ՙՙՀՆԱՐԱՎՈՐ Է` ԲՀԿ-Ի ՀԵՏ ՔԱՂԱՔԱԿԱՆ ՀԱՄԱՁԱՅՆՈՒԹՅՈՒՆՆԵՐ ՈՒՆԵՆԱՆՔ՚

ՙՀՆԱՐԱՎՈՐ Է` ԲՀԿ-Ի ՀԵՏ ՔԱՂԱՔԱԿԱՆ
ՀԱՄԱՁԱՅՆՈՒԹՅՈՒՆՆԵՐ ՈՒՆԵՆԱՆՔ՚

Այն, որ արդեն ՙհրաշալի քառյակն՚ այլեւս անելիք չունի, պարզ դարձավ ապրիլի սկզբին` ՀՀ վարչապետի փոփոխությունով: Հիշեցնենք, որ քառյակը սրտատրոփ սպասում էր ապրիլի վերջին օրերին, որպեսզի օր ու գիշեր Ազատության հրապարակում անցկացնի եւ պահանջի կառավարության հրաժարականը: Բայց ինչպես ասում են` շաբաթն ուրբաթից շուտ եկավ, եւ տեղի ունեցավ այն, ինչ արդեն տեղի ունեցավ, որից հետո քառյակամոլները հարցականները գլխներին` փորձում են նոր իրավիճակներ ու պահանջներ ներկայացնել երկրի իշխանություններին: Բայց նորանշանակ վարչապետի նշանակմամբ եւ տեղի ունենալիք կառավարության փոփոխությունների արդյունքում քառյակ-միությունը ինքնըստինքյան կազմաքանդվեց, եւ այն վերածվեց դուետի: Այս եւ այլ հարցերի շուրջ զրուցեցինք ԱԺ ՀՀԿ խմբակցության նախագահ ԳԱԼՈՒՍՏ ՍԱՀԱԿՅԱՆԻ հետ:
-Պարոն Սահակյան, նախկին վարչապետի հրաժարականով եւ արդեն նորանշանակ վարչապետի նշանակումով շատ բան կփոխվի մեր երկրում: Այս գլոբալ փոփոխություներին էին ձգտում նաեւ ոչ իշխանական ուժերը: Ձեր կարծիքով` էլ ի±նչ պահանջներ պետք է ունենա ՙհրաշալի քառյակը՚` քաղաքական մեծամասնությունից:
- Ես կարծում եմ, որ այդ հարցը պետք է ուղղել այդ քառյակին, առավել եւս պետք է ասեմ, որ իմ դիտարկումով` հարցադրումների նոր օրակարգ խորհրդարանական այդ քառյակը դեռ չունի:
- Ձեր կարծիքով, որքանո±վ դեռ կա այդ ՙհրաշալի քառյակը՚, եւ արդյո±ք նրանք հրաշալի էին, թե` ոչ:
- Այս պահին, եթե օրակարգ չունեն, որի համար էլ պետք է պայքարեն, բնականաբար, դեռեւս քննարկումների փուլում են:
- Կոչերն առ այն, որ պետք է օր ու գիշեր անցկացնեն Ազատության հրապարակում, հանրությանը դուրս հանեն, դեռ շարունակվում են: Էլ ի±նչ պահանջներ ունեն իրենք, ըստ Ձեզ:
- Դա առանձին-առանձին հայտարարություններ են` առանձին գործիչների միջոցով:
- Շուտով պետք է ընտրվի նաեւ Ազգային ժողովի նախագահ: Դուք ո±ւմ եք տեսնում այդ պաշտոնին:
- 131 պատգամավորներին էլ տեսնում եմ, քանի որ, ըստ կանոնակարգի, պատգամավորը կարող է նման առաջարկությամբ հանդես գալ, որն էլ քննարկման ենթակա է:
- Ինչո±վ է պայմանավորված այն, որ ԲՀԿ-ի ներսում երկու տարաբնույթ հայտարարություններ են կատարվում, ոմանք ասում են, որ ԲՀԿ-ն չի մտնի կոալիցիա, եւ կամ ասվում է, որ ԲՀԿ-ն դեռ նման հարց չի դրել իր օրակարգում:
- Նորից պետք է  ասեմ, որ սրանք առանձին գործիչների հայտարարություն է, եւ պետք է ԲՀԿ-ն վերջնական որոշում կայացնի, որով էլ ամբողջ կուսակցությունը կառաջնորդվի:
- Դուք ինչ կանխատեսումներ ունեք` ինչ ճանապարհով կգնա ԲՀԿ-ն:
- Ճիշտն ասած, իրենց քննարկումների ծավալներին ծանոթ չեմ, իրենք փորձելու են տնտեսական առաջարկություններ անել ընդհանրապես քաղաքական ուժերին, եւ կարծում եմ, որ դա իրենց բնական գործընթացն է: Իսկ թե կմտնեն կոալիցիա, թե` ոչ, դա պարզ չէ, եւ հետո քաղաքական համաձայնություն չի նշանակում կոալիցիա մտնել: Հնարավոր է` ինչ-որ քաղաքական համաձայնություններ ունենանք, բայց ես տեղյակ չեմ, եւ այդ առաջարկությունները դեռ չենք ստացել:

ԱՐՄԵՆՈՒՀԻ ՀԱԿՈԲՅԱՆ