ՙՙՙՙՀՈՎԻԿ ԱԲՐԱՀԱՄՅԱՆՆ ՈՒՆԻ ԿԱՄՔ ԵՎ ՈՒՆԱԿՈՒԹՅՈՒՆՆԵՐ` ՍՏԵՂԾՎԱԾ ԻՐԱՎԻՃԱԿԸ ՇՏԿԵԼՈՒ ՀԱՄԱՐ՚

ՙՀՈՎԻԿ ԱԲՐԱՀԱՄՅԱՆՆ ՈՒՆԻ ԿԱՄՔ ԵՎ ՈՒՆԱԿՈՒԹՅՈՒՆՆԵՐ` ՍՏԵՂԾՎԱԾ ԻՐԱՎԻՃԱԿԸ ՇՏԿԵԼՈՒ ՀԱՄԱՐ՚

Հայտնի է, որ ՀՅԴ-ն այս օրերին դեռ քննարկումների փուլում է` միանալ կոալիցիային, թե` ոչ, հարցի շուրջ: ՀՅԴ-ն առաջ է քաշում իր հայտնի 7 կետերը, որոնց մի մասն ընդունելի է ՀՀԿ-ի համար, սակայն կան եւ ոչ ընդունելի կետեր, օրինակ` 100 տոկոսանոց համամասնական ընտրահամակարգի պահանջը: Դաշնակները իրենց պատասխանը կտան ապրիլի 18-ից հետո, երբ կավարտվի նրանց տարեկան Գերագույն ժողովը: Երեկ լրագրողների հետ զրույցի ընթացքում ԱԺ ՀՅԴ խմբակցության պատգամավոր ԱՐԾՎԻԿ ՄԻՆԱՍՅԱՆԸ խոսելով վերը նշված 7 կետերի մասին, առ այն, որ դրանցից շատերի հարցի պատասխաններն արդեն առկա են, պատգամավորը նշեց, որ դա խոսում է այն մասին, որ այդ 7 կետերը եղել են ճիշտ, եւ որ դրանք գիտակցվել են իշխանությունների կողմից, ու հիմա մնում է այն իրականացնել: Թե արդյոք բավարար չէ, որ ՀՅԴ-ն արդեն իր որոշումը կայացնի կոալիցիա մտնելու առումով` Ա. Մինասյանն ասաց, որ` դեռ ոչ, որովհետեւ այդ 7 կետերի մեջ միայն սահմանադրական փոփոխությունները չեն, այլ այնտեղ կոնկրետ կամքի արտահայտում է, այդ թվում նաեւ ընդդիմության կամքի արտահայտումն է, բիզնես-քաղաքականություն հստակ տարանջատումն է եւ այլն. ՙԱյնպես չի, որ այդ յոթ կետերը լուծվեցին, մենք պետք է վեր կենանք ու գնանք, դրա համար կոնսուլտացիաները շատ կարեւոր են այս փուլում՚:
Մեր այն հարցին, թե ինչ ակնկալիքներ ունեք նորանշանակ վարչապետից` Ա. Մինասյանը պատասխանեց.
-Նախ, պետք է առաջին անհրաժեշտության քայլ լինի ներկա իրավիճակում` արագ կերպով հանրության վստահությունը վերականգնելու առումով: Դրանք այն հիմնական  գործողություններն են, որոնք վերջին շրջանում դժգոհություններ են առաջացրել հանրության մոտ: Երկրորդ հանգամանքն այն է, որ ծրագրային հենքի վրա ՀՀ քաղաքացուն ներգրավել որոշումների կայացման գործընթացում եւ հասանելի դարձել բոլոր այն բարեփոխումների գործընթացին, որոնք պետք է իրականացվեն, դրա արդյունքի նկարագրմամբ: Առանց դրա, հնարավոր չէ առաջ գնալ: Հետո թիրախներ ընտրելիս` կառավարությունը պետք է հիմնվի տնտեսական զարգացման եւ աշխատատեղերի ստեղծման, արդար վարձատրության համակարգի եւ երկրում  արդարության հաստատման չափորոշիչների վրա, որով պետք է եւ գնահատվի կառավարության աշխատանքը:
- Եթե  հաշվի առնենք, որ Դուք երկար տարիներ աշխատել եւ ճանաչում եք Հովիկ Աբրահամյանին, վերը նշված Ձեր դրույթներն ու համակարգային փոփոխությունների իրականացումը տեսնո±ւմ եք պարոն Աբրահամյանի կողմից:
- Ես կարծում եմ, որ պարոն Աբրահամյանն ունի այդ ունակությունները, բայց դա չպետք է թողնել միայն նրա վրա: Եթե մենք սիրում ենք մեր երկիրը եւ ցանկանում ենք դրական փոփոխություններ ունենալ, անկախ նրանից, թե դրա արդյունքում, որ քաղաքական պաշտոնատար անձը կստանա դիվիդենտներ, մենք պետք է համախմբվենք այդ գաղափարների շուրջ եւ իրականացնենք: Եթե Հովիկ Աբրահամյանը կմերժի այս մոտեցումները, ապա ձախողումներն ակնհայտ կլինեն: Ասածիս իմաստն այն է, որ կա այդ կամքն ու ունակությունը, որ նորանշանակ վարչապետը կարող է իրականացնել եւ վստահ եմ, որ եթե  աջակցությունը լինի անկեղծ, հարթության երկկողմանի սկզբունքով, ապա մենք կարող ենք հաղթահարել ստեղծված իրավիճակը:
- Ում եք տեսնում Ազգային ժողովի նախագահի պաշտոնին:
- Չեմ կարող ասել, դա քաղաքական մեծամասնության որոշելիքն է, իսկ իմ ցանկությունն այստեղ երկրորդական է:
- Իսկ որն է Ձեր ցանկությունը:
- Իմ ցանկությունն է երիտասարդ կադրերին տեսնել բարձր պաշտոններում:

ԱՐՄԵՆՈՒՀԻ ՀԱԿՈԲՅԱՆ