված է: Ճիշտն ասած, ես մտածում եմ, որ նախաքննական մարմինն ապացույց չունի եւ պիտի մեղադրանքը առհասարակ հանի իմ պաշտպանյալի վրայից, ոչ թե ցմահ ազատազրկման դատապարտի: Նախաքննական մարմինը դեռեւս Մովսես Ներսիսյանի նկատմամբ իրավական կարգավիճակ չունի ձեւավորած: Մովսես Ներսիսյանը չի դիտվում մեղադրյալի կարգավիճակում: Եվ եթե Մովսես Ներսիսյանը մեղադրյալ չէ, ապա մինչեւ հիմա ինձ համար անհասկանալի է, թե ինչո±ւ է իմ պաշտպանյալը մեղադրյալի կարգավիճակում` սպանության դրվագով:
Հիշեցնենք, որ նախաքննության վարկածով Իսրայել Սարգսյանը հենց Մովսեսին է պատվիրել Արթուրի սպանությունը: Ապա, գործն անելուց հետո, սպանել է Մովսեսին ու դիակը գցել կոյուղին: Բայց դիակն այդպես էլ չհայտնաբերվեց, եւ ահա ՀՀ ոստիկանության լրատվական ծառայությունից փորձեցինք ճշտել, որ եթե մինչ օրս Մովսեսի դիակն այդպես էլ չի հայտնաբերվել, նախաքննական մարմինը նույն վարկա±ծն է շարունակում առաջ տանել: Ստացանք միայն հետեւյալ պատասխանը. ՙՆախաքննությունը շարունակվում է, նորություններ լինելուն պես կհայտնենք՚:

ԻԼՈՆԱ ԱԶԱՐՅԱՆ